Артек зуслан социалист дэглэмтэй улсуудын сурлага, хөдөлмөрөөрөө манлайлагч хүүхдүүдийг жил бүр хүлээн авч урлаг, спорт, соёлын олон арга хэмжээ, уралдаан тэмцээн зохион байгуулан хүүхэд багачуудад мартахын аргагүй дурсамж бүтээдэг байжээ.

Зөвлөлтийн арав гаруй мянган сурагчдаас ердөө хэдхэн мянга нь л Артек зусланд амрах хүүхдүүдийн тоонд багтаж чаддаг байсан аж. Нарлаг эрэг дээрх энэхүү зуслан хүүхдүүдийн хувьд жинхэнэ диваажин байсан бөгөөд энэ газарт амарна гэдэг тэдний нэр төрийн хэрэг болдог байв. 

Артек 1925-1969 оны хооронд нийт 300 мянган хүүхэд хүлээн авснаас 13 мянга гаруй нь гадаад хүүхдүүд байсан гэнэ.

ЗХУ 1960 онд Артекийг сэргээн засварласан бөгөөд 1969 он гэхэд 150 барилга, гурван эмнэлэг, сургууль, Артек Фильм кино студи, гурван усан сан, 7000 суудалтай цэнгэлдэх хүрээлэнтэй болсон байжээ.