Чиндогу хэмээх нэр томъёог Японы нэгэн гэр ахуйн бараа зардаг сэтгүүлийн редактор Кенжи Каваками хэмээх эр бодож олжээ. Орчуулбал чин - этгээд, догу - хэрэгсэл гэсэн утгатай. 

Кенжи Каваками нисэх онгоцны дизайнер мэргэжлээр сурч байсан ч өөрийн хүслээр сургуулиа орхисон байна. Тэрээр залуу оюутан байхдаа Маркс болон Кропоткин зэрэг анархистуудын бүтээлийг хичээлээсээ илүү сонирхон судалдаг байсан аж.

Түүнийг анархист үзэлтэй байсан учраас сургуулиасаа хасагдсан гэдэг яриа ч бас бий. Амьдралын эрхээр Каваками төрөл бүрийн ажил хийж эхэлсэн аж. 

Нэг удаа тэрээр хүүхдийн нэвтрүүлгийн редакцид ажиллаж байхдаа этгээд зүйлс хамгийн их анхаарал татдаг болохыг, гэр ахуйн бараа зардаг сэтгүүлийн редактор хийгээд хүмүүс гэрт шууд хүргэж өгдөг бол юу ч хамаагүй худалдаж авдаг гэдгийг ойлгожээ.

Үүний зэрэгцээ төрөлхийн анархист үзэлтэй Кенжи япончууд дэмий зүйлд үнэхээр их хэмжээний мөнгө зарцуулж байгаад баримдсан учраас орчин үеийн хүний хэрэгцээг шүүмжилсэн, хүнд бараг хэрэг болохооргүй этгээд бүтээлүүд гаргахаар шийджээ. 

Кенжи дараа нь бүтээлүүдээ өөрийн ажилладаг сэтгүүл дээр сурталчилж эхлэв. Тэгтэл тэрхүү хүнд бараг хэрэг болохооргүй зүйлс нь хүртэл эрэлттэй болох нь тэр. Бүр Кенжи шиг чиндогу бүтээдэг хүмүүс олноороо гарч ирсэн аж. Үүний зэрэгцээ цахим ертөнцийн ачаар дэлхий нийтээрээ эдгээр этгээд хэрэгслүүдийг сонирхож эхэлсэн байна. 

Чиндогу бүтээхэд 10 дүрмийг дагаж мөрдөх ёстой аж. 

Тэдгээр нь:

1. Чиндогу хүнд хэрэгтэй ч биш, хэрэггүй ч биш байна. 
2. Чиндогу зүгээр санаа биш бодитоор орших ёстой.
3. Чиндогу анархист үзлийн дагуу нийгэмд хэвшил болсон ойлголтыг эвддэг байна.
4. Чиндогу өдөр тутмын хэрэглээнд зориулагдсан байна.
5. Жинхэнэ чиндогуг зарж борлуулж болохгүй.
6. Чиндогуг ганцхан зугаа болгон хийж болохгүй.
7. Чиндогу ямар нэг зүйлийг шууд шүүмжилж эсвэл илэрхийлж болохгүй.
8. Чиндогу ямар нэг бүдүүлэг сэдэвтэй байж болохгүй.
9. Чиндогуг оюуны өмч болгож болохгүй. Энэ нь хүн төрөлхтөнд зориулсан бэлэг байх ёстой.
10. Чиндогу хэнийг ч ялгаварлалгүй бүгдэд зориулагдсан байна.

Каваками өөрөө чиндогугийн тухай "Японы ашиггүй 101 шинэ бүтээл", "Ашиггүй 99 шинэ бүтээл: Чиндогугийн урлаг" гэсэн хоёр ном гаргасан нь бестселлер болжээ.