Хэдвиг Ева Мариа Кислер буюу Хеди Ламарр 1914 онд Вена хотын еврей гаралтай чинээлэг гэр бүлд төржээ. Түүний ээж төгөлдөр хуурч байсан бол аав нь банкны менежер байв.

Охин элбэг хангалуун өссөн бөгөөд хөгжим, балетаар хичээллэж, театрын сургуульд суралцсан байна. Хедвиг 16 настайгаасаа зураг авалтад орох болж, Австрийн томоохон кино студид туслах зохиолчоор ажиллаж байжээ. Тэрээр "Ecstasy" киногоороо дэлхий нийтэд алдаршсан юм. 

1933 оны 2-р сарын 14-ний Вена дахь "Ecstasy" киноны нээлтийн өдөр Хедвиг Кислерийн карьерт цор ганц тохиох мөч байсан юм. Киноны нэг үзэгдэлд Хедвиг бараг нүцгэн шахуу уснаас гарч ирсэн нь ихээхэн хэл ам дагуулсан байна. Мэдээжийн хэрэг бут, модны мөчрөөр түүний биеийн нууц хэсгүүдийг халхалсан байв.

Бүр илүү олныг цочирдуулам дүр зураг бол түүний дур тавилтыг дүрсэлсэн явдал байлаа. Өсөж буй таашаалын оргил үеийг харуулан жүжиглэж буй охины нүүрийг камерын дуранд буулгасан байв. Энэ талаар жүжигчин бүсгүйг үнэмшилтэй харагдахын тулд зураг авалтын үеэр өөрийгөө зүүгээр хатгаж байсан гэсэн цуу яриа ч байдаг. Эцэг эх нь эрдэнэ мэт ганц охиныхоо энэхүү галзууралд маш их цочирдож хүлээн авсан аж.

Язгууртан гэр бүлийнхнээсээ банга хүртсэн жүжигчин бүсгүй дахин ийм үйлдэл хийхгүй хэмээн ам өчиг өгсөн гэнэ. Киног олон нийт болон сүм хийдийнхэн жигшин зэвүүцсэнээр барахгүй, олон оронд гаргахыг хориглож байсан юм. Гэсэн ч Хедвигийн нэр алдар Европ даяар өсөн нэмэгдсээр байв. Хэл ам дагуулсан киноныхоо ачаар тэр хожим Холливудад хүрэх замаа нээсэн байж ч болох юм.

Жүжигчин бүсгүй Австрийн бизнесмэн, зэвсгийн наймаачин, дур булаам охидын эрлэг гэгддэг Фриц Мандллтай гэрлэснээр өсөж байсан урлагийн карьераа хавцлын ирмэгт аваачжээ. Түүнийг бүх ажил хэргийн уулзалт, хэлэлцээрүүддээ Хедиг дагуулан явж гоо үзэсгэлэнгээр нь сайрхдаг байсан гэх цуу яриа хүртэл байдаг. 

Эхнэрээ өөрийн эрхшээлд байлгах хүсэлтэй чинээлэг эрийн хэтэрсэн хараа хяналт, үнэт эдлэл, чамин тансаг зүйлсээс залхсан Хеди гурван ч удаа зугтах оролдлого хийж байсан ажээ. Эхний оролдлого хамгаалагчдаас болж бүтэлгүйтсэн бол дараагийнх нь галт тэрэгний буудал дээрээс баригдсан байна. Харин гурав дахь удаад Фрицийг ан хийхээр явсан хойгуур үйлчлэгчийн хувцсыг хулгайлж, хэд хэдэн үнэт эдлэл шүүрч аваад Лондон руу зугтав. 

Англид Хеди "Метро-Голдвин-Майер" кино студийг үндэслэгч Луи Майертай уулзаж, төд удалгүй долоон жилийн гэрээ байгуулсан байна. Улмаар АНУ-д очиж даруйхан зураг авалтаа эхлүүлсэн ба дуулиан шуугианд дуртай үзэгчдийг бага боловч төөрөгдүүлэхийн тулд жүжигчин бүсгүй Ламарр гэдэг нууц нэрээр урлагийн ертөнцөд буцаж иржээ. Тэрээр Холливуд дахь карьераа "Algiers" киногоор эхлүүлж хоромхон хугацаанд тод гэрэлтэх болсон юм. 

Оргодол босгуул болж яггүй амьдрал туулсан бүсгүй эцэстээ "Crossroads", "Lady of the Tropics", "Comrade X" тэргүүтэй 26 кинонд амжилттай тоглосон байна. 

30-аад оны сүүлээр Хеди хөгжмийн зохиолч Жорж Антейлтэй танилцаж, торпедо пуужингийн радио удирдлагын системийг хамтдаа боловсруулжээ. Чухамдаа Хеди нөхрийнхөө хэлэлцээрт оролцох үеэрээ зэвсгийн талаар арвин мэдлэгтэй болсон байна. Улмаар олж авсан мэдлэгээ техникийн ухаантай холбож, радио давтамжийг орлуулах технологи бүтээсэн аж. Техникийн хувьд энэ санааг Антейл бодит болгон хэрэгжүүлсэн бөгөөд өнөөдөр энэ технологийг GSM, Bluetooth, Wi-Fi ашиглаж байна.

Фриц Мандлаас салсны дараа жүжигчин бүсгүй дахин таван удаа гэрлэжээ. Тэдний эхний эгнээнд продюсер, жүжигчин байсан бол гурав дахь удаад нь рестораны зөөгч эр түүний сэтгэлийг булаасан байна. Дараа нь тэр Техасын газрын тосны магнаттай гэрлэсэн юм. Сүүлчийн нөхөр нь Хедигийн өмнөх шүүхэд нэхэмжлэл гаргахад тусалдаг хуульч байв. Эмэгтэй зургаа дахь нөхрөөсөө салах өргөдөл гаргахад тэр 60 нас гарч байсан бөгөөд үргэлжлүүлэн азаа сорихыг хүсээгүй байна. 

Тэрээр амьдралынхаа туршид элдэв цуу яриа, дуулиан шуугианы бай болж явсан ч шүтэн бишрэгчдийнхээ хайртай жүжигчин, хүчирхэг эмэгтэй хэвээр байв. Холливудад амжилт үзүүлсэн цөөн хэдэн бараан үст бүсгүйчүүдийн нэг болсон Хеди Ламарр шинэ мянган эхлэхэд таалал төгссөн юм.