Дэлхий нийтийн дунд тархсан Ковид-19 зөвхөн амьдралын хэвшил, ажиллах хэв маягийг өөрчлөөд зогсохгүй бизнес эрхлэгчдийн дунд тоглоомын дүрмийг бүхэлд нь эргүүлж орхив. Өнгөрсөн цагт буцаж очихгүйгээс хойш жижиг дунд бизнесүүд хэрэглэгчтэйгээ холбогдох, брэндээ үнэ цэнэтэй хэвээр авч үлдэхийн тулд шинэ эгэл амьдралын хэв маягт хэрхэн дасан зохицох, үүний тулд тойрч биш зайлшгүй дайрч гарах маркетингийн 10 бодит үнэнийг хуваалцъя.

1. Хэрэглэгчид хүрэх замаа нарийвчилж, сегментээ тодорхойлох

Ковид-19 харилцагчаа таних ёстой гэдэг ойлголтыг улам бататгаж, тэдний зан байдал, хэрэгцээ шаардлагад нийцүүлэн илүү нарийвчлан, сегмент бүрт тулж ажиллахыг шаардаж байна. Хэрэглэгчид юу хамгийн их хамаатай гэдгийг тодруулж, түүнийг нь санал болгож харилцах хэрэгтэй. Цар тахал эхэлснээс хойш 20 орны 14,500 хүнтэй таван удаагийн давтамжтай хийсэн судалгаанд үндэслэн Ernst & Young аудитын фирм хэрэглэгчдийг дараах таван төрөлд ангилжээ. Үүнд үндэслэн бүтээгдэхүүнээ санал болгож болох юм.

1. Үнэ чухал 32% - Брэнд, чанарт анхаарахаас илүүтэй санал болгож буй үнийг чухалчилж худалдан авалт хийдэг хүмүүс.
2. Бүхний түрүүнд эрүүл мэнд 25% - Өөрийн болон гэр бүлийнхээ эрүүл мэндийг тэргүүн эгнээнд тавьж, худалдан авалт хийхдээ эрүүл мэндэд хэрэгтэй бүтээгдэхүүн авахад анхаарна.
3. Эх дэлхийгээ хайрлагсад 16% - Худалдан авалт хийхдээ байгаль орчинд нөлөөлөх нөлөөллийг бодолцдог.
4. Шударга ёс, тэгш байдал чухал 15% - Таны санал болгож буй бүтээгдэхүүн, үйлчилгээ шударга нийгмийн төлөө зориулагдсан байх ёстой. Үйлдвэрлэлийн процесс ч мөн ялгаагүй.
5. Туршлага болоод үлдэнэ 12% - Шинэ бүтээгдэхүүн туршихад нээлттэй ханддаг, тухайн цаг мөчдөө амьдардаг хүмүүс.

2. Танилц, таны шинэ өрсөлдөгч бол хэрэглэгчийн сүүлчийн туршлага

Ковидоос ч өмнө зах зээл дэх хэрэглэгчийн хүлээлт хэдийнэ өндөр болсон байсан. Учир нь тэд хэт хурдтай, өндөр технологи ашиглаж, өөрдийн хувийн туршлагад нийцсэн тухайлсан үйлчилгээг өөрт нь санал болгохыг шаардаж байв. Мэдээж энэ бүхнийг Ковид гэрлийн хурдаар түргэтгэсэн. Иймд бизнесүүдэд нүд ирмэх зуурт өсөж буй хэрэглэгчийнхээ хүлээлтийг давахын тулд дараах гурван стратегийг баримтлахыг зөвлөж байна.

1. Хэрэглэгчидтэй шууд нүүр тулж харилцах харилцааг байгууллагын брэнд үнэлгээний үндсэн KPI болгох. Ингэхдээ өмнө нь ашиглаж байсан судалгаа, баримтад бүү тулгуурлаарай.
2. Хэрэглэгчийн үйлчилгээний бүхий л үе шатад тулгарч буй асуудлыг шийдэхийн тулд шаардлагатай мэдээллийн сан, технологийн суурь үүсгэх
3. Борлуулалт болон хэрэглэгчийн үйлчилгээг аль болох түлхүү уялдуулах

3. Хэрэглэгч танаас хэрэгцээтэй зүйлээ маш түргэн хугацаанд авахыг шаардаж байна

Цар тахлын үед хэрэглэгчид үйлчилгээ авахдаа аль болох бага цаг зарцуулж, эрсдэлийг урьдчилж тооцоолсон байдлаар худалдан авалт хийх болсон. Нэг үгээр хэлбэл тэд, өөрсдөд нь хэрэгтэй байгаа зүйлээ хүссэн хугацаандаа авахыг эрмэлзэж буй. Тэд үүнийхээ төлөө бизнесүүдэд тавих шаардлагаа улам нэмэгдүүлж байна.

4. Онлайнаар болзохтой л ижил

Бидний мэдэх уламжлалт маркетингийн замнал өмнө нь масс харилцагчид чиглэж, олон сувгаар мэдээллээ түгээхийг хэлдэг байв. Харин цар тахлын үед энэ бүхэн өөрчлөгдөж, онлайнаар болзохтой ижил болсон. Онлайнаар болзохын өмнө бид өөрт тохирох нэгнийг олохын тулд аль нэг платформд нэвтэрч, хүссэн өгөгдлөө оруулж, хайлтын товчлуур дардаг. Үүнтэй л ижил. Гэхдээ нэг зүйлийг анхааруулахад, тэд хамтдаа бол илүү үр дүнтэй.

5. Хэрэглэгчийн бүхий л алхмыг тооцоол

Бүх зүйл харилцагчтай үүсгэх харилцаанаас эхэлдэг гэдгийг бид хэзээд санах хэрэгтэй. Жишээлбэл, бид хэрэглэгчийг татахын тулд шууд болон шууд бус замаар тэдэнтэй холбогдож, энэхүү харилцаагаа борлуулалт болгохын тулд бүхий л аргыг эрэлхийлдэг. Дараа нь тэднийг авч үлдэхийн тулд урамшуулал, хямдрал санал болгодог. Энэ бүх явц үйлчлүүлэгчийн шийдвэрээс шалтгаалж үргэлжилнэ. Иймд анх хэрэглэгчтэйгээ холбогдох тэр цагаас эхлэн бүх алхмыг тооцоолж, нягт хандаарай. Сүүлийн үед чатбот, автомат хариулагчийг түлхүү ашиглах болсон ч таны бизнест аль нь илүү тохирохыг сайтар тунгаасны эцэст шийдвэрээ гаргаарай.

6. Харилцаа бүх зүйлээс илүү чухал

Ковидын улмаас бизнесүүд борлуулалтад харилцаа хэр чухал болохыг маш сайн ойлгож байна. Тэд онлайнаар борлуулалтаа хийж, хуучин хэрэглэгчдээ хадгалж үлдэж чадсан ч шинэ хэрэглэгч татах нь хүндхэн сорил болж үлдэв. Хөл хорионы улмаас гэртээ байж, онлайн хайлтын илэрцээр гарч ирж буй шинэ бүтээгдэхүүнийг худалдан авахдаа хэрэглэгчид бүтээгдэхүүний чанарт ач холбогдол өгөхөөс илүүтэй харилцааг чухалчилж байна.

7. Уян хатан байдал бол маркетингийн шилдэг арга барил

Цахим шилжилт бүхнийг хурдасгасан. Үүнд сайн тал бий ч, сөрөг талууд гарч ирсээр байна. Хэрэв ямар нэг байдлаар муу зүйл тохиолдож, бүтээгдэхүүн болон танай брэндийн тухай олон нийтийн сүлжээнд сөрөг сэтгэгдэл газар авлаа гэхэд шийдвэр гаргахдаа аль болох уян хатан хандаарай.

8. Брэндийн үнэ цэнийг чухалчлаарай

Цар тахал брэндийн үнэ цэнэ гэх ойлголтыг улам өндөрт гаргав. Дэлгүүрийн лангуун дээр байх ижилхэн олон бүтээгдэхүүнээс сонгогдоход танай брэндийн нэр чухал болсон тухай мөн Ernst & Young аудитын фирмээс гаргасан судалгаанд дурджээ. Хэрэглэгчид сонголт хийхдээ тухайн брэндийн нийгмийн хариуцлага, ёс зүйтэй байдал, тогтвортой хөгжил зэргийг илүү анхаардаг болсныг үргэлж бодолцоорой.

9. Тэнцвэртэй байдал

Реклам, зар сурталчилгаа зах хязгааргүй далай мэт хөврөх болсон энэ цаг үед цогц технологийн шийдлээр нэг мөр шийдэж, тоглоомын дүрмийг шууд өөрчлөх боломжтой болсон. Гэхдээ технологи болон уламжлалт аргыг тэнцвэртэй хослуулах нь хамгийн чухал. Технологигүйгээр дата мэдээлэл хоосон араг ястай л ижил. Харин ямар ч суурь мэдээлэлгүй технологийн дэвшил нь хурдлах боломжгүй Ferrari гэсэн үг.

10. Маркетинг бол дижитал шилжилтийн төв

Маркетингийн зардал бизнесийн нийт зардлын дийлэнх хувийг эзэлдэг. Гэтэл цар тахлын үед танаж болох зардлын нэлээд дээгүүрт маркетингийн зардал орж байв. Тэгвэл энэ хоёр эсрэгцлийг хэрхэн нийцүүлэх вэ? Тулгарч буй нөхцөлд дасан зохицож,маркетингийн дижитал шилжилтэд бэлтгээрэй.

Эх сурвалж: Harvard Business Review, Janet Balis