1 Хятад улс “Covid-19”-ийн амьсгалын замын вакциныг зөвшөөрөв

Хятад улс “Covid-19”-ийн амьсгалын замын вакциныг зөвшөөрсөн анхны орон боллоо.

“CanSino”-д үйлдвэрлэсэн вакцин нь булчинд тарьдаг вакцинтайгаа төстэй найрлагатай. Амьсгалын замаар ашиглах вакцин биед хоргүй аденовирусыг вирустай хэрхэн тэмцэхийг заадаг генетикийн кодыг тээвэрлэгч болгон ашигладаг.

Нарийн ширхэгтэй амьсгалдаг "Convidecia Air” вакцин нь нэг удаагийн хэрэглээний дараа сайн хамгаалалт өгч чадна гэж компани мэдэгдэв.

2 Сөүл Токиотой батлан ​​хамгаалахын дээд хэмжээний хэлэлцээ хийнэ

Өмнөд Солонгос, Японы батлан ​​хамгаалах салбарын ахлах албан тушаалтнууд Сөүлд уулзана гэж Өмнөд Солонгосын Батлан хамгаалах яам мэдэгдэв. Тус уулзалт нь сүүлийн зургаан жилийн дараа болж буй анхны уулзалт болох юм.

Өмнөд Солонгосын Батлан ​​хамгаалахын дэд сайд Шин Беом Чул, Японы Олон улсын асуудал эрхэлсэн дэд сайд Масами Ока нар Сөүлийн батлан ​​хамгаалахын яриа хэлэлцээний хүрээнд хэлэлцээ хийх аж.

3 Их Британийн шинэ Ерөнхий сайд тодорлоо

Их Британийн дуулиант Ерөнхий сайд Борис Жонсоны залгамжлагчаар Лиз Трасс тодорлоо. 47 настай Лиз Трасс гадаад хэргийн сайдын алба хашиж байсан бөгөөд Ерөнхий сайдад нэр дэвших нь тодорхой байв. Тэрбээр Сангийн сайд Риши Сунактай өрсөлдөж, 57:43 харьцаатай ялалт байгуулжээ.

Өвлийн эрчим хүчний хямрал, ажил хаялт, эдийн засгийн уналт зэрэг олон асуудлыг тэр өвлөн авч байна. Хоёр сарын турш үргэлжилсэн сунгаанд  эдгээр асуудал үндсэндээ яригдаагүй юм.

4 Ши Жиньпин Казахстанд айлчилна

"Хятадын дарга Ши Жиньпин есдүгээр сарын 14-нд Нур-султанд айлчилна" гэж Казахстаны Гадаад хэргийн яам өчигдөр мэдэгдэв. Тэрбээр Казахстаны Ерөнхийлөгч Касым-Жомарт Токаевтай уулзаж, хоёр талын хэд хэдэн баримт бичигт гарын үсэг зурна гэж яамны хэвлэлийн төлөөлөгч Айбек Смадияров хэвлэлийн бага хурал дээр мэдэгдлээ.

Ши Жиньпины Казахстанд хийх айлчлалыг Бээжин батлаагүй бөгөөд Хятадын Гадаад хэргийн яам тайлбар өгөх хүсэлтэд хариу өгөөгүй байна.

5 Кабул: Оросын элчин сайдын яамны ажилтнууд амь үрэгджээ

Афганистаны нийслэл Кабулд амиа золиослогч этгээд бөмбөг дэлбэлжээ. "Амь үрэгдсэн зургаан хүний ​​дотор Оросын Элчин сайдын яамны хоёр ажилтан байсан" гэж Орос болон Талибан хөдөлгөөний албаныхан мэдэгдэв.

Халдлага үйлдэгчийг консулын газрын үүдэнд ойртож байх үед харуулууд буудан хөнөөсөн гэж албаны хүмүүс мэдэгдэв. Өөр хэд хэдэн хүн шархадсан гэх мэдээлэл байна.  Энэхүү халдлага 2021 оны наймдугаар сард Талибанчууд засгийн эрхэнд гарснаас хойш Афганистан дахь гадаадын төлөөлөгчийн газарт хийсэн анхны халдлага юм.

6 НҮБ: Аун Сан Су Чигийн эрүүл мэндэд санаа зовж байна

НҮБ-ын Мьянмарын асуудал эрхэлсэн тусгай элч Ноэлин Хейзер 2021 оны хоёрдугаар сард төрийн эргэлт хийж, цэргийнхэн албан тушаалаас нь огцруулснаас хойш хоригдож байгаа Мьянмарын удирдагч Аун Сан Су Чигийн эрүүл мэндийн байдалд маш их санаа зовж байгаагаа мэдэгдлээ. Элч хоригдож буй Су Читэй  уулзахгүй бол Мьянмар руу дахиж очихгүй гэв.

7 Хойд Солонгос руу Өмнөдөөс дахин агаарын бөмбөлөг орж ирэв

Хойд Солонгост Covid-19 дэгдсэн шалтгаан нь Өмнөдөөс илгээсэн агаарын бөмбөлгөөс болсон гэж тэд үздэг. Гэтэл Умардын анхааруулгыг үл тоон Өмнөдөөс дахин агаарын бөмбөлгүүд орж иржээ. Тодруулбал Covid-19-ийн тусламжийн бүтээгдэхүүн, Хойд Солонгосын эсрэг сурталчилгаа бүхий ачаатай агаарын бөмбөлгүүд хоёр Солонгосын хурцадмал хилээр дамжин өнгөрсөн байна.

8 Чех улсад Европын холбоо, НАТО-г эсэргүүцсэн жагсаал болж байна

Чех улсад Засгийн газар, Европын холбоо, НАТО-г эсэргүүцсэн жагсаал өрнөж 70 мянган хүн оролцжээ. Праг хотын гудамж дахь жагсагчид эрчим хүчний үнийг хяналтдаа байлгахыг эрх баригчдад уриалсан. Мөн Европын холбоо, НАТО-г эсэргүүцэж буйгаа илэрхийлжээ. Жагсагчид төв Европын улсууд цэргийн тал дээр төвийг сахих хэрэгтэй гэж үзэж байна.

Жагсаалд оролцогчдын зарим нь Чехийн Коммунист намынхан байсан бол зарим нь цагаачдын эсрэг популист нам болох Эрх чөлөө ба шууд ардчилал намын гишүүд аж. Тэд Ерөнхий сайд Петр Фиалаг огцрохыг шаардаж, түүний эвслийн Засгийн газрыг хэд хэдэн асуудлаар шүүмжилсэн.

9 АНУ-аас Тайваньд 1.1 тэрбум ам.долларын зэвсэг худалдах хэлцлийг зөвшөөрчээ

Тайваньд 1.1 тэрбум ам.долларын өртөгтэй зэвсэг хэрэгсэл худалдах тухай хэлцлийг АНУ-ын Төрийн департамент баталжээ. Төлөөлөгчдийн танхимын дарга Нэнси Пелосийн айлчлалаас хойш Хятад улстай харилцаа нь эрс хурцадмал байгаа үед Вашингтон ийм алхам хийж байгааг олон улсын хэвлэлүүд онцолж байна.

Дээрх шийдвэрийг зарласан Пентагоны бүтцэд багтдаг Батлан хамгаалах хамтын ажиллагааны агентлаг тус хэлцлийг “Тайваний аюулгүй байдалд зайлшгүй шаардлагатай юм гэж тэмдэглээд, үүнээс шалтгаалж бүс нутгийн цэргийн тэнцвэртэй байдалд өөрчлөлт орохгүй” гэж мэдэгдсэн байна.

10 Ирэх өвөл коронавирусний “цоо шинэ” хувилбарууд дэгдэж болзошгүйг анхааруулжээ

Энэ намар болон өвөл коронавирусний халдварын шинэ давлагаа эрчимжиж болзошгүй гэдэг болгоомжлолын улмаас Европын Холбооны зүгээс ковидын эсрэг вакцины давтан тунгуудад иргэдээ аль болох түргэн хамруулж эхлэхийг уриалжээ.

Үүний өмнөхөн, Европын холбооны эм бэлдмэлийн агентлаг омикрон хувилбараас хамгаалах үйлчлэл бүхий Модерна, Biontech Файзер вакцинуудын нэмэлт тунг батламжилсан юм.

“Энэ зуны туршид өвчний дэгдэлт саарахгүй байсан нь цар тахал дуусаагүй гэдгийн хангалттай нотолгоо болсон” гэдгийг Европын холбооны эрүүл мэндийн гүйцэтгэх байгууллагаас сануулжээ. Хүйтэн сэрүүний улирал ойртсон, мөн сургуулиудын хичээл орсонтой холбоотойгоор вирусний тархалт нэмэгдэх эрсдэл нэмэгдсэн.