Алс умард нутаг жилийн ихэнх үед цасан бүрхүүлтэй байх тул нарны хэт ягаан туяаг хамгийн ихээр ойлгодог. Ийм орчинд нүдний хамгаалалтгүй удаан явбал цасан дээр ойсон хэт ягаан туяа нүдний торлог бүрхэвчийг мэдэгдэлгүйгээр түлж гэмтээдэг байна. 

Цасанд гялбахаас хамгаалах энэхүү саравчийг ихэвчлэн гацуур мод, далайн морины соёо, ясаар хийх боловч зарим тохиолдолд арьсаар ч хийсэн байх нь бий. Түүнчлэн дээрх материалууд байхгүй үед өвс ногоо, хус модны холтос, замаг зэргийг ашигладаг байна.

Ийнхүү олон төрлийн эд материалаар хийгддэг саравч нэгэн хэлбэр загвартай олдох нь туйлын ховор.

Ажиллах зарчмын хувьд зорж гаргасан нарийн нүхээр нарны гэрэл маш бага нэвтрэн ордог бол дотор талыг нь нарны гэрэл ойн нүд гялбахаас сэргийлж, хөө ашиглан хар бараан өнгөөр будсан байдаг ажээ. 

Хэдий ийм нарийхан нүхээр эргэн тойрныг харахад хэцүү санагдавч зүүгээд дасчихвал маш эвтэйхэн, тэр ч байтугай холын зүйлсийг илүү тод хардаг ажээ.

Хэдийгээр өнөөгийн бидний мэдэх нарны шилнээс тэс өөр харагдах боловч иггаака хэмээн нэрийддэг Канадын инуйт нарын энэ нэршлийг орчуулбал “нарнаас хамгаалах саравч” гэсэн утга гардаг байна.

Энэ мэтчилэн хүнд хэцүү орчин нөхцөлд аж төрдөг умард нутгийн уугуул иргэдийн зохион бүтээсэн олон зүйлс бидний өнөөгийн амьдралд нэвтэрсэн байдаг ажээ.