Арга хэмжээг нээн Zangia.mn-ийн захирал Б.Түвшинтулга шинээр хэрэгжүүлж буй болон хэрэгжүүлэхээр төлөвлөсөн төслүүдийн талаар танилцуулга хийж гар утасны апликейшны шинэ хувилбараа зах зээлд нэвтрүүлсэн тухай таатай мэдээг хүргэлээ. Мөн бүх иргэдийг англи хэлтэй болгох зорилгоор ҮНЭГҮЙ ОНЛАЙН АНГЛИ ХЭЛ-ний сургалтыг Zangia.mn вебсайтаас болон гар утасны апликейшнаас хүлээн авч үзэх боломжтой болсон тухай мэдээлсэн юм.

Манай 30 дахь удаагийн “HR Event”-ийн сургалтыг "Байгууллагын нүсэр бус төсөр зарчим” сэдвээр "Шинэ Монгол ахлах сургууль”-ийн захирал асан П.Наранбаяр/Ph.D/ заасан бөгөөд 120 байгууллагын 150 гаруй удирдах албан тушаалтнууд болон хүний нөөцийн менежерүүд оролцсон.

"Байгууллагын нүсэр бус төсөр зарчим” сэдэвт сургалт маань чөлөөт харилцан яриа хэлбэрээр, практик дээр суурилагдан явагдсан ба П.Наранбаяр багш маань оюуны цар хүрээгээ тэлэн ном уншиж байхыг ирсэн зочдод зөвлөж байлаа. “ТӨСӨРТ ЭНГИЙН ОРШИЖ, ЭНГИЙН НЬ АГУУ ЧАНАРЫГ БҮТЭЭДЭГ” гэсэн мэргэн үгээр сургалт өндөрлөж “Networking” хэсэг эхэлсэн. Хүрэлцэн ирсэн хүний нөөцийн салбарынхан маань сургалт болон хүний нөөцийн салбарт тулгараад буй асуудлууд, тэдгээрийн гарц, шийдлүүдийг ярилцаж, санал бодлоо хуваалцан нэгэн үдшийг өнгөрүүллээ.

Нийт хүний нөөцийн салбарын хамт олондоо удахгүй болох  "Хүний нөөцийн ажилтны өдөр"-ийн мэндийг хүргэе.

Zangia.mn Монголын иргэн бүрд ажлын байр!