Яагаад ч мартах учиргүй Ялалтын баярын мэнд хүргэе!

2013-05-10, 04:22

18,306

Хүн төрөлхтөний түүхэнд хамгийн их хөнөөл сүйтгэл, үхэл хагацал тарьсан фашизмын аюулт тахлыг үлдэн хөөсөн агуу их "ЯЛАЛТЫН БАЯРЫН" (День победы) өдрийн мэнд хүргэе! Олон сая хүний амь нас халуун цусыг урсгасан энэ дайнд эх орноо хамгаалан боссон Орос Зөвлөлтийн ард түмэн онцгой гавъяа байгуулсныг Дэлхий мартах учиргүй билээ.

Яагаад ч мартах учиргүй Ялалтын баярын мэнд хүргэе!

Монголчууд бид ч энэ дайны хор уршгийг чамгүй амсаж эрэлхэг хөвгүүд маань эх орноо хамгаалан тулалдаж явсан түүх хуучраагүй байна. Фашизмын эсрэг тэмцэлд амь насаа алдсан монгол угсааны олон зуун охид хөвгүүдийн гэгээн дурсгалыг хүндэтгэе!

Ганц жишээ: Роберт Диаментийн авсан энэ зургын товч тайлбарт: "1944 оны 10 сард Мурманскийн дэргэд болсон тулалдааны үеэр мэргэн буудагч буриад Радна Аюшеев 25 немцыг устгасан" -гэсэн байна. Гайхалтай мэргэн буудсаныхаа ачаар энэ нэгэн буриад-монгол хөвгүүн сүүлчийн удаа фронтын сурвалжлагчын хальсанд мөнхөрчээ.

Радна Аюшеев 1922 онд Буриадын Жидийн аймгийн Янзагатай тосгонд 11 хүүхэдтэй айлын 3 хүүгийн отгон нь болж мэндэлжээ. 1940 онд 22 настайдаа цэрэгт татагдан Алс дорнотын армид байлдаж байгаад Умардын усан флот руу шилжин дайны халуун цэгт орсон байна. Тэрээр Мурманскийн ойролцоох Печенга хотыг чөлөөлөх тулалдаанд амь үрэгджээ. Цогцос нь олдоогүй тул эх нь бага хүүгээ эцсийн мөчөө хүртэл хүлээсэн гэдэг.