Гэсэн хэдий ч нийт өрхийн 27 хувь нь төвлөрсөн усан хангамж бүхий орон сууцны хороололд, 73 хувь нь гэр хороололд амьдарч, хүн амын 27% ядуу, агаарын болон хөрсний бохирдол их байдаг нь хүн амын эрүүл мэндийн байдалд сөргөөр нөлөөлж олон тулгамдсан асуудлуудыг бий болгож байна.
Жилд дунджаар 11000 орчин хүн шилжин ирж байгаа нь хүн амын амжиргааны байдалд, дүүргийн эдийн засгийн хөгжилд нөлөөлж байна. Үүнтэй холбоотой иргэдийн эрүүл мэндийн байдалд олон тулгамдсан асуудал үүсч байдаг. Агаарын бохирдлоос шалтгаалсан амьсгалын замын өвчлөл хүн амын өвчлөлийн тэргүүлэх шалтгаан болж хүүхдийн өвчлөл эндэгдлийн гол шалтгаан нь амьсгалын замын өвчлөл болон гажиг хөгжил тэргүүлж байна. Жил бүр өсч байгаа хүн амын эрүүл мэндийн хэрэгцээнд өнөөдрийн байгаа эрүүл мэндийн байгууллагын нөөц хүрэлцэхгүй байгаа нь тусламж үйлчилгээний чанар хүртээмжид сөргөөр нөлөөлж байна. Эдгээр асуудлыг шийдвэрлэх зорилгоор Сонгинохайрхан дүүрэг нь эрүүл мэндийн түншлэгч байгууллагуудын дэмжлэгтэйгээр эрүүл мэндийн тогтолцоог бэхжүүлэх санаачлагыг туршин хэрэгжүүлэх загвар дүүрэг болох стратегийг боловсруулан хэрэгжүүлэх гэж байна. Энэхүү “Сонгинохайрхан дүүрэгт эрүүл мэндийн тогтолцоог бэхжүүлэх” стратегийг 2014-2016 онд 3-н жилийн хугацаатай хэрэгжүүлэх юм.
Стратегийн зорилго нь төрийн болон төрийн бус байгууллагууд хувийн хэвшлийн эрүүл мэндийн байгууллагууд, хөгжлийн түнш байгууллагуудын хамтын ажиллагаа оролцоотойгоор Сонгинохайрхан дүүргийн эрүүл мэндийн тогтолцоог бэхжүүлэх ба хүн амын эрүүл мэнд амьдралын чанарыг дээшлүүлэхэд чиглэгдсэн бөгөөд стратегийн төлөвлөгөөнд 6 тэргүүлэх зорилтыг дэвшүүлсэн.
Үүнд:
1. Хүн амын дунд зонхилон тохиолдох халдварт бус өвчин, осол гэмтлээс шалтгаалсан өвчлөл, нас баралтыг бууруулах, сэтгэцийн эрүүл мэндийг дэмжих орчин бүрдүүлэх
2. Хүн амын дунд тэргүүлэх халдварт өвчний тохиолдол, тархалт, нас баралтын түвшинг бууруулах
3. Эх хүүхдийн эрүүл мэндийн тусламж үйлчилгээний хүртээмж, чанарыг сайжруулах
4. Орчны эрүүл мэндийн эрсдэлт хүчин зүйлсийг бууруулах
5. Эрүүл мэндийн удирдлага, санхүүжилт, хүний нөөцийн төлөвлөлт, мэдээллийн тогтолцоо, хамтын ажиллагааг сайжруулах
6. Эмийн хангамж, зохистой хэрэглээ, лаборатори, тусламж үйлчилгээний чанар дэд бүтцийг сайжруулах зэргийг багтаасан байна.
Энэ стратегийг хэрэгжүүлснээр бусад дүүрэгт хэрэгжүүлэх загвар болох юм
2014-2016 онд “Сонгинохайрхан дүүргийн Эрүүл мэндийн тогтолцоог бэхжүүлэх” стратеги нь Эрүүл онд мэнд Спортын яам, Нийслэлийн эрүүл мэндийн газар, Сонгинохайрхан дүүргийн Засаг даргын тамгын газар, Дүүргийн эрүүл мэндийн төв, Нэгдсэн эмнэлэг, Өрхийн эрүүл мэндийн төвүүд, Дэлхийн эрүүл мэндийн байгууллага, Азийн хөгжлийн банк, Дэлхийн зөн олон улсын байгууллага болон бусад олон улсын байгууллага, төрийн болон төрийн бус байгууллагууд хамтран хэрэгжүүлэн ажиллахад ашиглагдах үндсэн баримт бичиг учир өнөөдөр энэхүү стратегийг батлахаар тэргүүлэн оролцогч 5-н байгууллагын төлөөлөл уг стратегийг үзэглэх ёслолын ажиллагаа боллоо.
Стратегийг Эрүүл мэнд Спортын яамны дэд сайд Д.Атармаа, НЭМГ-ийн дарга Ш.Энхбат, Сонгинохайрхан дүүргийн Засаг дарга М.Чинболд, Сонгинохайрхан дүүргийн эрүүл мэндийн төвийн дарга Ш.Хажидмаа, Дэлхийн эрүүл мэндийн байгууллагын Монгол дахь суурин төлөөлөгч Су Нюунт-У нар үзэглэлээ.
