Герман улсад шоронгоос оргох явдлын тухай хууль нь 1880-аад оноос эхтэй. Тэр үеийн хууль боловсруулагчид хүн эрх чөлөөг хүсэх нь байгалийн зөн совин гэж үзсэн учраас оргох оролдлого хийхэд шийтгэл оноохгүй хэмээн хуулиндаа зааж өгчээ. 

Гэхдээ мэдээж үүнтэй холбоотой хэд хэдэн заалтууд мөн байдаг байна. 

Жишээлбэл хоригдолд оргоход нь туслах хориотой, мөн тухайн хоригдол оргох явцдаа эд зүйлс эвдэж хэмхэлсэн, өөр хүний эрх чөлөө, аюулгүй байдалд халдсан бол түүнийхээ төлөө хариуцлага хүлээнэ. 

Шоронгоос орголтыг хууль бус гэж үздэггүй орнуудыг цэнхрээр тэмдэглэсэн байгаа нь

Ийм хатуу заалтуудтай учраас оргоод баригдсан хоригдол ямар нэгэн шийтгэлгүй өнгөрөх тохиолдол бараг байдаггүй гэнэ. Жишээлбэл, хорих газрын цонхыг хагалаад гарсан бол эд хөрөнгөнд хохирол учруулсан хэргээр шийтгэл хүлээнэ. Тэгвэл юу ч хагалж эвдлэхгүйгээр гарч чадлаа гэхэд улсын өмч болох шоронгийн хувцсыг хулгайлсан хэрэгт унана. 

Мөн оргоод баригдсан нэгэн буцаж шоронд орохдоо ялаа нэмүүлээгүй ч гэсэн суллагдах хүртлээ өмнөхөөсөө хүнд, хараа хяналт чангатай нөхцөлд хоригдохоор болдог. Дээр нь мэдээж сахилга батын асуудал гаргасанд тооцогдох тул хугацаанаасаа өмнө суллагдах талаар саналтгүй болно.

Сонирхолтой нь чанга хатуу дэглэмтэй шоронгуудаараа алдартай Мексик улсад мөн адил эрх чөлөөний төлөөх тэмцлийг хүний үндсэн эрх гэж үздэг учраас оргохыг завдсан хоригдолд шийтгэл нэмдэггүй. Гэхдээ тус улсын хуулиар хоригдлын хорих газраас гадна өнгөрүүлсэн хугацааг ялын үндсэн хугацаанд нь оруулж тооцохгүй тул оргодол баригдсаныхаа дараа тэрхүү хугацаагаа ял дээрээ нэмүүлдэг ажээ. Жишээлбэл амжилттай оргоод гурван жил чөлөөтэй явсан хоригдол хэрэв баригдвал анхны суллагдах хугацаанаасаа гурван жилийн дараа суллагдана гэсэн үг юм.