Air Koryo хэмээх Хойд Солонгосын нислэгийн компани нь ганцхан одтой дэлхийн цорын ганц компани юм. Хамгийн дээд тал нь 5 одтой байх ёстой нь мэдээжийн хэрэг шүү дээ. Яагаад ганцхан одтой гэж? Ихэнхи хүмүүс Air Koryo нислэгийг аймшигтай, зориг зүрх шаардагдсан нислэг хэмээн үздэг байна. Зорчигчдын хэлж байгаагаар онгоцны үйлчлэгч нар англи хэл муухан мэддэг бөгөөд тарааж өгч буй хэвлэл мэдээллийн хэрэгсэл нь ихэвчлэн дуу хөгжмийн талаар мэдээлэлтэй Хойд Солонгосын удирдлагуудын хүлээн зөвшөөрсөн сонинг л тарааж өгдөг хэмээн ярьжээ.
Мөн үүнээс гадна энэхүү нислэгийн үеэр өгч буй хоол үнэхээр идэх боломжгүй байдаг гэнэ. Хэдийгээр Air Koryo нислэгээр АНУ болон Европын орнууд руу нисэхийг зөвшөөрдөггүй ч энэхүү нислэг Москва, Владивосток, Куала-Лумпур, Сингапур болон Кувейтруу нисдэг байна. Харин Хойд Солонгосыг нүдээрээ харахыг хүссэн жуулчдын хувьд Air Koryo нислэг нь Пхеньян руу шууд хүргэх цөөхөн тооны нислэгийн нэг аж. Энэхүү компанийн онгоцууд бүр ЗСБНХУ-үеийнх боловч Ан-148 хэмээх шинэ онгоцуудыг худалдан авсан байна.

Ингээд ерөнхийдөө Air Koryo-ийн хувьд сайн, муу хоёр талын л сэтгэгдэлтэй байсан юм. Гэсэн хэдий ч ихэнхи тохиолдолд муу сэтгэгдэл давамгайлж байлаа. Жишээ нь: "Би "Ильюшин" онгоцоор ниссэн бөгөөд амьд хүрч чадсандаа баяртай байна. Буцах нислэгтээ би өөр онгоц сонгохыг хүссэн ч сонголт байсангүй. Онгоцны салонд маш их зүйл эдвдэрсэн байсан. Нисгэгчдийн өрөөний хаалга хаагддаггүй байсан бөгөөд тэдний өрөөнд болж байгаа бүхий л зүйл харагдаж байсан юм. Үйлчлэгч нар нь англи хэл мэддэггүй, хоолны хувьд бусад Азийн нислэгийн компаниудыг бодоход чанар маш муутай байсан бөгөөд би амьдралынхаа хамгийн хямдхан хоолыг энд л идэж үзсэн байх"-хэмээн зорчигч Б.Мартин хэлж байжээ.
Тэгвэл одоо хамгийн эерэг сэтгэгдлийг хүргэе. “Ан-24 оноц хөөрмөгц л бидэнд уух зүйл өгсөн. Сонголтын хувьд хоёр пиво эсвэл алимны шүүс байсан юм. Үйлчлэгчдийн хувьд эелдэг, харилцааны соёлтой хүмүүс байсан. Надад бараг хоосон салон маш их таалагдсан бөгөөд хүссэнээрээ чөлөөтэй хэвтэж явах боломжтой байсан юм. Муулах зүйл алга” -хэмээн Германы иргэн Фил хэлсэн байна.