Энэ өдрийг хэзээ ч бүү март!

Энэ өдрийг хэзээ ч бүү март! - День Победы

2012-05-09, 21:03

30,826

Дэлхийн түүхэнд хар толбо болон үлдсэн 1945 оны дайнд ялалт байгуулж, Нацист Германы армийг бут цохисон Зөвлөлтийн цэргүүдийн гэгээн дурсгалыг хүндэтгэдэг уламжлалтай “Ялалтын баяр” (День Победы / Victory Day) –ын өдрийн мэндийг Та бүхэндээ хүргэе. Жил бүрийн 5-р сарын 9-нд “Улаан талбай” дээр цэргийн сүрт жагсаал болж, хуучин зөвлөлтийн холбоотон байсан улс орнууд бүх нийтийн амралтын өдрийг зарладаг нь зүгээр ч нэг тохиолдол биш ээ. Дэлхий дахиныг атгандаа оруулахыг санаархаж, үндэстнээр ялгаварлан гадуурхаж, харгис хэрцгийгээр олон сая ард иргэдийг хомроголон хөнөөж байсан Германы дэглэмийг үгүй хийн, Дэлхий дахины айдас хүйдсийг үгүй болгосон энх тайвны өдөр өнөөдөр тохиож байна.

Энэ өдрийг хэзээ ч бүү март! - День Победы

Зураг. Зөвлөлтийн арми Берлинд ялалтын Тугаа мандуулж байна.

Магадгүй энэ өдрийг үр хойч нь бахархал, хүндэтгэл, омогшлоор дүүрэн тэмдэглэж өнгөрүүлээсэй гэсэндээ тэр үеийн сая сая эрс дайны талбарт халуун цусаа урсгасан биз ээ. Сая сая эрсийн цаана сая сая бүсгүйчүүд Үрсээ аргадан, нулимсаа нуун үлдсэн юм. Германтай хавсарч, Орос гүрний сүр хүчийг дорнод зүгээс мохоох гэж санаархсан Японы цэргүүдийг ч тэр үед Халхын голын эрэг дээр Монголын хөвгүүд нам дарсан юм.

Эх орны дайны үед өлгий нутгаасаа амиа харамлаагүй Цэрэг бүрийн төлөө, үсээ цайтал хүлээсэн Эх бүрийн төлөө, өврөө хоослуулсан Гэргий бүрийн төлөө, өнчирч үлдсэн Хүүхэд бүрийн төлөө 5-р сарын 9-ний өдрийг хүндэтгэл дүүрэн өнгөрүүлээрэй Монголчууд минь.