Монгол Улсын Засгийн газрын ээлжит бус хуралдааны шийдвэрийг өчигдөр Ерөнхий сайд Л.Оюун-Эрдэнэ танилцуулсан. Тэрбээр “Төрийн албан хаагчид Улаанбаатар хотод том оврын, тансаг автомашинаар зорчихгүй, ашиглахгүй” хэмээсэн.

"Монголдоо сайхан амьдаръя" хөдөлгөөн хүрээгээ тэлсээр гадаадад сурч, ажиллаж, амьдардаг залуус нэгдэж эхэллээ. Ингэснээр үнийн хөөрөгдөл, авлига, шударга бус тогтолцоог эсэргүүцсэн уг тэмцэл улам өргөжиж байна. Жагсаалд аймаг, орон нутаг, гадаад улсаас иргэд нэгдэж буйгаа цахим хуудсаараа мэдэгдсээр байна.  

"Монголдоо сайхан амьдаръя" уриатай залуусын жагсаал Төв талбайд хоёр дахь өдрөө үргэлжилж Ерөнхий сайд, Засгийн газрын гишүүд гарч ирж иргэдтэй уулзлаа. Өнөөдрийн жагсаалд "Дүү нарыг минь сулла ах нар нь ирлээ", "Хүчирхийлдэггүй төрийг бид хүсэж байна", "Гэмгүй иргэдийг сулла" зэрэг агуулгатай цаас барьсан иргэд нэмэгджээ. Жагсагчид өчигдөр үзэл бодлоо илэрхийлснээс болж баривчлагдсан залуусыг суллахыг, дахин дуудахгүй байхыг шаардав. Үүний хариуд Ерөнхий сайд Л.Оюун-Эрдэнэ "Уулзалтын дараа би цагдаагийн даргатай уулзаж энэ тухай хэлэх болно. Баривчлагдсан залуусыг дахиж шалгахгүй" гэж амлалаа.

Өчигдөр болж өнгөрсөн жагсаалын үеэр баривчлагдсан 20 орчим залууг үнэгүй өмгөөлөхөөр "Монголын өмгөөлөгчдийн холбоо"-ны өмгөөлөгчид Дэнжийн мянгад байрлах 111-р хорих ангийн гадаа цуглаад байна. Хуульч А.Пүрэвдулам хэлэхдээ "Өмгөөлөгчдийг ямар ч үндэслэлгүйгээр дотогш нэвтрүүлэхгүй байна. Бид хууль ёсны шаардлага тавьсан ч биелүүлэхгүй байгаа юм. Түр саатуулах хугацаа 6 цаг байдаг. Хугацаа нь өнгөрчхөөд байхад одоо хэрнээ зарим залуус гарч ирээгүй байна" гэлээ. 

"Монголдоо сайхан амьдаръя" жагсаалын үеэр баривчлагдсан 20 орчим залуусыг үнэгүй өмгөөлөх уриалгыг хуульч А.Пүрэвдулам өөрийн цахим хуудсаараа дамжуулж мэдэгдсэн. Тэгвэл түүний санаачилсан энэхүү хөдөлгөөнд хуульчид нэгдэж эхэллээ. Яг одоо залуусыг өмгөөлөх хүсэлтэй өмгөөлөгч нар Дэнжийн мянгын 111-р хорих ангийн үүдэнд цуглаад байна.

Өчигдөр болсон "Монголдоо сайхан амьдаръя" жагсаалын үеэр 20 орчим иргэнг баривчилсан тухай Нийслэлийн цагдаагийн удирдах газрын дарга Р.Отгонжаргал мэдээлэв. Тэрбээр "Өчигдөр 04:00 цаг өнгөрч байхад жагсагчдыг тарахыг шаардахад эсэргүүцсэн. Ингээд 20 орчим иргэнийг түр саатуулан шалгаж байна. Тухайн иргэд дотор бага насны хүүхэд байхгүй" гэв. 

Тэгвэл үзэл бодлоо илэрхийлж жагссан дээрх залуусыг суллахыг шаардан "Залуусыг сулла" хөдөлгөөн цахим орчинд эрчимжээд байна. Цагдаагийн алба хаагчдын албадан баривчилсан үйлдлийг эсэргүүцсэн иргэд #ЗалуусыгСулла хаштаг ашиглан сэтгэгдлээ илэрхийлж эхэллээ. 

Цагдаагийн Ерөнхий Газраас өчигдөр төв талбайд болсон жагсаал, цуглаантай холбоотойгоор мэдээлэл хийлээ.

Жагсаалын албан ёсны бүртгэл хойшилсон байсан ч өчигдөр төв талбайд залуус үнийн хөөрөгдлийг эсэргүүцэж дуу хоолойгоо нэгтгэлээ. Жагсаалд оролцсон иргэдийн ихэнх нь 16-24 хүртэлх насны залуучууд байв. Тэд эрх баригч нараас огцрохыг бус ажлаа хийхийг шаардан "Өөрсдөө хэмнэ", "Ажлаа хий" гэх уриаг хэлэн төрийн ордонг тойрсон юм. Цуваа дан ганц явган иргэдээр хязгаарлагдсангүй. Дугуй, машин, мотоцикл унасан иргэд дуут дохио өгч эсэргүүцлээ илэрхийлэв. Залуус Засгийн газрыг ажлаа хийх, хулгайгаа зогсоох, шударга ёсыг эрхэмлэх, өрөө төлөх, үнийн өсөлтийг бууруулахыг шаардаж, эх орондоо сайхан амьдрах хүсэлтэй байгаагаа хүчтэй илэрхийлж байна.