Хийх арга:
Мэдээж пицца хийхэд хамгийн эхний бөгөөд чухал алхам бол гурилаа тааруулж хөөлгөх, зуурах юм. Хөөлгөгч, элсэн чихэр, давс, өндөг, бага зэргийн ургамлын тос хийгээд гурилаа зуурна. Гурилаа зуурахдаа та хатуу ч биш, зөөлөн ч биш зуурах хэрэгтэйг санаарай. Ойролцоогоор 30 минут орчим зуурсан гурилаа амраана. Мэдээж гурил маань тодорхой хугацааны дараа бага зэрэг хөөсөн байх болно. Дараа нь, листнийхээ хэмжээгээр гурилаа элдэж, жигд тарааж тавина. 

Одоо харин гурилныхаа ирмэг дээр бяслагаа уртаар нь зүсэж тавиарай. Бяслагаа ирмэгнийхээ гурилаар хучиж, битүүлээд, тус бүрд нь 3-4 см байхаар тооцож хутгаар зүснэ. Магадгүй танд ойлгомжгүй байвал бичлэг дээр байгаа шиг дагаад хийхэд л болно шүү.

Гурилан дээрээ пастагаа түрхэж, дээрээс нь мах, хиам, чинжүү гэх мэт өөрийн дуртай бүх л зүйлээ хийж болно. Хамгийн сүүлд нь үрсэн бяслагаа дээр нь тарааж өгнө. Ингээд гурилаа алтан шаргал өнгөтэй болтол нь буюу 200-230 градуст 12-13 минут жигнэх хэрэгтэй. Үнэхээр амттай бөгөөд хийхэд ч амархан шүү.