1 Толбо арилгах

Та 2 литр усыг томхон саванд хийж буцалгаарай. Үүндээ 3 ширхэг нимбэгний шүүс, 1 халбага давс, аяганы дөрөвний нэг хэмжээтэй угаалгын нунтаг хийнэ. Харин дараа нь буцалж буй усандаа цагаан өнгийн хувцсаа хийж, 40 минут байлгаарай. Товлосон цаг болмогц хувцсаа гаргаж, цэвэр усанд зайлж хатаана. 

2 Шарласан толбыг цайруулах

Халбага хүнсний содыг толботой хэсэг асгаж, дээрээс нь хэрчсэн тал нимбэгээр сайтар үрж орхино. Үүнийгээ 15 минут байлгасны дараа бүлээн усанд хийж угаах юм. 

3 Цайруулах

2 зүсэм нимбэгэн дээр 1 литр буцалсан ус хийгээрэй. Үүндээ хувцсаа хийж, 40 минут байлгахад  хангалттай. Цагаан хувцсаа уснаас гаргаж аваад угаалгын машинд угааж цэвэрлэнэ. 

4 Өнгийг сэргээнэ

Аяганы дөрөвний нэг хэмжээтэй угаалгын нунтагыг аяганы дөрөвний нэг устөрөгчийн хэт исэл болон 2 литр бүлээн устай хольж бэлтгэнэ. Мэдээж үүндээ хувцсаа хийж, 30 минут байлгах бөгөөд дараа нь цэвэр усаар зайлж аваарай. 

5 Хүчтэй цайруулагч

Ингэхдээ та аяганы дөрөвний нэг ус төрөгчийн хэт исэл, 4 дусал аммиакыг 1 литр усанд хийнэ. Үүндээ хувцсаа 10 минут байлгахад л гайхалтай өнгө орох бөгөөд мэдээж дараа нь цэвэр усаар сайтар зайлаарай. Энэ нь бусад цайруулах аргуудыг бодвол тун хүчтэй тул хэрэглэхдээ бээлий өмсөх ёстой аж. 

6 Зөөлрүүлж, цайруулна

Та өнгө алдсан цагаан хувцсаа 1 литр, тал аяга цагаан цуутай усанд хийж, 40 минут байлгах ёстой. Энэ нь таны хувцсыг цайруулж, өнгийг нь сэргээгээд зогсохгүй зөөлрүүлдэг байна. 

7 Хөвөн даавуун эдлэл

Хөвөн даавуун эдлэл болох өнгөө алдсан ор хөнжлийн даавуу зэргээ нэг хувин гашилсан сүүнд хийж, 1-2 цаг байлгаарай. Дараа нь зориулалтын дагуу угаах бөгөөд та даавуугаа хичнээн сайхан өнгө орж, зөөлөн болсныг анзаарах болно.