Бурхны дүр төрхийг яагаад заавал унжиж сунасан чихний омогтой бүтээдэг байсан талаар судлаачид маш олон янзын таамаг дэвшүүлдэг. Тэдгээрийн хамгийн түгээмлээс онцлон хүргэе. 

Эхнийх нь Будда гэгээнтэн болох хүртлээ тансаг цайзад элбэг хангалуун амьдарч байсан тул бусад язгууртнуудын адилаар хамгийн үнэтэй, хамгийн хүнд үнэт эдлэлийг чихэндээ зүүдэг уламжлалтай байсантай холбоотой гэнэ. Энэ таамаг ёсоор бол Бурхан багшийн угсаа гарал, чинээлэг удмаас нь шалтгаалж чих сунасан нь тэр аж.

Харин өөр нэг хувилбарт дээрхээс тэс ондоо утгаар тайлбарладаг байна. Тодруулбал, Бурхан багшийн асар том чихний омог нь цэцэн оюун, гэгээрлийн бэлгэдэл бөгөөд амьтай бүхнийг энэрч хайрлах ариун сэтгэлийг илэрхийлдэг гэнэ.

Хамгийн сүүлийн түгээмэл таамаг нь Будда ийм чихний тусламжтайгаар бүхий л амьтны залбирлыг алдалгүй сонсож, орчлон ертөнц болон дээд хүчнүүдтэй холбогддог аж.

Шашны итгэл үнэмшлийн хувьд дээрх гурван таамагтай санал нийлдэггүй судлаачид ч бий. Тэд үүнийг харьцангуй энгийн утгаар тайлбарласнаараа дээрх таамгуудаас ялгардаг бөгөөд Сиддарта Гаутама нэрээр амьдарч байсан тэрхүү хүнийг анатомийн бүтцийн хувьд нийт хүн төрөлхтнөөс өвөрмөц махбодьтой байсан гэж үзжээ.