1
"Bad Santa"
Нээлт: 2004 оны 11 сарын 5
Найруулагч: Терри Цвигофф (Terry Zwigoff)
Гол дүр: Билли Боб Торнтон (Billy Bob Thornton)
Үйл явдал: Бүсгүйчүүдийн эрлэг, архинд донтсон муу залуу, хамтрагчтайгаа цуг их дэлгүүрт Сантагийн дүрд хувирч ажиллах болсноор үйл явдал эхэлнэ. Хүүхэд бүрийн хүсэл мөрөөдлийг биелүүлэгч Санта сайхан сэтгэлтэй, өглөгч, тусархаг байх ёстой бол тус кинонд гарах Санта харин ч эсрэгээрээ аж. Гэвч аажим аажмаар муу Санта бяцхан хүүгийн ачаар тэс өөр нэгэн болж хувирна. Энэхүү кино нь биднийг хүүхэд насанд буцаан аваачиж, хөөр баяр, аз жаргалыг мэдрүүлэх юм.
2
"The Santa Clause"
Нээлт: 1994 оны 11 сарын 11
Найруулагч: Жон Паскүйн (John Pasquin)
Гол дүр: Тим Аллен (Tim Allen)
Үйл явдал: Скот гэх залуу санамсаргүй байдлаар Сантаг бэртээж, түүний оронд хойд мөсөн туйл руу цаа бугыг нь хөлөглөж явна. Тэнд очмогц Скоттын сахал нь бууралтан ургаж, таргалж эхлэх бөгөөд энэ бүхэн залууд огтхон ч таалагдахгүй тул урьдын байдалдаа буцаж орохыг хичээх аж. Хөгжилтэй үйл явдлаар дүүрэн энэхүү уран бүтээлийг та урьд өмнө хэд хэд үзсэн гэдэгт итгэлтэй байна.
3
"Elf’"
Нээлт: 2003 оны 11 сарын 7
Найруулагч: Жон Фавро (Jon Favreau)
Гол дүр: Вилл Феррел (Will Ferrell)
Үйл явдал: Бага балчир байхдаа ид шидийн хүчээр хойд туйлд хүрч ирсэн Бадди хүүг бүгд одой гэж бодон өсгөнө. Гэвч цаг хугацаа өнгөрөх тусам тэрээр улам бүр томорч, бусдаасаа хэд дахин том биетэй болсноор хойд туйлд амьдрах аргагүй болох аж. Тиймдээ ч Бадди өөрийн жинхэнэ гэр бүлээ олохоор алс холын аянд гарна.
4
"How the Grinch Stole Christmas"
Нээлт: 2000 оны 11 сарын 17
Найруулагч: Рон Ховард (Ron Howard)
Гол дүр: Жим Кейрри (Jim Carrey)
Үйл явдал: Энэхүү гайхалтай уран бүтээлийг урьд өмнө үзэж байгаагүй хүн гэж үгүй болов уу? Зул сарын баярыг үзэн яддаг Гринч хүн бүхнээс баярыг нь булаах гэж элдэв арга сэдэж, дүрсгүйтэнэ. Харин түүнийг халуун дулаан сэтгэлтэй, бусдыг хайрлаж чаддаг нэгэн болгож хувиргасан хүн бол яахын аргагүй сэргэлэн бяцхан охин билээ.
5
"Home Alone"
Нээлт: 1990 оны 11 сарын 16
Найруулагч: Крис Колумбус (Chris Columbus)
Гол дүр: Маколей Калкин (Macaulay Culkin)
Үйл явдал: Шинэ жилийн кино гэхэд хамгийн түрүүнд "Гэртээ ганцаараа" санаанд буудаг. Хүн бүрийн хүсэн хүлээдэг баярыг энэхүү киногүйгээр төсөөлөхийн аргагүй юм. Гэртээ ганцаар үлдсэн Кевин гэх бяцхан хүү гэрийг нь тонохоор ирсэн хорон санаат хулгайчдыг чадаж, дөнгөх хөгжилтэй түүх бидний сэтгэлд хэдийн гүн шингэж, хэзээ ч мартагдашгүй дурсамж бүтээжээ.
6
"Би чамд хайртай"
Нээлт: 1985 оны 8 сар
Найруулагч: Б. Балжинням
Гол дүр: Л. Эрдэнэбаяр, Н.Бадрал, С.Пүрэвмаа
Үйл явдал: Хэдийгээр тус уран бүтээлийг шинэ жилийн кино гэхэд бага зэрэг зөрөх боловч хамгийн гол үзэгдэл, хүн бүрийн сэтгэлд хоногшсон хэсэг нь өвлийн өвгөн, шинэ жилтэй салшгүй холбоотой байдаг. Анхны хайр дурлал, гэгээн бүхнийг танд мэдрүүлэх Монголын сор болсон бүтээлүүдийн нэгийг баярын өдөр тухлан сууж үзээрэй.
7
"Ёлки"
Нээлт: 2010 оны 12 сарын 10
Найруулагч: Тимур Бекмамбетов
Гол дүр: Иван Ургант, Сергей Светлаков, Вера Брежнева
Үйл явдал: Орос улсын өнцөг булан бүрт оршин суух хүмүүсийн хайр сэтгэл, гэр бүлийн уур амьсгал бүх л зүйлийг шигтгэсэн уран бүтээл билээ. Тэд энд тэндгүй оршин суух боловч өөр хоорондоо ямар нэгэн байдлаар холбогдож, адал явдалтай учрах төдийгүй шинэ жилийн орой сайн зүйл хийхэд тэр нь бумиранг шиг буцаад ирэх болно гэх утга санааг агуулдаг юм. Энэхүү уран бүтээл нь нийтдээ 3 ангитай.
8
"Ирония судьбы, или С легким паром"
Нээлт: 1975 оны 12 сарын 31
Найруулагч: Эльдар Рязанов
Гол дүр: Андрей Мягков, Барбара Брыльска
Үйл явдал: Шинэ жилийн уур амьсгалыг төрүүлж, мөнхийн баяр баясгалан, аз жаргалыг бэлэглэгч тус уран бүтээлийг үзэлгүйгээр шинэхэн оноо угтана гэдэг утгагүй. Баярын үдэш Женя Лукашин найзуудтайгаа ууранд орсны дараа санамсаргүй байдлаар Москва хотоос Ленинград хотод очсон байх болно. Үүнийгээ мэдээгүй эр гэртээ ирлээ гэтэл Ленинград хотод байрлах яг адил хаяг, байшин бүр түлхүүр нь хүртэл таарах айлд хүрч ирнэ. Тус байранд Надья гэх бүсгүй амьдардаг бөгөөд тэдний үл ойлголцол, гайхалтай давхцал хамгийн гайхалтай шинэ жилийн баярыг авчирч, амьдралыг нь тэр чигт нь өөрчлөх болно.
