Хумайра Асгар тус бичлэгээ "Би хаана ч явсан үргэлж гал дагуулдаг" гэсэн нэртэйгээр байршуулсан бөгөөд өдгөө үүнийгээ TikTok дээрээсээ устгажээ. 

Пакистаны томоохон хэвлэл мэдээллийн хэрэгсэл "The News"-ийн мэдээлснээр Исламабадын цагдаа нар уг бичлэгтэй холбоотойгоо мөрдлөг явуулж байгаа бөгөөд Асгарыг тус улсын ан амьтан, байгаль орчныг хамгаалах хуулийг зөрчсөн хэрэгт сэжиглэж байгаа гэнэ. 

"Энэхүү газар нь Маргалла үндэсний цэцэрлэгт хүрээлэнгийн нэг хэсэг бөгөөд саяхан томоохон ой хээрийн түймэр гарч их хэмжээний хохирол учирсан юм. Энэ бүхэнтэй Хумайра Асгар холбоотой байж болзошгүй" гэж Исламабадын цагдаагийн газрын тайланд дурджээ.

Асгар өөрөө тавьсан галаа тэр даруй унтраасан бөгөөд "Видео бичлэг хийх явцад би хэнд ч хор хүргээгүй" хэмээн албан ёсоор мэдэгджээ.

Ямартай ч энэхүү видео олон нийтийн сүлжээгээр багагүй шуугиан тарьж, олон хэрэглэгчид түүнийг байгаль орчны асуудалд увайгүй хандаж байгааг шүүмжилсэн байна. Сүүлийн гурван долоо хоногийн хугацаанд Пакистан болон Энэтхэгийн төв хэсгээр түүхэнд байгаагүй хэмжээнд буюу цельсийн 50 хэм хүрч халсан билээ. Дээр нь хур тунадас огт ороогүйн нөлөөгөөр Пакистанд өндөр хэмжээний хуурайшилт үүсээд байгаа. Үүнээс болоод хэдэн зуун хүн эмнэлэгт хүргэгдсэний зэрэгцээ 24 хүн нас барсан юм. 

Тэгтэл энэ мэт хүмүүсийн үйлдэл дарин дээр давс нэмсэн хэрэг боллоо хэмээн олон нийт туйлын их бухимджээ. 

Исламабадын Зэрлэг амьтдыг хамгаалах зөвлөлийн дарга, байгаль орчны идэвхтэн Рина Саид Хан Сатти "Галыг баясгах биш ус зөөж унтрааж буйгаар өөрийгөө харуулах ёстой байсан юм" гэж мэдэгдсэн байна.

Асгар хэвлэлийнхэнд өөр албан ёсны тайлбар өгөөгүй бөгөөд цахим орчноос хэсэгтээ хол байхаар шийдсэнийг төлөөлөгч нь дамжуулжээ. Тэрээр сүүлийн үед Пакистанд ой хээрийн түймэр тавьсан хэрэгт буруутгагдаж байгаа хоёр дахь хүн аж. 

Одоогоос ес хоногийн өмнө өөр нэг залуу зугаалгаар явж байгаад гал тавьсан хэрэгт буруутгагдан өдгөө баривчлагдаад байгаа аж.