Оюун ухаан, мэдлэг, чадвар, урлаг, соёлын бүтээлүүдийн үнэлэмжийг нэмэгдүүлэх зорилгоор зохион байгуулагдсан “Mind Awards-2012” наадам хэд хэдэн зүйлээрээ онцлог байлаа. Юуны түрүүнд оны шилдэг улс төрч, эдийн засагч, нийгмийн зүтгэлтэн гэсэн уламжлалт номинацаас татгалзсан явдал. Харин үүний оронд оюун санааны манлайлагч залуучуудыг шагнаж урамшуулсан ажээ. Хоёрдугаарт ямар нэгэн улс төрийн шалгуур, намын харьяаллаас үл шалтгаалан шагналын эздийг тодруулсан явдал нь бусад залуучуудын байгууллагуудад үлгэр дууриалал болохуйц алхам болсон юм.

Ардчилсан намын дэргэдэх Ардчилсан Залуучуудын Холбоо /АЗХ/-оос зохион байгуулсан “Mind Awards-2012” наадмын шагналын эздийг танилцуулж байна.

“Оны Gegamind” номинацийн эзнээр В гепатитийн дархлаажуулалтын сүүлийн 20 жилийн үр дүнг үндэсний хэмжээнд нэгтгэн судалсны зэрэгцээ уг вирусын 57 шинэ дарааллыг тодорхойлж, Дэлхийн генийн санд байршуулан нийгмийн эрүүл мэндийг хамгаалах үйлсэд үнэтэй хувь нэмэр оруулсан ЭМШУИС-ийн Эпидемологи, биостатистикийн тэнхимийн эрхлэгч, доктор, залуу эрдэмтэн Д.Даваалхам тодорсон байна.

Өөрийн эрхэлж буй ажлаараа иргэд, олон нийтийн эрх ашгийг хамгаалж, шударга үнэний дуу хоолой болж буй Шударга өрсөлдөөн, хэрэглэгчийн төлөө газрын дарга О.Магнайг Оны “Freedom of Speech” шагналын эзнээр тодруулсан байна.

Хүүхэд, эмэгтэйчүүдийн эрхийг хамгаалах, хөгжлийн бэрхшээлтэй иргэдийн хүүхдүүд, орон гэргүй, нэн ядуу өрхийн хүүхдүүдийн эрх ашгийг хамгаалах, тэдэнд туслах чиглэлэээр идэвхитэй ажиллаж буй “Өөрчлөлтийн төлөөх залуу эмэгтэйчүүд” ТББ-ын Удирдах зөвлөлийн гишүүн З.Сарантуяа уг номинацийн эзнээр тодорлоо.

Ардчилсан нам, Ардчилсан Залуучуудын Холбооны удирдлагууд урилгаар оролцсон тус наадмын үеэр наадамд уригдан ирсэн зочид  хөгжлийн бэрхшээлтэй хүүхдүүдийн эцэг эхчүүдийн “Ээлтэй ертөнц” ТББ-ын гишүүдийн гараар хийсэн чихмэл бамбаруушийг худалдан авч, хөгжлийн бэрхшээлтэй хүүхдүүдийн сайн сайхны төлөө хөрөнгө оруулалт хийсэн нь олон хүний талархалыг хүлээсэн арга хэмжээ болсон юм.