Дэлхийд тэргүүлэх улсуудын эрх баригчдыг улалзтал нь "загнадаг" гэдэг хоч авсан Грета охин энэ жил 18 нас хүрч байна. Тэрээр энэ жилийн 8-р сарын эхээр Vogue сэтгүүлийн Скандинав дахь салбартай хамтран ажиллаж, дэлхийн хувцас загварын ихэнх компаниудын байгальд орчин үзүүлж буй нөлөөллийн талаар өөрийн байр сууриа илэрхийлсэн байлаа.

Грета Тунберг хувцас загварын салбарыг дэлхийн цаг уурын өөрчлөлтөд асар их сөрөг нөлөө учруулж байгааг дурдахдаа "Fast fashion" буюу "Хурдан загвар"-ын үйлдвэрлэлд ажиллаж байгаа дэлхийн өнцөг булан бүр дэх олон сая ажилчдыг бус,  "Fast fashion" буюу "Хурдан загвар"-ын брэндүүдийг сурталчилж, түүнийг шимтэн худалдан авсаар буй хэрэглэгчдийг "буруутай" гэж үзсэн болохоо илэрхийлсэн байв. 

Ингэхдээ тэрээр "хурдан загвар"-т хамаарах брэндийн бүтээгдэхүүнүүд маш хурдан элэгдэн хуучрахын зэрэгцээ загвар нь асар хурдацтай хоцрогдохын эрхээр байгаль орчинд олон сая тонн хог хаягдал үүсгэдэг боловч дээрх компаниуд экологийн асуудал дээр суурилсан хэрэглэгчдийн тархийг угаах утга агуулга бүхий сурталчилгаа хийж, эдийн засгийн ашгийн төлөө байгаль дэлхийг золиосолсоор байгааг дурджээ.

Иймээс Грета Тунберг Vogue сэтгүүлийн Скандинав дахь салбартай хамтран байгаль орчны нөхцөл байдалд санаа тавьдаг мэт хуурамч дүр эсгэн хий хоосон сурталчилгаа явуулж хүмүүсийг хуурч буй компаниудын эсрэг дуу хоолойгоо өргөхөөр шийдсэн нь энэ аж.

Түүний өмнөх мэдээллүүдээс дурдвал, 2018 оны 5-р сард Грета Шведийн "Svenska Dagbladet" сэтгүүлийн экологийн холбогдолтой нийтлэлийн тэмцээнд тэргүүн байр эзэлж байсан юм. Үүнээс хойш охиныг "Fossilfritt Dalsland" экологийн байгууллагын уулзалтад урьснаар байгаль орчин хамгаалах үйл ажиллагаанд идэвхтэй оролцож эхэлжээ.