Эх сурвалжийн мэдээлснээр Натан Ривз болон Сюзи Кинталь хэмээх хос өнгөрсөн зул сарын баярын үеэр Австралийн Норфолк арлаар аялж, далайд сэлж байхдаа хуримын бөгжөө санаандгүй хаячихсан байсан гэнэ. Гэвч тэд бөгжөө хуруунаас нь мултарсан болохыг бүр сүүлд нь мэдсэн учир хайж олж чадаагүй бөгөөд арал орчмын хүмүүст алтан бөгжөө гээсэн тухайгаа хэлээд явсан байжээ.

Харин усанд шумбагч Сюзан Приор далайн гүнд гэрэл зураг авч байх үедээ ер бусын зүйл олж харсан нь өнөөх "бөгжтэй" загас байв. Тэрээр загасыг харсан даруйдаа барьж авч чадаагүй ч арлын хүмүүсээс дээрх хосын талаар сонсож байснаа санаад, тэдэнтэй фейсбүүк хаягаар нь холбоо барьсан аж. Одоо залуу хос хаясан бөгжөө хаана байгааг нь олж мэдэж чадсан ч бөгжөө буцаан авахын тулд загасыг эргүүлж олох хэрэгтэй байгаа аж.

Бөгжтэй загас Сюзан Приортой таарахдаа жижигхэн байсан учир биед нь аюул учраагүй ч загас томрохын хэрээр метал түүнийг боож, аминд нь хүрэх аюултай гэнэ. Гэвч жижиг хэмжээтэй загас маш хурдан хөдөлгөөнтэй тул загасыг барих амаргүй байна гэдгийг Сюзан тайлбарласан байв.