Хэн, ямар шалтгааны улмаас санваартны дүртэй энэхүү роботыг бүтээх болсон нь нууцлагдмал, яг тодорхой бус. Гэхдээ олон түүхчид 16-р зууны Испанийн цаг зохион бүтээгч, зураач Хуанело Турриано нь үүнийг бүтээсэн хэмээн үздэг аж.

Тэрээр Ариун Ромын эзэнт гүрний хаан 5-р Чарльзийн ордонд ажилладаг байсан байна. Зурах, зохион бүтээх өндөр авьяастай тэрээр цагны нарийн механизмыг ашиглан аливаа зүйлийг хөдөлгөөнд оруулж чаддаг байжээ.

Чарльз хааны залгамжлагч 2-р Филиппийн хүү хүндээр өвдөхөд, хаан мөргөл үйлдэж, хэрэв гайхамшиг тохиолдон хүү минь амьд гарвал би ч хариу болгон гайхамшгийг бүтээх болно хэмээн андгай тангараг өргөжээ. Ингээд ханхүү ч амьд гарч, хаан өөрийн хэлсэн амандаа хүрэн энэхүү гайхамшигт санваартныг бүтээх зарлиг буулгажээ. 

Уг түүхийн юу нь үнэн, юу нь худал болохыг тодорхойлох боломжгүй ч энэхүү робот нь цаг үеэсээ хэдэн зуун жилээр түрүүлсэн гайхамшигт бүтээл юм. Одоогоор АНУ-ын Вашингтон хот дахь үндэсний түүх болон технологийн музейд хадгалагддаг байна.