1 Шинжлэх ухааны үүднээс тайлбарлавал:

"New England Journal of Medicine" сэтгүүлд нийтлэгдсэн судалгааны ажлаас харвал таргалалт нь олон нийтийн дунд халдвар маягаар тархдаг ажээ. Уг судалгааг Николас Кристакис (Nicholas A. Christakis) Жэймс Фаулер (James H. Fowler) гэх хоёр эрдэмтэн нийгмийн дунд ямарваа үзэгдлийн давтагдах шинж дээр анализ хийх маягаар гаргасан байна. Судалгааны ажилд 12000 хүн өөрсдийн ойр дотнын хүмүүсийн хамт оролцжээ.

Эрдэмтэд тэдгээр хүмүүс дээр анализ хийхдээ нэг хүнийг нэг цэгээр төлөөлүүлж харин тэдгээрийн хоорондын харьцааг зураасаар холбон илэрхийлсэн бүдүүвчийг үйлдсэн байна. Харин том цэгээр илүүдэл жинтэй хүнийг илэрхийлжээ. Эцэст нь нэгтгэн харахад том цэгтэй зураасаар холбогдсон цэгүүд нь ихэвчлэн ижилхэн том байх нийтлэг шинж ажиглагджээ.

2 Эрсдэл

Дээрх судалгаанаас дүгнэлт гаргавал хэрэв таны найз жин нэмж эхэлбэл өөрийн тань илүүдэл жинтэй болох эрсдэл 57 хувиар нэмэгдэх ажээ. Харин гэр бүлийн тань хүн жин нэмбэл 40 хувиар, эхнэр эсвэл нөхөр тань жин нэмбэл 37 хувиар өсдөг байна.

3 Зай хамаарахгүй

Илүүдэл жин "халдварлахад" харилцааны ойр байдал газарзүйн ойр байдлаас илүү нөлөөтэй гэнэ. Өөрөөр хэлбэл дотнын хүн тань хэдэн бээрийн цаана байсан ч та хоёрын нөхөрлөл хүчтэй хэвээр байвал нэгнийхээ жинд нөлөөлөх явдал буурахгүй ажээ. 

4 Хэвийн жин

Эргэн тойрны хүмүүс илүүдэл жинтэй болоод ирэхээр хүмүүст "Бага зэрэг махлаг байх нь зүгээр" гэсэн сэтгэгдэл төрөх магадлал өндөр аж. "Та ямар хүмүүсийг байнга хардгаас шалтгаалж хэвийн жингийн талаар таны ойлголт өөрчлөгддөг" гэж дээрх судалгааг хийсэн эрдэмтэн өгүүлжээ.

5 Гэхдээ цорын ганц шалтгаан бол энэ биш

Таргалалтын шалтгаан зөвхөн бусад хүмүүсийн жинтэй холбоотой гэж ойлгож болохгүй нь мэдээжийн хэрэг. Хоолны дуршил, хөдөлгөөний дутагдал, удамшил, өвчин эмгэг, орчны онцлог зэрэг нь илүүдэл жинд нөлөөлөх гол хүчин зүйлс юм.