1
Хөлний венийн судасны тромбоз
Хөлний венийн судасны тромбоз нь эмгэг судлалын хувьд дараах хэдэн онцлог шинжтэй байдаг. Эдгээр нь:
Өвчилсөн талын хөл гэнэтхэн өвдөж эхлэх нь хамгийн түгээмэл шинж тэмдэг байдаг. Зарим өвчтөнүүдэд үүнээс өөр шинж тэмдэг илрэхгүй байх нь ч бий. Ихэнх тохиолдолд өвчтөнүүдийн шилбэний булчинд маш хүчтэй өвдөлт мэдрэгддэг. Заримдаа булчин зангиралттай андуурах тохиолдол байдаг учраас хэд хэдэн янзаар оношлох нь зөв алхам байх болно.
Хэрэв таны хөлийн шагай гэнэтхэн хавдсан бол энэ нь хөлний венийн судасны тромбоз өвчний шинж тэмдэг байж болзошгүй тул анхааралтай байх хэрэгтэй. Уг шинж тэмдэг илэрсэн даруйд эмчид яаралтай үзүүлэхгүй бол тромбоз таны аль нэг амин эрхтний судсыг хаах эрсдэл үүсэхийг үгүйсгэх аргагүй юм.
Хөлний венийн судасны тромбоз өвчний үед тромбоз болсон тухайн хэсэгт улайлт үүсэх юм уу эсвэл хөхөмдөг туяа татах нь бий. Зарим тохиолдолд тухайн хэсгийн арьс хувхай цайж ч болдог.
2
Уушигны артерийн судасны тромбоз
Хөлний венийн судасны тромбоз өвчин хүндэрсэн үед уушигны артерийн судасны тромбоз болох нь түгээмэл байдаг. Энэ нь үхэлд хүргэх өндөр магадлалтай тромбозын төрөлд тооцогддог.
Уушгины цусны судас бөглөрснөөр агаар дутагдаж зүрхний цохилт түргэсдэг.
Уушгины цусны судасны бөглөрлийн үндсэн шинж тэмдэг бол ихэнхдээ цээжээр хатгуулах байдаг юм. Энэ шинж тэмдгээр бид зүрхний шигдээс болж эхэлж байгааг мэдэж болдог. Амьсгал авахын хэрээр цээжээр улам хүчтэй хатгуулж байвал уушгины цусны судасны бөглөрөл болж байна гэж оношилно.
Амьсгал авч чадахаа больж, минутанд ердөө 30-40 удаа л амьсгалж байгаа бол энэ нь уушигны цусны судасны бөглөрлийн үндсэн шинж тэмдэгүүдийн нэг мөн. Үүнээс гадна арьс хөхрөх юм уу хувхай цайх тохиолдол ч гарч болно.
Уг шинж тэмдэг нийт өвчтөнүүдийн ердөө дөрөвний нэгт нь л илэрдэг бөгөөд хүн бүрт заавал илрэх албагүй юм. Уушгины инфаркт болж байх үед цустай цэр ялгарна.
3
Чацархайн цусны судасны тромбоз
Чацархайн цусны судас нь гэдэсний бүхий л хэсгийг цусаар хангадаг бөгөөд чацархайнд тромбоз үүссэн нөхцөлд дараах хоёр шинж тэмдэг илэрдэг байна.
Чацархайн цусны судасны тромбозын үед хэсэг газрын цус багадсанаас үүдэн хэвлийн хэсгээр маш хүчтэй өвдөлт мэдрэгддэг.
Чацархайн цусны судасны тромбозын үед илэрдэг өөр нэгэн шинж тэмдэг бол дотор муухайрч, бөөлжих байдаг. Зарим тохиолдолд цустай ялгадас гарна.
Тун ноцтой үр дагавар, тэр бүү хэл үхэлд ч хүргэж мэдэх учраас дээр дурдсан шинж тэмдгүүд илэрсэн нөхцөлд хугацаа алдалгүйгээр эмчид үзүүлж, эрүүл мэндийн тусламж үйлчилгээ аваарай.
