Их Британийн ерөнхий сайдын албан өргөө Даунинг Стритийн хурлын өрөөнд тухайн өдөр Борис Жонсоны төрсөн өдрийн үдэшлэг зохион байгуулагдсаныг тус улсын хэвлэлүүд анх илчилж байв.

Эхэндээ Жонсон уг арга хэмжээг албан уулзалт гэж тайлбарлаж байсан юм.

“Үүнийг дүрэм зөрчсөн үйлдэл гэж би бодоогүй. Гэхдээ цагдаа нар өөрөөр тайлбарлаж буй тул би мөрдөн байцаалтын үр дүнг хүндэтгэж байна” гэж Жонсон өчигдөр хэлжээ.

Жонсоноос гадна тус улсын сангийн сайд Риши Сунак бас торгуулийн шийтгэл хүлээсэн байна.

“Ковидын үеэр хүмүүс маш их зүйлээ золиосолсныг би мэдэж байгаа бөгөөд үүссэн нөхцөл байдал тэднийг бухимдуулсныг ойлгож байна. Ийм нөхцөл байдалд хүргэж, олон нийтийг бухимдуулсандаа би гүнээ харамсаж байна” гэж Сунак мэдэгдээд торгуулиа төлснийг бас мэдээлжээ.

Ерөнхий сайдын гэргий Кэрри Жонсон мөн үдэшлэгт оролцсоныхоо төлөө 50 фунт стерлингийн торгуулиар шийтгүүлсэн байна.

Лондон хотын цагдаагийн газар хөл хорионы үеэр засгийн газрын өндөр албан тушаалтнуудын оролцсон 12 найр наадмын арга хэмжээг мөрдөж байгаа бөгөөд хэвлэлүүд уг дуулианыг “partygate” гэж нэрлээд байгаа юм.

Одоо Их Британийн парламент улаан өндөгний баярын улмаас завсарлаад байгаа. Дөрөвдүгээр сарын 19-нд чуулган эхлэх үеэр Борис Жонсон, Риши Сунак нарыг албан тушаалаас нь огцруулах асуудал яригдаж болзошгүй байна.

Парламентын гол сөрөг хүчин Лэйбор намын тэргүүн Кэйр Стармер “Борис Жонсон, Риши Сунак нар хууль зөрчиж, Британийн ард түмэнд олон удаа худал ярьсан. Тиймээс тэд огцрох ёстой” гэж мэдэгджээ.

“Partygate”-ийн анхны дуулиан дэгдсэнээс хойш хоёр долоо хоногийн хугацаанд Жонсоны засгийн газар ямар нэг хууль дүрэм зөрчигдөөгүй гэсэн мэдэгдлийг 39 удаа хийж байсан гэнэ.

Лондон хотын цагдаагийн газар мөрдлөгийн үр дүнд нийт 50 торгуулийн арга хэмжээ аваад байна. Гуравдугаар сарын сүүлээр эхний 20 албан тушаалтанд торгуулийн шийтгэл оноосон бол өчигдөр нэмээд 30 хүнийг торгожээ.