Олон жилийн өмнө нөхрөөсөө салж, гурван хүүхдээ ганцаараа өсгөхөөр Канадаас АНУ-ыг зорьж ирсэн тэрээр хүүхдүүддээ чанартай боловсрол эзэмшүүлж, өнөөгийн амжилтад нь хүрэхэд маш том хувь нэмэр оруулж чадсан бөгөөд үүний төлөө бүхий л амьдралынхаа туршид ядарч туйлдахыг умартаж хичээн ажиллажээ.

Мей 14 наснаасаа загварын ертөнцөд хөл тавьж карьераа эхлүүлж байв. Үүнээс гадна тэрээр мөн л залуудаа Өмнөд Африкийн Orange Free State их сургуульд хоол зүйч мэргэжлээр суралцаж, эрүүл хооллолтын мэргэжилтэн болсон байна. 

Мей бүхий л амжилтаа ямар ч эрэгтэй хүний туслалцаагүйгээр гагцхүү өөрийн хүчин чармайлтаар бий болгож чадсан учир залуу охид, бүсгүйчүүд түүнээс урам зориг авдаг. 

Тэрээр 2019 онд эмэгтэйчүүдэд зориулсан "A Woman Makes a Plan: Advice for a Lifetime of Adventure" номоо хэвлүүлж, бүсгүй хүн өөртөө цаг үргэлж шинэ зорилго, сорилт тавих нь хэчнээн чухал болохыг батлан харуулсан байна.

Цагаан саарал үсийг тренд болтол нь сурталчилж чадсан Мей нас бол зүгээр л тоо төдийхөн зүйл гэдгийн бодит жишээ юм. Түүний хувьд эмэгтэй хүний гоо үзэсгэлэн бол бие физиологийн эрүүл мэндийн толь аж.