Тус брэндийн зүгээс "U-Boat Worx" гүний шумбагч нь харь ертөнцөд очсон мэт өвөрмөц мэдрэмжийг эрэлхийлж буй хүмүүст манай гарагийн хамгийн бага судлагдсан хэсэг болох далайн гүнд нэгдүгээр зэрэглэлийн үйлчилгээ үзүүлж чадна хэмээн итгэж буйгаа мэдэгдээд байна.

U-Boat Worx NEXUS 8 загварын шумбагч нь 9 хүний багтаамжтай ба нисгэгчийн хоёр талд тус бүр гурван бизнес зэрэглэлийн суудалтай аж. Түүнчлэн суудлыг хэвтүүлэн 12 буюу түүнээс дээш насны 2 хүүхэд суух боломжтой сандал бий гэнэ. Нийт гурван хэсгээс бүтэх их биетэй уг шумбагчийн зорчих хэсэг бүтэн шилэн хийцтэй тул зорчигчдын харах өнцөг хязгаарлагдах явдал гарахгүй гэдгээрээ онцлогтой.

“Усны мандал доогуурх орон зайд аялах U-Boat Worx NEXUS 8-ын бас нэгэн давуу тал нь бүх чиглэлд хөдлөх боломжтой болсон явдал юм. Ийнхүү Cruise Sub загварын шумбагчдын хувьд заавал байх ёстой чадваруудын нэг хэмээн тодорхойлогдоод байсан урагшлах, ухрах, доошлох зэрэг хөдөлгөөнүүдийг гүйцэтгэх болсон нь зорчигчдод далайн гүнийг чөлөөтэй ажиглах боломж бүрдүүлжээ” хэмээн үйлдвэрлэгчдийн зүгээс мэдээлжээ.