Дэлхий өнөөдөр хэдэн арван жилийн өмнөхтэй харьцуулахад м2 тутамд хагас ваттаар бага гэрэл цацруулж байна. Энэ нь дэлхийн нийт гэрэлтэлт буюу альбедо 0.5 хувиар буурсан үзүүлэлтийг харуулж байгаа бөгөөд сүүлийн 3 жилд энэ нь хамгийн их мэдэгдсэн байна.

Товчхондоо манай дэлхий нар, оддоос ирэх гэрлийн ердөө 30-аас илүүгүй хувийг буцаан ойлгодог болсон аж. Эрдэмтэд энэхүү үр нөлөөг "Альбедогийн уналт" гэж нэрлэдэг.

Альбедо гэдэг үг нь "albus" (цагаан) гэсэн латин үгнээс гаралтай. Энэ нь дэлхийн цагаан өнгөтэй гадаргуу буюу мөсөн гадаргууны гэрэл ойлгох чадварыг хэмжих хэмжигдэхүүн ба 0-ээс (хамгийн харанхуй) 1 (хамгийн тод) хүртэлх утгуудаар илэрхийлэгддэг байна. Ийм учраас альбедо 0.5 хувиар буурсан гэдэг нь дэлхий өмнөхөөсөө 50 хувиар бүүдгэр болсон гэсэн үг юм.

Мөсөн гадаргуу нь гэрлийг 90 хувь хүртэл ойлгодог бол ус нь гэрлийн ихэнх хувийг шингээн авч ердөө 6 хувь орчмыг л буцаан ойлгодог. 

Нарны гэрэлтэлтэнд ямар ч өөрчлөлт ажиглагдаагүй учраас нарны гэрэл альбедод нөлөөлөөгүй гэж үзэж болно. Тэгэхээр гадны нөлөөнөөс бус манай гарагийн төлөв байдалтай холбоотой дотоод өөрчлөлтийн улмаас урьдын адил гэрэлтэхээ больсон гэсэн үг юм. 

НАСА-гийн мэргэжилтнүүд Номхон далай дээр шингээлт багатай буюу гэрэл сайн ойлгодог үүлнүүд багассаныг сүүлийн жилүүдэд хийсэн хэмжилтүүд дээрээ тулгуурлан дурдсан. Шалтгааныг нь усны температур нэмэгдсэнээс үүдэлтэй гэж үзэж байгаа. Дэлхийн дулаарлаас болж агаарын температур нэмэгдсэнээр манай гарагийг бүрхсэн мөсөн бүрхүүл хайлсаар байгаа билээ. Тиймээс альбедо уналт ажиглагдах нь Хойд мөсөн далайн мөс хайлж, Гренланд, Хойд Америк, Евразийн цас мөсөн бүрхүүлүүд багасч байгаатай холбоотой юм. 

Цас мөсөн бүрхүүл хайлж, далай дээр үүл бүрэлдэх нь багасч байгаа нь нарны гэрлийн тусах гадаргуу томроход хүргэж байна. Ингэхийн хэрээр агаар мандал, далайн усанд илүү их энерги шингэж, эргээд дэлхийн дулаарлыг нэмэгдүүлэхэд томоохон нөлөөлж байгаа аж.. Харамсалтай нь дэлхийн өнөөгийн нөхцөл байдлын хувьд энэ нь нэлээд хор нөлөөтэй хэрэг юм.