Гэвч сүүлийн жилүүдэд Монгол оюутнуудад Америкийн болон дэлхийн шилдэг их дээд сургуульд суралцах боломж бололцоо асар ихээр нэмэгдэж байгаа билээ. Тухайлбал 2007 онд Харвардын их сургуулийн бакалаврын зэрэгт хамгийн анхны Монгол оюутан тэнцэж байсан бол энэ жил Харвардад хоёр ч Монгол оюутан эрдмийн аянд мордохоор зэхэж байна. Мөн түүнчлэн сүүлийн ганц нэгхэн жилд Америкийн бусад олон шилдэг их дээд сургуулиудад Монгол хэмээх нэрийг анх дуурсгаснаар харьцангуй олон оюутнууд маань суралцах явж байгаа билээ. Эдгээр шилдэг сургуулиудад цөөхүүлээ боловч амжилттай суралцаж байгаа Монгол оюутнууд маань нэгдэн өнгөрсөн онд “Америк дахь Монгол Оюутны Холбоог” (АМОХ) Сүхбат (Wesleyan University), Анударь (Columbia University), Билгүүн (Harvard University), Зоригоо (Harvard University), Буяннэмэх (Mount Holyoke College), Тэмүгэ (MIT), Өлзийбаяр (MIT) гэсэн удирдах зөвлөлийн долоон гишүүдтэйгээр байгуулж одоогийн байдлаар 60 гаруй бусад Монгол оюутнуудыгаа нэгтгээд байгаа юм. АМОХ нь эхний үйл ажиллагаагаа 2012 оны өвөл Монголын ерөнхий боловсролын 11 сургуулиуд дээр “Америкт хэрхэн тэтгэлэгтэйгээр суралцах болон Монгол залуус бидний давуу талууд” гэсэн сэдвүүдээр илтгэл тавин эхлүүлсэн бол одоо энэ зун Америкт суралцах хүсэлтэй хүн бүрт зориулан “Америкт Оюуны Хүчээрээ Суралцацгаая” уриан дор нэг өдрийн үнэ төлбөргүй мэдээ мэдээлэл бүхий томоохон уулзалт өдөрлөгийг зохион байгуулах гэж байна.
Өдөрлөгийн хүрээнд Америкийн шилдэг их дээд сургуулиудад тэтгэлэгтэйгээр суралцах боломжууд болон бусад сэдвүүдээр асуулт хариулт бүхий илтгэлүүд тавигдах аж. Мөн түүнчлэн Монгол оюутнуудын суралцаж эхэлсэн шилдэг их дээд сургуулиудын танилцуулгуудыг тус сургуульд суралцаж буй тухайн Монгол оюутан өөрөө хүргэх бөгөөд тус оюутнуудтай уулзаж ярилцах ховорхон боломж тохиож буй юм. Эцэст нь хэлэхэд тус өдөрлөг нь 6 сарын 16нд МУИС-н хичээлийн II байрны А заланд 14:00 – 17:30 цагийн хооронд болох юм.
Өдөрлөгийн төлөвлөгөө
Тус өдөрлөг нь нийт гурван цаг орчим үргэлжлэх бөгөөд сургуулиудын танилцуулга болон илтгэлүүд гэсэн хоёр үндсэн хэсгээс бүрдэх юм. Сургуулиудын танилцуулга нь 14:00 – 15:45 цагийн хооронд үргэлжлэх бөгөөд АМОХ-н гишүүд өөрсдийн суралцаж буй дараахь сургуулиудыг танилцуулахаар төлөвлөж байна:
1. Harvard University
2. MIT
3. Columbia University
4. Wesleyan University
5. Williams College
6. Brown University
7. Mount Holyoke College
8. Ohio State University
9. Princeton University
10. Cornell University
11. Cornell College
12. University of Minnesota
13. Kenyon College
14. Purdue University
15. Lindenwood University
