Түүний зургууд асар богино хугацаанд твиттер сүлжээнд тархаж, олон хэрэглэгчдийн сэтгэлд хүрсэн байна.

Улмаар Минатогийн шүтэн бишрэгчид мянга мянгаар нэмэгдэж, түүний хувирах чадварыг сайшаан магтах хүмүүс олон байлаа. 

Гэсэн ч түүний хөөрхөн төрхөд эргэлзэх хүмүүс мөн гарч ирж байсан юм. Нэгэн твиттер хэрэглэгч "Орчин цагт хөөрхөн эмэгтэйд итгэх аргагүй болсон шүү дээ." гэж бичсэн байв.

Минато анх дөрвөн жилийн өмнө косплэй хийх сонирхлоо олсон гэнэ. Тэрбээр гоо сайхны салонд очиж, мэргэжлийн багийнхнаар нүүр будалт хийлгэж байжээ. Улмаар Минатод түүний шинэ төрх үнэхээр таалагдсан бөгөөд тэрээр нүүр будалтын урлагийг бие даан судалж эхэлсэн байна.

Гадаад төрхөө аниме баатар болгон хувиргахын тулд тэрээр хиймэл үс, дотуур хувцас, наалдамхай тууз зэргийг ашиглаж эхэлсэн аж.

Ийнхүү хэд хэдэн зураг даруулаад дараа нь тэрээр фотошопын тусламжтайгаар нэмэлт өөрчлөлт оруулан засварладаг байна.