Гэхдээ өөрийг нь эмэгтэй ди-жей хэмээн хүлээн авах түүнд таалагддаггүй. “Би зүгээр л ди-жей, хөгжмийн продюсер хүн. Тэрнээс биш эмэгтэй ди-жей гэж дуудуулмааргүй байна” хэмээн тэрбээр нэгэн ярилцлагтаа дурдсан нь бий. “Ихэнхдээ эрчүүдтэй ажилладаг тохиолдолд маш шулуун шударга байх хэрэгтэй. Элдэв маяг хэрэггүй гэсэн үг. Миний анзаарснаар эмэгтэй ди-жей нарыг харагдах байдал талаас нь хандаж, хүлээн авах нь бий. Гэтэл хөгжим гэдэг бол хөгжим. Эрэгтэй эсвэл эмэгтэй биш”.
Харин 2000-аад оны эхэн үеэс интернэт айл бүрийг хэрэх болсноор дуртай зүйлдээ гүнзгийрсэн төдийгүй гялалзсан замналынхаа эхийг тавьсан юм. Багаасаа төгөлдөр хуур тоглож сурсан нь ч үүнд чухал суурь болсон биз.  “Ээж маань анх хөгжим, ялангуяа электро хөгжмийн чиглэлээр ажиллах эхлэхэд дургүйцсэн. Түүний бодлоор хөгжмийг ажил болгож, амьдралаа авч явах нь боломжгүй хэрэг байв.

Харин Сөүл дэх найзуудын нь хүүхдүүд миний фэн гэдгийг мэдээд арай өөрөөр хүлээж авах болсон шүү” хэмээн Токимонста ярьжээ. Солонгос хэлээр “Токи” гэдэг нь туулай гэсэн үг. Харин “Монста” нь англи хэлний мангас хэмээх үгийг төлөөлж буй. Уран бүтээл нь ч түүний хувьд эсрэг, тэсрэгийн нэгдэл. “Түрэмгий хэрнээ зөөлөн, бөмбөрийн хүчтэй хэмнэлүүд ба сул зөөлөн аялгуу”.

Тэгвэл электро хөгжмийн хамгийн чухал уран бүтээлчдийн нэг Токимонста ирэх сарын 14-нд Цонжин болдогт Чингис хааны морьт хөшөөт цогцолборт бүтээлээ толилуулах гэж байна. Тэрбээр энэ жил хоёр дахь удаагаа зохион байгуулагдаж буй “Хүннү” хөгжмийн наадмын хүрээнд манай улсад урилгаар тоглох юм. Орчин үеийн хөгжмөөр дамжуулан аялал жуулчлалыг Монголд хөгжүүлэх зорилготой эл наадамд өнгөрсөн жил Дэлхийн шилдэг 100 ди-жей жагсаалтад багтсан ди-жей Деррик Энтони, Бенжамин Ким, Макс Грахам нар урилгаар оролцож байв.