1
Полияндр гэр бүлийн өрхийн тэргүүн нь хэн байдаг вэ?
Эрт үеэс л Полигами буюу нэг эрэгтэй олон эхнэртэй байдаг гэр бүл олон байсаар ирсэн. Харин эсрэгээрээ нэг эмэгтэй олон нөхөртэй байдаг гэр бүл буюу полияндр гэр бүлүүд хэрхэн амьдардаг бол? Хамгийн сонирхолтой нь ийм гэр бүлүүдийн нөхөр нь төрсөн ах дүү нар байх нь элбэг. Том ах нь түрүүлж эхнэрээ сонгож, дүү нартайгаа хуваалцан, өрхийн тэргүүн болдог. Тэрээр дахин өөр эхнэр авах эрхтэй байдгаас гадна эхнэрээс нь төрсөн бүх хүүхэд анхны нөхрийн хүүхэд биш байсан ч ааваа гэж дуудан, овгоор нь овоглодог бол бусад нөхрүүдийг нь ах гэж дууддаг байна.
2
Полияндр гэр бүл хаанаас үүсэлтэй вэ?
Полияндр гэр бүл хаанаас, яагаад бий болсон нь одоог хүртэл тодорхойгүй байгаа ч эрдэмтэд энэ төрлийн амьдралын хэв маяг үүсэх болсон гол шалтгаан нь эдийн засгийн нөхцөл хэмээн үзжээ. Бүгд нэг гэр бүл болсноор ах дүү нар газар, өмчөө хувааж, хуваарилах шаардлагагүй болох ба энэ арга нь хөрсний бохирдол, хомсдолд нэрвэгдсэн Төвд, хүн ам нь хэт өсөж буй Энэтхэг улсуудын эдийн засагт ашигтай шийдэл болсон байна.
3
Хуулиар зөвшөөрөгдсөн эсэх
Дэлхийн улсууд полияндр гэр бүлийг хууль ёсоор зөвшөөрдөггүй. Гэсэн ч ийм төрлийн гэр бүлийг хууль зөрчсөн гэж үзэн ял шийтгэл тулгадаггүй учир Төвд болон зарим улсуудын хөдөө нутагт ийм төрлийн гэр бүл оршсон хэвээр байна.
4
Таван нөхөр, нэг эхнэртэй өрх нэг гэр бүлд тооцогддог
Хэдэн зуун жилийн өмнөөс л полияндр гэр бүл оршсоор ирсэн. Тэдний эцэг эх, өвөө, эмээ, элэнц, хуланц нар нь бүгд л ийм хэв маягаар амьдарч ирсэн гэсэн үг. Нэг эмэгтэй аль ч нутгаас хамаагүй 2-5 нөхөр авах ба тэд бүгд дор хаяж 18 нас хүрсэн байдаг. Хэрэв нөхрүүд нь нэг гэрийн ах дүүс бол дүүгээ 18 нас хүрэнгүүт нь эхнэрийнхээ өөр нэг нөхөр болгодог байна. Ихэнх полияндр гэр бүлүүд ядуу зүдүү байдаг учраас бүгд нэг жижигхэн өрөөнд хамтдаа амьдардаг. Нөхрүүдээ ажилд явсан хойгуур эхнэр нь гэрээ цэвэрлэж, хоол хийж, хүүхдүүдээ асардаг. Төвдийн уламжлалт гэрүүдэд ор байдаггүй учир ихэнхдээ тэд газар хөнжил дэвсээд унтдаг.
Нийтдээ 15 гаруй полияндр гэр бүл хөрш, холбоо болон зэргэлдээ амьдардаг. Тэд хэзээд бие биедээ туслахад бэлэн байдаг. Гэхдээ гэр бүл бүр өөрсдийн дотоод дүрэм, хариуцлагатай. Заримдаа эхнэр нь ажил хийж, нөхрүүд нь гэрийн ажлаа хийж, хүүхдүүдээ хардаг гэр бүлүүд ч байдаг гэнэ.
