"Forbes" сэтгүүлээс уг жагсаалтыг гаргахдаа тухайн алдартны нэг жилийн дотор олж буй ашиг орлогын хэмжээг үндэслэн гаргадаг байна. 

 

15 Дуэйн Жонсон (Dwyane Johnson) - 64.5 сая доллар

Бид бүхний хэлж заншсанаар нохой зодооны амьд домгуудын нэг болох тэрээр кино урлагийн салбарт хөл тавьснаар түүний ашиг орлого сүүлийн хэдэн жил эрс нэмэгдэх болсон юм. Нохой зодооны фэнүүдэд "The Rock" гэх нэрээрээ алдаршсан түүний хувьд энэ жил амжилт бүтээлээр арвин байсан бөгөөд 11/23-нд түүний дуу оруулсан "Moana" гэх хүүхэлдэйн кино дэлхий даяар нээлтээ хийх юм байна. Сонирхуулж хэлэхэд түүнийг хүмүүс "Fast & Furious", "Pain & Gain", "G.I. Joe: Retaliation" болон "The Scorpion King" гэх зэрэг кинонуудад тоглосноор нь илүү сайн мэддэг билээ.

14 "Rolling Stones" - 66.5 сая доллар

Дэлхийн алдарт хамтлагуудын нэг болох "Rolling Stones"-ийг мэдэхгүй, дууг нь сонсож байгаагүй хүн тун цөөхөн биз ээ. 50 гаруй жилийн хугацаанд дуу хөгжим сонирхогчдыг гайхалтай уран бүтээлүүдээрээ хөглөж буй тэдний хувьд энэ жил их, бага хэмжээний нийт 27 шоунд оролцож, ая дуугаа өргөсөн байна.

13 Рожер Федерер (Roger Federer) - 68 сая доллар

Цагийн сайханд дэлхийн чансааны нэгт бичигдэж явсан түүний хувьд сүүлийн жилүүдэд карьер нь бага зэрэг уруудаад байгаа гэж хэлж болох бөгөөд өдгөө дэлхийн чансааны 16-р байранд эрэмбэлэгдэж байгаа ажээ. Харин тэрээр 2016 онд олсон нийт ашиг орлогынхоо 8 сая долларыг тэмцээнд оролцож, ялалт байгуулснаасаа хамаарч олсон бол үлдсэн 60 гаруй сая долларыг хамтран ажилладаг, ивээн тэтгэгч байгууллагуудаасаа олжээ. Сонирхуулж хэлэхэд Швейцарь залуу дэлхийн алдарт "Nike", "Rolex" болон "Mercedes Benz" зэрэг компаниудтай хамтран ажилладаг юм байна. Түүний нийт хөрөнгийг ойролцоогоор 350 сая доллар гэж эх сурвалжууд мэдээллэж байгаа аж.

12 Рианна (Rihanna) - 75 сая доллар

Сүүлийн 10 гаруй жилийн турш гаргасан уран бүтээлүүд нь хит болж, улс орнуудын чартуудыг тэргүүлж буй түүн шиг гайхалтай дуучин тун ховор билээ. Рианна энэ жил өөрийн "Anti" гэх нэртэй шинэ цомгоо гаргасан бөгөөд түүнээс гадна хэд хэдэн удаагийн томоохон шоунуудад уригдаж, уран бүтээлүүдээсээ толилуулсан байна. Мөн Рианнатай хамтран ажилладаг "Puma", "Dior" болон "Samsung" зэрэг компаниудын хамтын ажиллагааны үр дүнд тэрээр багагүй мөнгийг халааслаад амжсан нь ойлгомжтой биз ээ.

11 Эллен ДеЖенерес (Ellen DeGeneres) - 75.1 сая доллар

"The Ellen DeGeneres Show" гэх телевизийн цуврал шоу нэвтрүүлгээрээ хэдийн хүмүүсийн танил болсон тэрээр нэр алдарт хүрэхийн хэрээр хэмжээлшгүй их эд хөрөнгийн эзэн болж байгаа нь нууц биш юм. Түүний хөтлөж, олонд хүргэдэг дээрх шоуг дунджаар 3.6 сая хүн тогтмол үздэг гэсэн судалгаа байдаг бөгөөд үүнээс түүнийг хэр алдартай болохыг харж болох ажээ. Сонирхуулж хэлэхэд Эллен саяхан нээлтээ хийсэн "Finding Dory" хүүхэлдэйн киноны гол дүр болох Дорид дуу оруулсан байна.

10 Мадонна (Madonna) - 76.5 сая доллар

58 настай хэдий ч, одоог хэр нь гоо үзэсгэлэнтэй хэвээрээ байгаа Мадоннаг хүмүүс 1980-аад оноос эхлэн сайн мэдэх болсон билээ. Гайхалтай чадварлаг дуулахаас гадна гоо үзэсгэлэнгээрээ хүмүүсийн харааг булааж явдаг тэрээр энэ жил тайзнаа эргэн ирж, "Rebel Heart" гэх нэртэй аялан тоглолтоо тоглож, олон сая фэнүүдийгээ баярлуулаад амжсан юм. Мадонна бизнесийн салбарт хэдийн өөрийн байр сууриа олсон нэгэн бөгөөд өдгөө гадуур хувцас болон гоо сайхны хэд хэдэн дэлгүүрүүдтэй юм байна. "Попын хатан хаан" маань өнөөдрийн байдлаар нийт 560 сая долларыг өөрийн болгоод байгаа юм.

9 ЛеБрон Жэймс (LeBron James) - 77 сая доллар

Энэ цагийн сагсан бөмбөгийн спортын нүүр царай болсон тамирчин болох ЛеБрон Жэймсийг мэдэхгүй спорт сонирхогч байхгүй гэдэгтэй мөрийцэхэд ч бэлэн байна. Сагсан бөмбөгийн фэнүүдийн дунд "Хаан Жэймс" гэх нэрээрээ алдаршсан түүний хувьд улиран одож буй энэ жил ололт амжилтаар дүүрэн байсан гэхэд хилсдэхгүй. Учир нь тэрээр 2015-2016 оны "NBA"-ийн аварга цолыг хүртэж, финалын үнэ цэнэтэй тоглогчийн шагналыг өөрийн болгосон билээ. Түүнээс гадна хэд хэдэн рекорд амжилтуудыг эвдэж, эзэмших болсныг хэлэх нь зүйтэй болов уу. Түүнчлэн 2015 онд спортын бэлэн хувцас, хэрэглэл үйлдвэрлэдэг, дэлхийн алдарт "Nike" компани ЛеБрон Жэймстэй насан туршийн хамтран ажиллах гэрээ байгуулсан бөгөөд энэ нь түүний ашиг орлого нэмэгдэхэд ихээхэн түлхэц болсон нь ойлгомжтой.

8 Адель (Adele) - 80.5 сая доллар

"Rolling in the Deep", "Hello", "Someone Like You" гэх зэрэг дуунуудаараа олон сая фэнүүдтэй болсон Британийн нэрт дуучин бүсгүй энэ жагсаалтанд орсон явдалд гайхаад байх зүйлгүй юм. Түүний хувьд 2016 онд өөрийн ээлжит аялан тоглолтоо хийж, дэлхийн олон сая фэнүүдийгээ баярлуулаад амжсан билээ.

7 Лионел Месси (Lionel MessI) - 81.5 сая доллар

Аргентины шигшээ баг болон Испаний Ла Лигийн алдарт Барселона (Barcelona) клубын довтлогч Лионел Месси клуб болон хамтран ажиллагч байгууллагуудтай хийсэн гэрээний дагуу багагүй мөнгийг халаасласан бөгөөд амжилтын хувьд харьцангуй даруухан байсан билээ. Карьертаа нийт 5 удаа дэлхийн шилдэг хөл бөмбөгчнөөр нэрлэгдээд байгаа Лионел Месси энэ жил уг нэр хүндтэй шагналыг 5 дахь удаагаа хүртэх үү, эсвэл Криштиану Роналдо (Cristiano Ronaldo)-д алдах уу гэх яриа хөл бөмбөгийн хорхойтнуудын дунд яригдаж буй гол сэдэв байсаар байгаа нь нууц биш юм.

6 Ховард Стерн (Howard Stern) - 85 сая доллар

Түүнийг энэхүү жагсаалтанд нэлээн дээгүүр бичигдэхэд нь 2015 онд "Sirius XM Radio"-той байгуулсан 5 жилийн гэрээ нь ихээхэн түлхэц үзүүлсэн юм. Түүнийг хүмүүс "America's Got Talent" шоунд шүүгчээр ажилладгаар нь илүү сайн мэдэх биз ээ.

5 Кевин Харт (Kevin Hart) - 87.5 сая доллар

Сүүлийн үед бүхий л инээдмийн төрөл жанрын кинонд өөрийн дүрээ мөнхлөх болсон тэрээр кино урлагийн салбарт аль хэдийн хувийн орон зайгаа бий болгож, хүмүүсээс асар их хүндлэлийг хүртэх болсон билээ. 2016 он жүжигчин залуугийн хувьд ололт амжилт арвинтай байсан бөгөөд "Central Intelligence", "Kevin Hart: What Now?" болон "Ride Along 2" зэрэг дэлгэцийн бүтээлүүдэд тоглоод амжсан юм.

4 Криштиану Роналдо (Cristiano Ronaldo) - 88 сая доллар

Дэлхийн хамгийн шилдэг хөл бөмбөгчдийн нэг болох тэрээр 2016 онд Франц улсад болсон Европ тивийн хөл бөмбөгийн АШТ-нд нутаг нэгтнүүдийнхээ хамт түрүүлж, шигшээ багийн өмсгөлтэй өргөхийг хүсч байсан нэг цомоо амжилттай өргөж, олон сая фэнүүдийгээ баярлуулснаас гадна Испаний алдарт эзэн хааны Реал Мадрид (Real Madrid) клубынхаа хамтаар "Champions League"-т түрүүлж, бүх цаг үеийн мэргэн буучдын жагсаалтыг ганцаараа тэргүүлж эхэлсэн гээд түүний хувьд жинхэнэ утгаараа ололт амжилтаар дүүрэн жил болж өнгөрсөн юм. Тэр ч үүднээ Криштиану Роналдог энэ жилийн дэлхийн шилдэг хөл бөмбөгчний шагналыг хүртэнэ хэмээн олон хүмүүс үзэж байгаа ажээ.

3 Жэймс Паттерсон (James Patterson) - 95 сая доллар

Дэлхийн алдар нэрэнд хүрсэн мундаг зохиолчдоос Жэймс Паттерсон ганцаараа уг жагсаалтанд орсныг харахад тэрээр салбартаа яах аргагүй шилдэг болох нь харагдаж байгаа биз ээ. Нийт 570 гаруй сая долларын эд хөрөнгөтэй түүний хувьд энэ жил "Alex Cross" гэх нэртэй олон ангит цуврал киноны зохиолыг бичсэн бөгөөд "The Witch and the Wizard", "Maximum Ride", "Daniel X and Woman's Murder Club" гэх зэрэг олон цуврал кинонуудын зохиолыг бичиж байсан нэгэн билээ.

2 "One Direction" - 110 сая доллар

Охидын шүтээн болсон "One Direction" хамтлаг энэ жилийн жагсаалтыг удаалсан байна. Хамтлагийн нүүр царай гэгдэж байсан Заян Малик (Zayn Malik) 2015 онд хамтлагаасаа гарч байгаагаа албан ёсоор мэдэгдэж, олон сая фэнүүдийнхээ урмыг хугалж байсан хэдий ч, хамтлаг цааш уран бүтээлээ үргэлжлүүлэн хийсээр байгаа юм. Энэ жил тэдэн шиг олон шоу, арга хэмжээнүүдэд уригдан уран бүтээлээ хүргэсэн хамтлаг өөр байхгүй гэнэ.

1 Тэйлор Свифт (Taylor Swift) - 170 сая доллар

Анх "Country" чиглэлээр уран бүтээлээ гаргаж, олонд танигдаж эхэлсэн түүний хувьд өнөөдөр поп хөгжмийн амьд домгуудын нэг болтлоо өсч, дэвшсэн бөгөөд гаргасан дуу бүр нь хит болж байгаа гээд хэлчихэд төдийлөн буруудахгүй болов уу. Энэ жил тэрээр Хойд Америкаар өөрийн аялан тоглолтоо хийсэн нь асар их ашиг авчирсан байна. Эх сурвалжуудын мэдээллэж байгаагаар дуучин бүсгүйг 200 гаруй сая долларын ашигтай ажилласан гэж үзэж байгаа ажээ. Харин дуучин бүсгүй 200 сая доллар олсон гэх мэдээллийг үгүйсгээд байгаа юм. Ямартай ч тэрээр энэ жилийн жагсаалтыг тэргүүлжээ.