Жуулчдын хамгийн ихээр барьдаг загас бол Монголын хамгийн том загас болох Тул загас бөгөөд цэнгэг усны энэ үзэсгэлэнтэй аварга загас нь Монголын улаан номонд орсон байдаг. Тул нь одоогийн байдлаар зөвхөн Монгол болон Оросын зарим нутагт л амьдарч байна.

Тул (Hucho taimen)

Хулд овгийн загас юм. Энэ загас нь урсгал усанд амьдрах бөгөөд манай орны Эг, Сэлэнгэ, Орхон, Онон, Хэрлэн, Тэнгис, Шишгэд, Үүр, Дэлгэрмөрөн зэрэг гол мөрөнд илүү ихээр нутагшин амьдардаг. Тул загасны гадаад өнгө нь газарзүйн бүсээс хамааран ялгаатай байх боловч голдуу оливын ногоон өнгөтэй, толгойноос нуруу, сүүл хүртэл улаан бордуу өнгө хосолсон байдаг.

Яргайн овгийн загас дотор хамгийн том нь юм. Биеийн урт нь голчилон 1,5-2 метр урт байх ба биеийн жин нь 60-80 кг хүрдэг. Өдгөө бүртгэгдсэн рекорд нь 210 см урт, 105 кг жинтэй болно. Тул загас 40 хүртэл насалдаг. Бэлгийн бойжилт нь 5-7 настайдаа гүйцэх бөгөөд энэ үе дээ 55-60 см урттай, 1.5-3 кг жинтэй байдаг. Нэг удаа түрслэхдээ 10-34 мянган ширхэг түрс гаргадаг. Түрс нь 30-45 хоногийн дараа хагарч жаараахай болдог ажээ.

Түрс нь улбар шар, ягаавтар өнгийн 4-7 мм ийн диаметртэй байдаг. Зэвэг загаснаас ялгагдах хамгийн гол онцлог нь зэвэг загасыг бодвол харьцангуй том амтай, ам нь нүдний ар хэсгээс илүү гарсан байхад зэвэг загасны ам нүд хүртэл урт байдаггүй. Насанд хүрсэн тул нь бусад загасаар болон оготно, зурам, жирэх, хэрэм зэрэг мэрэгч амьтад болон зарим шувуу болон тэдний дэгдээхэйгээр (нугас, ангир г.м.) хооллодог ажээ.