Неонацистын хөдөлгөөн ОХУ-д ЗХУ задрахын өмнөхөн бий болжээ.  Барааны хомсдол, бага цалин тэтгэвэр, амьдралын таагүй нөхцөл, хуучин ЗХУ-ын бүрэлдэхүүн орнуудаас ирсэн цагаач "бага ястнууд" зэрэг нь неонацизм үүсэх өөр нэг шалтгаан болжээ. 1990 онд Александр Баркашовоор толгойлуулсан “Оросын үндэсний нэгдэл” хэмээх неонацизмын анхны том байгууллага байгуулагдсан байдаг.

Тэд арьс өнгөний үзэл, еврей, цыганы эсрэг үзэл, ЛГТБ-чүүдийг гадуурхах хөдөлгөөнийг дэмждэг бөгөөд ялангуяа Кавказ болон Дундад Азийнхныг үнэн голоосоо үзэн яддаг.

Өнөө цагт Оросын неонацистуудын хамгийн том цугларалтыг хөлбөмбөгийн хулигаануудын зөрчил дээр харж болно. 

"Ерөнхийдөө орчин цагийн нацистуудыг улс төрийн хөдөлгөөн гэхээс илүү залуусын сонирхлын бүлэг гэж дүгнэж болно. Үсээ хуссан, гартаа хас тэмдэгтэй тууз зүүсэн, шинэ Рейх байгуулах бүхий л төлөвлөгөөг гаргасан хүмүүсийн уулзалтыг би хэзээ ч харж байгаагүй" хэмээн энэхүү зургуудыг дарсан Павел Волков өгүүлжээ.