1 Хамди Хафез аль-Нуби

Хамди Хафез аль-Нуби нь Египтэд зөөгчөөр ажиллаж байжээ. Ийнхүү ажлаа хийж байхдаа аль-Нуби гэнэтхэн зүрхний шигдээс өвчнөөр нас барсан байна. Залуугийн гэр бүл түүнийг усанд оруулж, лалын шашинтны журмаар орой оршуулахаар бэлдэж байсан аж. Хамдид нас барсны гэрчилгээг авахын тулд тэд гэртээ эмч дуудсан бөгөөд эмч үзлэг хийж түүнийг амьд байгааг тогтоосон байна. Ингээд аз жаргалаар бялхсан гэр бүл оршуулгын ёслолыг цуцлалгүйгээр амьд гарсны баяр болгож тэмдэглэсэн гэнэ. Энэхүү үйл явдал 2012 онд Хамдиг 28 настай байхад тохиолджээ.

2 Людмила Стеблицкая

2011 оны 11 сард 61 настай Людмила Стеблицкая эмч нарыг нас барсан хэмээн тогтоосны дараа дахин амь оржээ. Тэрээр моорогт 3 хоносны дараа сэрсэн байна.

Тэтгэврийн насны эмэгтэйн эрүүл мэндийн байдал таагүй байсан учир түүнийг Томскийн эмнэлэгт хүргэсэн бөгөөд тэрээр хэд хоногийг эмнэлэгт өнгөрүүлжээ. Баасан гараг Людмилагийн охин Анастасия эмч рүү залгаж ээжийнхээ биеийн байдлыг асуухад эмч нар ээжийг нь нас барсан гэх таагүй мэдээг бүсгүйд дуулгасан байна. Анастасия оршуулгын ажилд бэлдэж, даваа гарагт ээжийнхээ цогцсыг авахаар эмнэлэг очжээ. Гэвч задлан шинжилгээ хийх хэрэгтэй учир бүсгүйг хэд хоног хүлээхийг эмч нар хүссэн байна. Харин хэсэг хугацааны дараа айдаст автсан эмч Анастасия дээр очиж “Ээж тань нас бараагүй, амьд байна” гэсэн аж. Людмила юу ч санахгүй байсан бөгөөд эмнэлэгт хэвтэж байгаад нэг өглөө маш хүйтэн мооргийн өрөөнд сэрснээ л санасан байна.

3 Брайтон Дама Занте

Зимбабвын иргэн Брайтон Дама Занте 34 насандаа нас баржээ. Түүний биеийг хөнжилд боож, моорог руу аваачсан байна. Дараагийн өдөр нь Брайтоны гэрт нас барсан залуутай салах ёс гүйцэтгэхээр найз нөхөд, ойр дотныхон хүмүүс ирсэн аж.

Зантегийн авсны хажууд найз нөхөд болон хамаатан садангууд нь цуглах үед Зантегийн хөл гэнэтхэн хөдөлжээ. Энэхүү үйл явдлыг түүний дарга Лот Гака анх ажигласан байна. Оршуулгын ёслолд ирсэн хүмүүс нас барсан залуугийн биед муу ёрын сүнс шүглэсэн гэдэгт итгэн айдаст автаж зугтсан байна. Азаар удалгүй тайвширч чадсан хүмүүс Зантег Гверд дахь эмнэлэгт хүргэж, амьсгалын аппарат залгасан аж. 2 хоногийн дараа залуу хэвийн байдалдаа эргэн оржээ. Занте мөн л юу ч санахгүй байсан бөгөөд дахин амьдрах болсондоо ихээхэн баяртай байжээ. 

4 Мандло

Зимбабвын биеэ үнэлэгч Мандло 2013 онд үйлчлүүлэгчтэй хамт байхдаа “Манор” зочид буудалд нас барсан юм. Ингээд тусгай албаныхан ирж, бүсгүйг авсанд хийх мөчид тэрээр “Та нар намайг алахыг хүсэж байна” гэж хэлсээр сэргэсэн байна. Гэрчүүд айдаст автаж зугтжээ. Албаны хүмүүс энэхүү үйл явдлыг жинхэнэ ид шид мэт хүлээж авсан юм. Учир нь тэд Мандлог нас барсан гэдэгт бүрэн итгэлтэй байсан аж. Түүний үхэлд буруутай хүн хэргийн газраас зугтсан байсан. Харин цагдаа нар бүсгүйг ухаан орсны дараа гэрт нь хүргэж өгсөн байна.  

5 Тони Яхле

Америкийн Охайо мужийн автомашины засварчин Тони Яхле нас барсныхаа дараа эргэн сэржээ. Тэрээр клиникийн үхэлд орсон бөгөөд Тонигийн зүрх 45 минутын турш цохилохоо больсон гэнэ. Яхле 18 настай Лоуренс гэх хүүтэй байжээ. Эмч нар Яхлег моорог руу аваачих гэж бэлдэх үед Лоуренс “Ааваа, та өнөөдөр нас барах гээгүй биз дээ” хэмээн хэлсэн аж. Энэ үед гайхамшигтай зүйл тохиолдож Яхле амьд байгаагаа илэрхийлж эхэлсэн байна. Эмч нар маш ихээр гайхаж, түүнийг хэвийн байдалд шилжүүлэх тал дээр анхаарал хандуулж эхэлжээ. 

Зүрх судасны эмч Ража Назир ч болсон явдлын талаар тайлбарлаж чадаагүй гэнэ. “20 жилийн турш ажиллаж байхдаа нас барсан хүн эргэн ирж байхыг би огт хараагүй” гэжээ. Яхле нь Беллбрук дахь Христийн сүмийн итгэгч учир өөрийгөө үхлээс эргэж ирсэн гэдэгтээ итгэлтэй байгаа юм.

6 Уолтер Уильямс

Нас барагсдын дундаас амьд гарах үедээ Уолтер 78 настай байжээ. Миссисипи мужийн Холмс Каунтигийн хотоос сувилагч нарын хүсэлтээр эмч Декстер Ховард Уолтерыг гэрт ирсэн бөгөөд тэр Уильямсын зүрхний цохилтыг шалгаж, нас барсан болохыг тогтоосон байна.

Уильямсын цогцсыг уутанд хийж “Портер болон түүний хүүд” хэмээх оршуулгын товчоо руу аваачсан аж. Маргааш өглөө нь оршуулгын товчооны ажилчид 5 цагийн турш уутанд байсан бие  гэнэтхэн хөдөлж эхэлснийг анзаарсан байна. Мэдээж тэд гайхширалд автсан нь тодорхой.

Уильямсыг нэн даруй эмнэлэгт хүргэж, гэр бүлтэй нь холбогджээ. Уильямсыг нас барсан болохыг тодорхойлсон Ховард "Сүүлийн үгийг бурханд үлдээе" гэж хэлсэн байна. Харамсалтай нь 2 долоо хоногийн дараа Уильямс үнэхээр нас барсан аж.

7 Карлос Камехо

2007 онд Венесуэлийн иргэн Карлос Камехо зам тээврийн осолд орсон байна. Эмч нар түүнийг нас барсан хэмээн тодорхойлж, моорогт хүргэсэн бөгөөд задлан шинжилгээ хийхээр болжээ. Залуугийн нүүрийг зүсэхэд түүний нүүрнээс цус гарч эхэлсэн нь Карлосыг амьд болохыг илтгэж байсан юм. Үүнийг ойлгосон эмч нар шархыг шууд оёсон байна.

33 настай Камехо зүсэлтийн өвдөлт маш аймшигтай байсан учир би шууд сэргэсэн гэжээ. Нөхрийнхөө цогцсыг танихаар ирсэн бүсгүй нөхрөө амьд байгааг хараад маш ихээр баярласан аж. Камехог хүргэсэн эмнэлгийн ажилчид энэхүү хачирхалтай нөхцөл байдалд хариу өгөхөөс татгалзсан хэдий ч залуугийн нүүрэн дээр задлангийн сорви байгаа нь түүнийг нас барсан гэж тодорхойлсон болохыг баталж байгаа юм.

8 Ясмина Гомес

2013 онд Женнифер да Силва Гомес нь Ясмина хэмээх охиныг төрүүлсэн байна. Эмч нар бяцхан охиныг амьгүй төрсөн гэж үзжээ. Ясминаг моорог руу аваачих үед эмч Ана Клаудия Оливейра бяцхан охиныг эмнэлгийн сүмийн тахилын ширээн дээр тавьсан аж.

3 цагийн дараа Ясмина эргэн ирсэн байна. Үүний гэрч нь бяцхан охины эмээ Эльза болжээ. Тэрээр нас барсан зээгийнхээ цогцсыг авах гэж очоод ийнхүү зээгээ амьд болохыг харсан байна. Ингээд эмч нар охиныг асрах ажиллагаанд оржээ.

Охиныг нас барсан болохыг тодорхойлсон Аурелия Филипак эмч “20 жилийн турш надтай ийм зүйл огт тохиолдож байгаагүй” гэсэн аж.

9 Ли Сюфень

Хятадын Бейлю тосгоны иргэн Ли 6 хоногийн турш авсанд хэвтэж амьд гарсныхаа дараа тосгоны бүх хүмүүсийг айдаст автуулсан аж. Түүний хөрш Сюфенийг сэргээх оролдлогыг хийсэн боловч чадаагүй учир түүнийг нас барсан гэж боджээ.

Сюфенийг онгорхой авсанд хийж, найз нөхөд, ойр дотны хүмүүст нь салах ёс хийх боломжийг олгосон аж. Оршуулгын ёслолын нэг хоногийн өмнө хөршүүд авс хоосон байгааг харж, айдаст автсан байна. Тэд нас барсан Сюфенийг хайж байсан боловч тэрээр галын өрөөндөө хоол хийж байсан гэнэ. Сюфень: “Би удаан унтсан бөгөөд үнэхээр өлссөн байдалтай сэрсэн. Авснаас гарахын тулд би тагийг маш удаан түлхсэн” гэж хэлжээ. Тухайн үед Ли 95 настай байсан аж.

10 Таслима Рафик

Дахин амьдрах боломжийг олохдоо Таслиме Рафик 52 настай байжээ. Дөрвөн хүүхдүүдийн ээж тэрээр зүрхний шигдээс өвчнөөр эмнэлэгт хүргэгдсэн байна. Эмч нар 45 минутын турш бүсгүйн зүрхийг ажиллагаанд оруулах гэж хичээсэн боловч чадаагүй учир түүнийг нас барсан хэмээн тодорхойлжээ.

Таслимагийн нас барсан болохыг гэр бүлийнхэнд нь хэлж, тэд салах ёс гүйцэтгэхээр ирсэн аж. Саяхан хийсэн адреналины улмаас Таслимагийн бие хөдлөх, татганах магадлалтай хэмээн эмч нар сануулсан бөгөөд үнэхээр Таслимагийн бие 2 цагийн турш хөдөлж байсан гэнэ. Үүний дараа эмч нар түүний судсыг барьж үзэхэд бага хэмжээний лугшилт мэдрэгдсэн аж. Гэхдээ хүчилтөрөгчийн дутагдлаас болж түүнийг амьд гарч чадахгүй байх магадлалтай гэжээ.

Түүний гэр бүлийнхэн гайхамшиг байдаг гэдэгт итгэж залбирч байсан юм. Таслимагийн охин Шабана "Ээжээ хэрвээ би таны урмыг хугалах зүйл хийсэн бол та надад энэ талаар хэлээч" гэхэд Таслима "Чи миний урмыг хугалах юу хийсэн юм бэ" гэж хариулсан байна. Маргааш өглөө нь гэхэд Таслимагийн биеийн байдал хэвийн болсон юм.