24 Луиш Фигу - 37 сая

Португалийн хөл бөмбөгийн амьд домог Луиш Фигу 2000 онд Каталоны Барселона клубээс эзэн хааны Реал Мадрид клуб руу 37 сая фунтээр зарагдаж байсан бөгөөд Испаны Ла лигийн заналт өрсөлдөгчид нэг баг нь нөгөө багаасаа хамгийн чухал тоглогчийг нь урвуулан авч байснаараа тухайн үед олны анхааралд өртсөн үйл явдал болж байв. 

23 Хамес Родригез - 38.5 сая

Колумбын залуу авъяастан анх Португалийн Порто клубээс олны танил болж, өөрийн авъяас чадвараа нээн илрүүлж байсан бөгөөд тухайн үед эргээд сэргэн мандалтын үедээ явж байсан Францын 1 дүгээр лигийн Монако клуб түүнийг 38.5 сая фунтээр 2013 онд өөрсдийн болгож байв.

22 Алекс Тейшера - 39.3 сая

Украйны нэр төрийг олон жил нуруундаа үүрч явсан алдарт Шахтёр Донецк клуб хөл бөмбөгийн эх орон Бразил улсын тоглогчдоор багаа бүрдүүлдгээрээ зартай билээ. Тэдний нэг болох Алекс Тейшера нь Английн алдарт Челси клубтэй нэгдэх талаар хүчтэй шуум гараад байсан ч 2015 онд мөнгөөр олон тоглогчдын зодон авах болсон хятадын лиг рүү хүлгийн жолоо залсан юм. Түүнийг хятадын Жиансу Сюнинг клуб өөрсдийн болгоход 39.3 сая фунт хангалттай байв. 

21 Месүт Өзил - 42.4 сая

Оновчтой дамжуулалтын их мастер гэж хэлж болох Месүт Өзил нь эзэн хааны Реал Мадрид клубээс 2013 онд Английн Арсенал клубын эгнээнд нэгдэж байлаа. Их буучдын дасгалжуулагч Арсен Венгер эрхмийн хийж байсан наймаануудаас хамгийн нүдээ олсон наймаануудын нэгээр зүй ёсоор нэрлэгддэг байна. Турк гаралтай Германи хагас хамгаалагч 42.4 сая фунтээр Арсеналын тоглогч болж байсан юм.

20 Зинедин Зидан - 46 сая

Дэлхийн шилдэг хөл бөмбөгчин, дэлхийн аварга, европын аварга, Аваргуудын лигийн аварга, Испаны Ла лигийн аварга гээд түүний хувьд хэлээд байвал цол гуншин тасрахгүй олон байгаа биз ээ. Италийн "Хөгшин хатагтай" нар буюу Ювентус клубээс тухайн үеийн хөл бөмбөгийн наймааны рекорд үнэ болох 46 сая фунтээр эзэн хааны Реал Мадрид багийн өмсгөлийг өмсөхөөр Мадрид хотноо хүрэлцэн ирж байв. Тэрээр одоо их спортоосоо зодог тайлж, Реал мадрид клубын дасгалжуулагчаар ажиллаж байгаа билээ. 

19 Халк - 46.4 сая

Хүчирхэг биетэй, тэсрэлттэй, хаалганд бөмбөгийг цөм цохин өшиглөдөг Халкыг мэдэхгүй хөл бөмбөг сонирхогчид тун цөөхөн биз ээ. Португалийн Порто клубээс хөл бөмбөгийн кареераа мандуулж эхлэсэн тэрээр их цалин амласан багт очих дуртай нэгэн гээд хэлчихэд төдийлэн буруудахгүй болов уу. Учир нь гэвэл тухайн үед түүнийг европын бүх л акулууд сонирхож байсан ч эцсийн дүнд ОХУ-ын Зенит клубыг зорьсон юм. Зенит клубын хамтаар оросын лигт аваргалж, Европа лиг болон Аваргуудын лигт тоглосон тэрээр энэ зуны наймаагаар хятадын лигийн Шанхай СИПГ баг руу 46.4 сая фунтээр зарагдсан юм. 

18 Карлос Тевез - 47 сая

Өнөөдрийн Английн премьер лиг болон европын тавцанд хүчтэй өрсөлдөгчдийн тоонд зүй ёсоор нэрлэгдэж байгаа Манчестер Сити клуб тэртээх 2009 оноос сэргэн мандалтын эхлэлээ тавьж байсан юм. Тэрхүү эхлэлийг тавилцаж байсан олон шилдэг тоглогчдын нэг бол Аргентины шигшээ багийн болон Бока Хуниорс клубын довтлогч Карлос Тевез юм. Түүнийг тухайн үед 47 сая фунтээр Английн Манчестер хотод газардуулж байв. 

17 Анхель Ди Мариа - 49.7 сая

Хоёр жилийн хугацаанд дэлхийн хоёр ч том клубыг буурь сэлгэхдээ 49 сая фунтээс дээш мөнгөөр зарагдсан түүнээс өөр тоглогч энэ дэлхийн хаана ч байхгүй. Олд Траффордод хүссэн хэмжээндээ хангалттай сайн тоглолтыг үзүүлж чадаагүй тэрээр багаа орхиход хүрсэн бөгөөд шилдэг тоглогчдоор хүчээ зузаатгаж байсан Францын Парис Сан Жермейн клуб түүний онилж, 2015 онд өөрсдийн болгож байлаа. 

16 Фернандо Торрес - 50 сая

"Алтан жаал" хочит Фернандо Торресыг 2011 онд Челси клубын наймааны рекорд үнэ болох 50 сая фунтээр Английн алдарт Ливерпүүл клубээс Итали дасгалжуулагч Карло Анчелотти элсүүлж байлаа. Тухайн үедээ "Хотон шувуунууд"-ын бүрэлдэхүүнд гайхалтай формтой байсан түүнд 50 сая фунт зарцуулахад Челси клубын эзэн Роман Абрамович дургүйцээгүй юм. Гүүрэн дээр хангалттай сайн тоглолтыг үзүүлж чадаагүй түүний хувьд Челсигийн фанатуудад 2012 онд Аваргуудын лигийн хагас шигшээд Барселона клубын хаалганд шигтгэсэн чухал гоалаараа дурсагдсаар байх биз ээ.

15 Давид Луиз - 50 сая

Челси клубын амжилттай улирлуудын хамгийн чухал зэвсгүүдийн нэг байсан Давид Луиз хамгаалалтын гол ноён нурууг багийн ахлагч Жон Территэй хамт авч явж байлаа. Гэсэн ч Стэмфорд Брижд эргэн ирсэн Португаль менежер "Онцгой нэгэн" хочит Жозе Моуриньо түүнийг Францын аваргуудад 50 сая фунтээр зарахыг зөвшөөрсөн юм. Тухайн үедээ энэхүү наймаа нь дэлхийн хамгийн үнэтэй хамгаалагч гэсэн алдар нэрийг Давид Луизд авчирч байсан юм.

14 Жон Стоунз - 50 сая

Английн өсөх ирээдүйтэй, залуу авъяастан гэгдэх болсон Жон Стоунзыг Этихад цэнгэлдэх хүрээлэнд 50 сая фунтээр авчрахад хүргэсэн эрхэм бол энэ жилээс Манчестер Сити багийн жолоог атгах болсон Пеп Гуардиола байсан юм. Өнгөрсөн жилийн турш Лондонгийн Челси түүнийг авах гэж хичээсэн ч Эвертон клубтэй тохиролцож чадахгүй байсаар энэ зуныг хүргээд байсан билээ. 

13 Радамел Фалкао - 51 сая

Испаны Ла лигийн Атлетико Мадрид клубыг хөл бөмбөгийн зах зээлд хамгийн шилдэг гэсэн довтлогчдыг төрөн гаргадаг гэсэн нэр алдар дагах болсоор удаж байгаа билээ. Тэдгээр төрөн гарсан шилгүүдийн нэг бол яах аргагүй Колумбын шигшээ багийн довтлогч Радамел Фалкао юм. Атлетико Мадридыг Европа лигт түрүүлэхэд түүний оруулсан хувь нэмэр асар их байснаас гадна тэрээр хэр хэмжээний тоглогч вэ гэдгээ дэлхий нийтэд харуулсан юм. Тэр ч үүднээсээ түүнийг тухайн үедээ хөрөнгөжөөд байсан Монако клуб 51 сая фунтээр өөрсдийн болгож байлаа. Харин энэ үеэс л түүний кареер бага багаар уруудсан бөгөөд удалгүй Английн Манчестер Юнайтед клуб түүнийг авсан ч идээшиж өгөлгүй байсаар Челси клубт зарагдаж, гүүрэн дээр банз халаасаар энэ зун хуучин баг болох Монако руу буцсан билээ. 

12 Рахим Стерлинг - 55.2 сая

Ливерпүүлд гялалзтал тоглож байсан түүнээс асар их ирээдүйг европын акулууд олж харж байснаас тэдний өрсөлдөгчид болох Манчестер Сити түүний гэрээг 55.2 сая фунтээр өнгөрсөн жил худалдан авсан билээ. Гэмтэл бэртэл ороож, олигтой сайн тоглолтыг үзүүлэхгүй байсан тэрээр энэ жилээс шинэ дасгалжуулагч болох Пеп Гуардиолагийн удирдлага дор илүү сайжирч, формоо олж авна гэсэн таамгийг хөл бөмбөгийн экспертүүдийн зүгээс дэвшүүлээд байгаа юм. 

11 Эдинсон кавани - 55 сая

2013 онд Италийн Наполи клубыг орхиж, баян эзэнтэй болоод байсан ПСЖ клуб руу хүлгийн жолоо залсан эрхэм бол өнөө цөгийн хөл бөмбөгийн довтлогчдын өнгийг тодорхойлж буй цөөн хэдэн довтлогчдын нэг болох Эдинсон Кавани байсан юм. Түүний энэхүү шилжилт хөдөлгөөн нь түүнийг Уругвайн хамгийн үнэтэй хоёр хөл бөмбөгчний нэг болгожээ.

Кевин Де Бройн - 55 сая

Гүүрэн дээр эргэн ирээд байсан Жозе Моуриньод төдийлэн таалагдаагүй Кевин Де Бройныг 2015 онд Англид 55 сая фунтээр түүний өрсөлдөгч багийн тоглогчийн дүрээр эргэн ирнэ гэж хэн санах билээ. Бельгийн шигшээ багийн шижигнэсэн залуучуудын нэг тэрээр Манчестер Сити багийн гол тоглогчдын нэг хэдий нь болоод байгаа билээ. 

10 Кака - 56 сая

Рикардо Изексон дос Сантос Лэйтэ буюу хөл бөмбөг сонирхогчдын хамгийн хайртай тоглогчдын нэг Какагийн Европ тивийн хөл бөмбөгийг донсолгож явсан цаг саяхан мэт санагдах ч тэр одоо аль хэдийнээ 34 насыг зоогложээ. АНУ-ын мэргэжлийн хөл бөмбөгийн лигийн Орландо Сити багт тоглож буй тэрээр 2009 онд дуулиан шуугиантайгаар эзэн хааны Реал Мадрид клубт нэгдэж байсан ч хөл бөмбөг сонирхогчдын хүсэн хүлээж байсан амжилтыг үзүүлж хараахан чадаагүй юм. 

9 Златан Ибрагимович - 59 сая

Энэ цаг үеийн хамгийн шилдэг довтлогч болох Златан Ибрагимович нь Интер, Милан,  Аяакс, Ювентус, Барселона гээд европын бүх л акулуудад тоглосон нэгэн билээ. Төрмөл авъяастан Златаныг 2009 онд Италийн Интер клубээс Каталоны Барселона клуб худалдаж авч байсан юм. Худалдаж авахдаа тухайн үеийн шилдэг довтлогчды нэг байсан Камеруны шигшээ багийн ахлагч Самуэл Это'o + 40 сая фунт гэсэн саналаар худалдаж авч байсан гэхээр Ибракадабраг хэр хэмжээний тоглогч гэдгийг бэлхнээ харуулж байгаа биз ээ. 

8 Анхель Ди Мариа - 59.7 сая

Аргентины шилдэг тоглогчдын нэг Анхель Ди Мариа Реал Мадрид клубт нэг л сайн идээшиж өгөхгүй байсаар Испаны эзэн хааны багийг 2014 онд орхиж байсан билээ. Түүний дараагийн зогсоол "Улаан Чөтгөрүүд" болох Манчестер Юнайтед байв. Түүний энэхүү шилжилт хөдөлгөөнийг 59.7 сая фунтээр шийдвэрлэж байсан бөгөөд Олд Траффорд түүний байх ёстой газар нь байгаагүй юм. 

7 Хамес Родригез - 63 сая

2014 онд Бразил улсад болсон хөл бөмбөгийн ДАШТ-нээр тодрон гарсан оддын нэг болох Хамес Родригезыг Испаны акул Реал Мадрид овоо хараандаа авсан байсан бөгөөд ДАШТ өндөрлөмөгц түүний наймааг 63 сая фунтээр жинхлэсэн юм. Өнгөрсөн жил сэлгээний сандлаас тоглолтонд оролцох болсон тэрээ энэ зун багаа охих магадлалтай шилдэг тоглогчды нэгээр нэрлэгдээд байгаа юм. Түүнийг Английн акулууд болох Челси, МАНЮ зэрэг клубууд сонирхож байгаа билээ.

6 Неймар - 71.5 сая

Нэймар да Силва Сантос Жуниор буюу Бразилын супер од Нэймарыг Бразилын Сантос клубээс Испаны Каталоны Браселона клуб 2013 онд өөрсдийн болгосон билээ. Месси, Роналдо зэрэг дэлхийн шилдгүүдтэй харьцуулагдах болсон түүний хувьд энэ цаг дор нутаг дээрээ зохион байгуулагдаж байгаа зуны 31 дүгээр Олимпын их наадмын хөл бөмбөгийн төрөлд Бразилын шигшээ багийн хамтаар Германы шигшээ багтай аваргын алтан медалийн төлөө тоглохоор шалгараад байгаа билээ. Сонирхуулахад Бразил улс нь хөл бөмбөгийн агуу орон хэдий ч Олимпын их наадмын хөл бөмбөгийн төрөлд нэг ч удаа аваргалж байгаагүй ажээ. 

5 Луис Суарез - 75 сая

Дэггүй зантай ч, дэлхийн шилдгүүдийн нэг гэдгээ батласаар байгаа Уругвай довтлогч 2014 онд Ливерпүүлд үзүүлсэн шилдэг тоглолтынхоо үр дүнд 75 сая фунтын үнэ хүрсэн юм. Түүнийг элсүүлсэн Барселона клуб өнөөдөр дэлхийн хамгийн шилдэг гурвал болох Месси, Суарез, Нэймар гэсэн довтолгооны шугамыг урдаа бий болгоод байгаа билээ. 

4 Гонзало Игуайн - 75.3 сая

Энэ зун нэгэн сонирхолтой наймаа болсон нь Италийн Наполи клубээс Аргентин довтлогч Гонзало Игуайн хуучин багийнхаа заналт өрсөлдөгч Ювентусын эгнээнд нэгдсэн явдал байв. Түүний хувьд өнгөрсөн улирлын Италийн Сери А лигт 36 гоалыг оруулж мэргэн бууч болоод байсан билээ. 

3 Криштиано Роналдо - 83.7 сая

Дэлхийн шилдэг хөл бөмбөгчин Кришиано Роналдогийн хувьд маргахын аргагүй энэ цагийн үеийн хамгийн шилдэг тоглогчдын нэг билээ. Португалийн Спортинг клубээс нэгэн гоц авъяастныг Сер Алекс Фергусон олж харан Манчестер хотод авчирсан нь хожмын өдөр дэлхийн супер од болно гэж хэн мэдэх билээ. Манчестерт өнгөрүүлсэн амжилттай кареераа өндөрлүүлж, 2009 онд эзэн хааны багийг зорьж байсан тэрээр Мадрид хотод ирээгүй удаад байсан "Дэлдэн чихт" буюу Аваргуудын лигийн цомыг авчирсан нэгэн билээ. Саяхан болж өнгөрсөн Евро 2016 Европ тивийн хөл бөмбөгийн АШТ-нд Португалийн шигшээ багийн хамтаар түрүүлсэн түүнийг 2016 оны дэлхийн шилдэг хөл бөмбөгчин болно хэмээн олон хүмүүс таамаглаад байгаа юм. 

2 Гарет Бэйл - 85.3 сая

Английн Тоттенхэм клубийн зүүн жигүүрийн хамгаалагчаар тоглодог байсан тэрээр зүүн жигүүрийн хагас дээр тоглож, улмаар энэ цагийг эзлэсэн, хамгийн хурдтай довтлогчдийн нэг болтлоо өсч дэвшсэн юм. Хурд, тэсрэлт, техник гээд авъяас чадвар ихтэй түүнийг 2013 оны зун Реал Мадрид клуб дэлхийн рекорд үнээр өөрсдийн болгосон билээ. 

1 Пол Погба - 89 сая

Энэ зуны солилцоо наймааны цонхоор 2013 оноос хойш эвдэгдээгүй байсан солилцоо наймааны дэлхийн рекорд үнэ өөрчлөгдөх жамтай байжээ. 89 сая фунтээр үнэлэгдэн Францын шигшээ багийн хагас хамгаалагч Пол Погба төрөлх баг болох Манчестер Юнайтедэд ирсэн юм. Түүнийг анх Манчестер Юнайтед клуб төлөвлөгөөндөө багтаалгүй багаасаа явуулж байсан ч, ийнхүү рекорд үнээр Италийн Ювентус клубээс өөрсдийн болгоод байгаа билээ.