Махлаг биеэрээ бусад усан сэлэлтийн тамирчдаас ялгарах Шон Дингилиус-Уоллес 1994 оны 7-р сарын 26-нд Номхон далайд оршдог арлын улс болох Палауд төржээ. 

Тэрээр 2016 оны Риогийн Олимпод эх орноо төлөөлөн оролцож байсан бөгөөд эрэгтэйчүүдийн 50 метрийн чөлөөлт сэлэлтийн төрөлд 26.78 секундээр 72-т эрэмбэлэгдэж байв. 

Дингилиус-Уоллес 50 метрийн чөлөөт сэлэлт, араар сэлэлт болон 50, 100 метрийн эрвээхэй сэлэлтээр улсдаа дээд амжилт тогтоож байсан аж.

Мөн 2019 онд Өмнөд Солонгос улсад зохион байгуулагдсан Усан спортын 18 дахь удаагийн Дэлхийн аварга шалгаруулах тэмцээн (ДАШТ)-д амжилттай оролцжээ.

50 метрийн сэлэлтийг шууд дамжуулах Испанийн тайлбарлагчид түүнийг хараад инээдээ барьж чадаагүйгээс бүх зүйл эхэлжээ. Твиттерт тавигдсан бичлэг дээр түүний бие галбирын талаар тоглоом наргиан хийж, шүүмлэх хүмүүс ч байлаа.

Гэхдээ дийлэнх фэнүүд Дингилиус-Уоллесыг өхөөрдөж, магтаж байсан бөгөөд "усны эсэргүүцэл сайн шингээх биетэй юм" хэмээн хошигножээ.

Өмнөх удаагийн Олимпод 72-тр байрт орж байсан тэрээр энэ удаагийн Олимпын наадамд 67-д орсон бяцхан боловч бахархам амжилт гаргаснаас гадна дэлхий дахинд төрөлх улсынхаа нэрийг гаргасан гавьяа байгуулжээ.

Филиппинээс холгүйхэн оршдог, үзэсгэлэнт байгальтай, ердөө 19 мянган хүн амтай арлын бяцхан Палау улсын тухай энэ тамирчны ачаар олон хүн мэдэж авчээ. Тус улсад улс төрийн нам гэж байхгүй, армигүй, үндэсний мөнгөн тэмдэгтгүй, тэр ч байтугай нийтийн тээвэр байдаггүй гэнэ.