1 АНУ-ын экс ерөнхийлөгчдийг доромжилсон

Хип хоп хөгжмийн нэг онцлог бол яахын аргагүй нийгэмд болж буй зүйлсийг өөрт төрсөн сэтгэгдлээрээ элдэв хачир нэмэлгүй шууд илэрхийлэх явдал бөгөөд реппэр Эминем ч гэсэн энэ зарчмаар уран бүтээлээ хийсээр ирсэн юм. Түүний хувьд "We Are Americans" гэх нэртэй уран бүтээлээ гаргаж байсан бөгөөд энэхүү дуунд АНУ-ын экс ерөнхийлөгчдийн тухай ёс бус үг хэллэг маш ихээр хэлэгддэг байна. Тухайлбал "Мөнгийг хараал идэг. Би үхсэн ерөнхийлөгчдийн төлөө реп хийдэггүй. Тэд үнэхээр үхсэн ч болоосой" гэх хэсэг уг дуунд байдаг ажээ. Үүнээс болж реппэр залуу золтой шоронгийн хаалга татчихаагүй юмсанж.

2 Ээж нь түүнийг шүүхэд өгч, 10 сая доллар нэхэмжилсэн

Төрсөн ээж, хүү хоёр маргалдаж, нэгнийгээ шүүхэд өгөх шиг шившигтэй хэрнээ утгагүй зүйл гэж байхгүй билээ. Тэгвэл реппэр Эминем "My Name Is" гэх дуун дээрээ ээжийгээ нэлээн хэдэн удаа хараагаад авсан бөгөөд энэ дууг сонссон ээж нь сэтгэл санааны хямралд орж, улмаар төрсөн хүүгээ шүүхэд өгч, 10 сая доллар нэхэмжилж байжээ. Харамсалтай нь түүний ээж болох хатагтай Дебби Матерс (Debbie Mathers)-ийн хүссэнээр асуудал шийдэгдээгүй бөгөөд шүүхээс Эминемийг ээждээ сэтгэл санааны хохирол учруулсныхаа төлөө 1600 доллар өгөхийг шаардсан байна.

3 Галт зэвсэг ашигласан хэргээр цагдаад баривчлагдсан

Та түүнийг үнэхээр галт зэвсэг ашигласан гэж бодож байна уу? Магадгүй гадны реппэрүүд халаасандаа гар буутай явж л байдаг шүү дээ гэж хэлж болох юм. Харин цагаан арьст реппэр маань хэсэг нөхдийн хамт дэггүйтэж явсан бөгөөд тэд автомашиныхаа цонхоор пэйнтбол (Paintball)-ийн буу гаргаж, хэд хэдэн хүн рүү буудсан юмсанж. Төд удалгүй сахилгагүй залуус цагдаад баригдсан бөгөөд Эминем найзуудынхаа автомашиныг жолоодож байсан гэдэг шалтгаанаар нэг хоног аавынд хоноод маргааш нь суллагдаж байжээ.

4 Элтон Жон (Elton John)-д тусласан

Дуу хөгжмийн амьд домог Элтон Жоныг мэдэхгүй хүн гэж бараг үгүй биз ээ. Тэрээр нэг хэсэг хар тамхинд орж, мансууруулах бодисыг их хэмжээгээр хэрэглэх болсон бөгөөд хүнд хэцүү үед нь Эминем түүний хажууд байж, жинхэнэ найзын ёсоор тусалж, дэмжиж байсан гэнэ. Түүний сайхан сэтгэл гаргах болсон шалтгаан нь цагийн сайханд реппэр залууг гэнэн томоогүй зандаа хөтлөгдөн бусадтай нийлж мансууруулах бодис хэтрүүлэн хэрэглэснээс болж, эмнэлгийн орон дээр амьсгал хураахын наахнуур байх үед нь Элтон Жон эмнэлгийн бүх зардлыг нь гаргаж, аминд нь орж байсантай салшгүй холбоотой гэнэ.

5 Амьдралынхаа турш ердөө ганц ном уншсан

Итгэх эсэх нь таны мэдэх хэрэг ч гэлээ, тэрээр амьдралынхаа туршид ердөө ганцхан ном уншсан байдаг бөгөөд уг ном нь реппэр, продюсер "LL Cool J"-ийн бичсэн "I Make My Own Rules" гэх нэртэй ном ажээ. Уг хачирхалтай баримтыг уншсан хүн бүхэнд "Тэгвэл тэр тэдгээр гайхалтай дууны үгнүүдээ яаж бичдэг болж таарч байна?" гэх асуулт гарч ирэх бөгөөд хариулт нь маш энгийн. Эминем хип хоп дуу хөгжимд хөл тавихаасаа өмнө өдөржингөө толь бичиг харж, шинэ үгнүүд цээжилдэг байсан бөгөөд энэ нь түүний уран бүтээлч сэтгэлгээнд асар их нөлөөлсөн юмсанж.

6 Оскарын шагнал гардуулах ёслолын үйл ажиллагаанд оролцохоос татгалзсан

Кино урлагийн хамгийн нэр хүндтэй шагнал болох Оскарын шагнал гардуулах ёслолын үйл ажиллагаан дээр Эминемийг ирж дуулах саналыг зохион байгуулагчдын зүгээс тавьж байсан хэдий ч, мань хүнд тавьсан санал нь таалагдаагүй учраас татгалзсан хариулт өгч байжээ. Эминем уг арга хэмжээн дээр өөрийн "Lose Yourself" дуугаа дуулах бодолтой байсан бол зохион байгуулагчдын зүгээс түүнийг өөр дуу дуулахыг шаардсан байна. Энэ нь мэдээж хэрэг өөрийнхөөрөө байх дуртай реппэр залууд таалагдаагүй нь ойлгомжтой биз ээ.

7 Хүүхэд байхдаа олон удаа зодуулсан

Түүний хүүхэд нас бусдынх шиг аз жаргал, баяр хөөрөөр дүүрэн өнгөрөөгүй бөгөөд эсрэгээрээ харгислал, хэрцгийлэл дунд өсч, хүмүүжсэн гэж хэлж болох ажээ. Бага байхдаа үргэлж бусдад дээрлэхүүлэн зодуулдаг байсан тэрээр нэг удаа бүр айхтар зодуулж, үхлийн шарх авч, амь насаа алдах аюултай нөхцөл байдалтай хүртэл нүүр тулгарч байсан байна.

8 "Elysium" кинонд тоглох дөхсөн

Нэрт реппэр маань 2013 онд нээлтээ хийж, үзэгчдийн хүртээл болж байсан "Elysium" гэх киноны гол дүрд тоглох гэж байсан хэдий ч, түүний хүсэл талаар болж, гол дүрд жүжигчин Мэтт Дэймон (Matt Damon) тоглож байжээ. Олон сая фэнүүд нь түүнийг кинонд тоглох нь хэмээн догдлон хүлээж байсан хэдий ч, тэрээр кино багийнхны тавьсан саналын хариуд "Яахав, зураг авалтыг миний өсч, төрсөн Детройт хотод хийвэл бодож, үзэж болох юм" хэмээн хэлсэн нь бүтэмжтэй болоогүй юмсанж.

9 Компьютер ашиглаж мэддэггүй

Та магадгүй "Ийм юм бичихээсээ ичихгүй байна уу?" гэж бодож байж болох юм. Гэвч тэр үнэхээр компьютер ашиглаж чаддаггүй бөгөөд тэр ч бүү хэл ухаалаг утас ч гэсэн хэрэглэж мэддэггүй гэнэ. Хамгийн сүүлийн үеийн товчлууртай "Blackberry" загварын гар утас барьдаг тэрээр үүнээсээ огтхон ч ичдэггүй бөгөөд "Намайг хүмүүс техник, тхнологи ашиглаж чаддаггүйгээр минь биш, харин хэрхэн үглэдгээр минь мэднэ" хэмээн хэлж байжээ.

10 Түүнд 3 нэр бий

Эхнийх нь мэдээж хэрэг эцэг, эхээс заяасан нэр болох Маршалл Матерс (Marshall Mathers) бөгөөд дараагийнх нь бид бүхний сайн мэдэх болсон Эминем гэх нэр билээ. Энэ нь түүний тайзны нэр бөгөөд уг нэрээр олон сая хүн түүнийг хэдийн мэдэх болсон юм. Харин сүүлийн нэр нь "Slim Shady" гэх нэр бөгөөд энэ нь түүний "D12" гэх хамтлагт уран бүтээлээ туурвиж байх үеийнх нь урлагийн нэр гэнэ. 

11 Есдүгээр ангидаа 3 удаа улирч байсан

Тийм ээ, Эминем хичээлдээ тийм ч мундаг нэгэн байгаагүй бөгөөд гэр бүлийнхнийхээ чихнээс тогтмол биш ч гэлээ, хааяа хонх уядаг байснаас гадна 9-р ангидаа 3 удаа улирч, дахин сурч байсан гэнэ. Гэвч түүнд хичээл ном зохихгүй байсныг өнөөдрийн алдар нэр, ололт амжилтанд хүрсэн явдал батлан харуулсан гэлтэй.

12 Гиннессийн амжилтын эзэн

Түүний гаргасан дуунуудаас яахын аргагүй тэсрэлт авчирч, хүн бүрийн амыг ангайлгаж, эрүүг мултлах шахаж байсан уран бүтээл бол "Rap God" гэх нэртэй дуу юм. Тэрээр уг дуундаа 1560 үг ашигласан нь "Гиннесс"-ийн рекорд амжилтын эзэн болоход хангалттай байсан бөгөөд уг дуу нь нийтдээ 6:04 минут үргэжилдгээс гадна реппэр залуу нэг секундэд 4.28 үг хэлдгээрээ өвөрмөц онцлогтой уран бүтээл болсон байна.

13 Комик номын улаан фэн

Түүний хувьд бага байхаасаа алдартай реппэр болно гэж мөрөөдөж байгаагүй бөгөөд харин хүн бүрийн унших дуртай комик ном дээрх гол дүрийн баатар болно хэмээн мөрөөддаг байжээ. Харин нэр алдарт хүрсэн Эминемийн мөрөөдөл 2009 онд биелсэн бөгөөд "Marvel"-аас түүний хүсэлтээр 'Eminem/Punisher #1" гэх нэртэй комик номыг худалдаанд гаргасан байна. Түүний "Slim Shady" гэх дүр уг комик номонд гардаг бөгөөд уг номонд "Frank Castle"-тэй нэгдэн дайснуудын эсрэг тэмцэж буй тухай өгүүлдэг ажээ.

14 "Universal Music Group"-ийг шүүхэд өгсөн

Техник, технологи хөгжиж, дэлхийн өнцөг булан бүрт интернет тархах болсон энэ үед цахим гэмт хэрэг ихээр гарах болсон билээ. Тэгвэл дэлхийд нэр алдраа түгээсэн олны танил уран бүтээлчдийн оюуны өмчөөр баталгаажсан дуунуудыг хадгалж, хамгаалалтандаа авах зорилготой "Universal Music Group"-ийн үйл ажиллагааг бүрэн гүйцэт ойлгоогүй Эминем тэднийг зөвшөөрөлгүй өөрийнх нь дуунуудыг авсан хэмээн үзэж, шүүхэд өгч байжээ. Мэдээж хэрэг шүүх түүний хүсэлтийг няцаасан бөгөөд энэ нь магадгүй түүний техник, технологийн мэдлэг муутай байсантай холбоотой байж ч болох юм.

15 Мансууруулах бодис хэрэглэдэг байсан

Түүний онгодоо оруулахдаа хэрэглэдэг байсан зүйл мансууруулах бодис байсан бөгөөд реппэр залуугийн эхний цомгийн ажлыг хариуцан ажилласан реппэр, продюсер "Dr.Dre" хүртэл энэ талаар ам нээж байсан юм. Харин Эминем энэ тухай "Music 360" дуу хөгжмийн тухай мэдээлэл хүргэдэг эх сурвалжид өгсөн ярилцлагандаа "Тийм ээ, энэ үнэн. Би онгодоо оруулахын тулд хааяа тэр зүйлийг хэрэглэдэг байсан" хэмээн хэлж байжээ.