Индонези улсын Баруун Ява мужийн оршин суугч 41 настай Мухаммед Айван 1997 онд давстай усны матрын зулзагыг далайн загасчдаас ердөө 2 доллараар худалдан авчээ. Ийнхүү тэрээр нялх зулзагаа гэртээ авч хариад Кожек хэмээн нэрлэсэн байна. Түүнээс хойш Кожек матар Иваны гэрийн арын хашаанд амьдарсаар 200 кг болтлоо өсчээ.

Тэрээр Кожекийн талаар: "Би загасчдын барьж явсан жижигхэн матрыг харсан даруйдаа л авч тэжээмээр санагдсан. Тэр хэчнээн нялх ч гэлээ эхэндээ миний гарыг хүртэл хазах гэж үздэг ууртай, хурц ааштай байсан учраас хошууг нь уяж сургасан юм. Одоо бол Кожек хүмүүст эрхлэх дуртай, зөөлөн зантай болж өссөн." хэмээн хуваалцсан байлаа.

Айваны гэр бүл бага насны гурван хүүхэдтэй боловч матар хэзээ ч тэдэнд хор хөнөөл учруулж байгаагүй гэнэ. Тэр бүү хэл, гэрийн эзэн Айван Кожек матрыг огтхон ч түрэмгий биш, үргэлж тайван байдаг гэдгийг батлан тайлбарласан байв. Өдгөө Кожекийг харахыг хүссэн хүмүүс зөвхөн Индонези ч биш, дэлхийн өнцөг булан бүрээс Айваны гэрийг зорин ирэх болсон бөгөөд нэг жуулчин бүр 74 мянган ам.доллараар Кожекийг худалдаж авах саналь тавьсан ч Айван гэр бүлийн "гишүүн"-ээ зараагүй аж.

Кожек матар анх энэ гэр бүлд ирэхдээ 25-хан см урт, дунд зэргийн хэмжээтэй аквариумд багтдаг байсан бол өдгөө өөрийн гэсэн усан сантай болсон байна. Кожекийг эзэд нь шинэхэн загасаар хооллож, усанд хүртэл оруулж, сойздон угааж өгдөг гэнэ.

Энэ төрлийн матар нас бие гүйцэхээрээ 6 метр урт, нэг тонн орчим жинтэй болох боломжтой. Кожек одоо 200 гаруй кг жинтэй учир Айван түүнд зориулж тун удахгүй шинэ усан сан хийж өгөхөөр төлөвлөж байгаа тухайгаа хуваалцсан байлаа.