Дэлхийд тэргүүлэгч медиа стримингийн үйлчилгээнүүдээс Монголд зөвхөн "Netflix"-ийг ашиглах боломжтой байсан билээ. Хэдий манай олон уран бүтээлчдийн дуу хөгжим "Spotify" дээр нэмэгдсэн байгаа ч иргэдийн хувьд албан ёсоор бүртгүүлж, төлбөрөө төлөх боломжгүй хэвээр байв. Тэгвэл даваа гарагт танилцуулагдсан "Spotify"-ийн 80 шинэ зах зээлийн нэг нь манай улс болсон бөгөөд ойрын өдрүүдэд үйлчилгээ нээгдэх ажээ.

Мөн Румын, Хинди, Суахили зэрэг 36 хэл "Spotify"-ийн системд нэвтэрсэн тул тус үйлчилгээ нийт 60 гаруй хэлийг дэмждэг болжээ.

Шинээр "Spotify" нэвтэрсэн улсуудын хэрэглэгчид үнэгүй болон төлбөртэй хувилбаруудыг ашиглах, түүнчлэн нэг хүний, гэр бүлийн, хосын, оюутны хөнгөлөлттэй багцуудаас сонгох боломжтой. Хэрэглүүрийн хувьд компьютер дээр болон гар утасны аппликэйшнээр ашиглана.

"Spotify"-г төлбөргүй ашиглах нөхцөлд хүссэн дуугаа сонсох, солих боломжгүй байдаг бол 10 долларын үнэтэй "Premium" багцад бүртгүүлснээр дээрх боломж нээгдэхийн зэрэгцээ сурталчилгаа харахгүй, татаж аваад интернетгүй үед сонсох, дууны чанарыг сайжруулах гэх мэт эрхтэй болдог. 

Уг үйлчилгээ шинээр нэвтэрч буй орнуудын ихэнхийг Африкийн улсууд эзэлж байгаа бол Ази тивээс Армен, Азербайжан, Киргиз, Узбекистан, Пакистан зэрэг орнуудын хамт манай улс багтсан байна.