Сүүлийн жилүүдэд хийгдсэн сургалтын олон туршилтын хүрээнд Орост шатар, даамыг сурагчдын хичээлийн нэг хэсэг болгон байнга тоглуулжээ. Үр дүнд нь тэдний тооны хичээлдээ гаргасан ахиц шатар тоглосноос илүүтэй "placebo effect" буюу ямарваа нэгэн сатааруулах зүйлээс үүсэх тайвшралтай илүү холбоотой болох нь ажиглагдсан байна.

Шинжлэх ухааны талаас үзвэл тусдаа нэг хүрээн дэх сургуулилт нөгөө хүрээний ур чадварт нөлөөлөх боломжгүй аж. 

Математикийн ур чадварт нөлөөлдөг хүчин зүйлсийн судалгаанд зориулагдсан нэгэн туршилтын үр дүн "Learning and Behavior" сэтгүүлд нийтлэгдсэн байна.

Туршилтаар гурав болон дөрөвдүгээр ангийн 233 сурагчдыг 25 цаг үргэлжилсэн шатрын дугуйланд хамруулжээ. Дараа нь судлаачид тэдний математикийн бодлого бодох чадварт ахиц гарсан эсэхийг нягталсан байна. Сурагчдыг шатар тоглосон, даам тоглосон, идэвхгүй байсан гэсэн гурван бүлэгт хуваан ажиглалт хийхэд тэдний математикийн чадварт нэгнээсээ илүү ахицтай байсан зүйл огт харагдаагүй байна. 

Хоёр дахь туршилтад зөвхөн даамны дугуйланд явсан 52 хүүхдийг хамруулжээ. Энэ удаа мөн л тэдний математикийн чадварт ялгаа гарсан шинж алга байжээ. 

Ингээд тэрхүү судлаачид "Шатар, даам гэх мэт тоглоомыг сургалтын хөтөлбөрт ашиглах нь ач холбогдол багатай. Иймд математикийн уламжлалт заах арга барилыг тиймэрхүү техникүүдээр солих боломжгүй" гэсэн дүгнэлтэд хүрсэн байна.