Бүжгийн марафон

Америкийн Нэгдсэн улсад хамгийн анхны бүжгийн марафон буюу бүжгийн тэмцээн 1909 оны 12 сард Бьютт хотын Монтана мужид болсон байна. Энэхүү бүжигт 170 орчим хос оролцсон бөгөөд 15 цагийн турш үргэлжилсэн юм. Мөн дараагийн нэгэн бүжгийн марафон нь 1923 онд болсон аж. Харин энэ үеэр 32 настай Америкийн нэгэн бүжигчин эмэгтэй 27 цагийн турш зогсолтгүй бүжиглэж, 6 удаа хосоо сольж Английн рекордыг эвдсэн байна. Түүний энэхүү амжилт олны анхаарлыг татсан бөгөөд ялангуяа эмэгтэйчүүд ихэд гайхан биширцгээж байв.

Бүжгийн марафоныг шүүхдээ ихэвчлэн бүжгийн ур чадвар гэхээсээ илүү бүжигчний тэсвэр тэвчээрийг шалгадаг байсан байна. Марафон бүр өөрийн гэсэн дүрэмтэй байдаг бөгөөд энд марафонд оролцогчийг хэрхэн яаж амьдрахыг тогтоодог байсан аж. Марафонд оролцогч хосууд заавал хамтдаа бүртгүүлсэн байх ёстой бөгөөд хэрвээ хамтрагч нь марафоныг орхивол нөгөө хос нь мөн орхих ёстой гэнэ. Бүжигчдэд амрах, хувцсаа солих, унтах зэрэгт цаг бүрийн 15 минутыг өгдөг байсан байна.

Марафоны ялагчид ихэд даруухан шагнал хүртдэг байсан аж. Хамгийн урт хугацааны бүжгийн марафон 1930 оны 8 сарын 29-өөс 1931 оны 4 сарын 1-ийн хүртэл буюу 5152 цаг, 214 өдөр Чикаго хотод үргэлжилсэн байна. Тэмцээний ялагч болох хосууд 2000 долларын шагнал хүртсэн ажээ. Зарим мэдээллээс харахад энэхүү бүжгийн марафон шууд болон шууд бусаар заримдаа хүмүүсийн үхлийн гол шалтгаан болж байсан аж. Марафонд оролцогч хүмүүс 87 цагийн турш амралтгүй бүжиглэснээс болоод амиа алдаж байсан учраас зарим нэг улсад 1923 оноос эхлэн хориглосон байна.