1
Жавари Хөндий, Бразил (Vale do Javari)
Дэлхийн хамгийн бөглүү газруудын нэг, Амазоны 14 гаруй омгийнхны гэр болсон Вале до Жавари нь Австри улсаас ч өргөн уудам газар нутагтай. Өнгөрсөн 3-р сард уугуул иргэдийн зөрчилдөөн, 2 омгийн дайсагналыг намжаахын тулд Бразилын засгийн газраас арга хэмжээ авч, аялал жуулчлалыг хөгжүүлж байгаа гэнэ.
2
Ядуусын хороолол
Ямар ч хотын газрын зургийг хайж үзэхэд гудамж, цэцэрлэгт хүрээлэн, хурдны зам, барилга байгууламжууд нь тодорхой гарч ирдэг. Гэхдээ зарим хотуудад тэдгээр өнгө үзэмжтэй, тансаг барилгууд нь бодитой оршдоггүй. "BBC Future"-ийн онцолсноор Бразилын Рио-де-Жанейро, Нигерийн Лагос зэрэг хотуудын ядуусын хороолол цахим газрын зураг дээр гарч ирдэггүй байна. Учир нь тэнд аялах болон амьдрахад тохиромжгүй тул үзүүлээд байх шаардлагагүй гэж үздэг ажээ. Гэхдээ л дэлхийн хаана ч ядуурал байдаг, түгээмэл зүйл шүү дээ.
3
Элсэн Арал, Шинэ Каледони (Sandy Island)
Зарим газар нутаг дэлхий ертөнцөд бий мөртлөө газрын зурагт тэмдэглэгдээгүй байдаг. Харин газрын зурагт тэмдэглэгдсэн мөртлөө ердөө ч оршдоггүй газар бас байдаг ажээ. Үүний нэг жишээ бол дэлхийн газрын зураг, усан замын газрын зураг, Google Earth газрын зурагт хүртэл тэмдэглэгдсэн мөртлөө үнэн хэрэгтээ манай дэлхийд огт байдаггүй Элсэн Арал юм. Эрдэмтэд уг арлыг Австрали, Шинэ Каледони хоёрын дунд бий хэмээн судалсан ч ямар ч ийм арал олдоогүй бөгөөд урд өмнө нь хэзээ ч байгаагүй гэжээ. Хэдэн зууны туршид газрын зурагт тэмдэглэгдсэн энэ арлыг зарим эрдэмтэд гарч ирсэн шигээ буцаад алга болчихсон ч гэж үздэг байна.
4
Юкатаны сенот (Yucatan Cenotes)
Мексикийн Юкатан хойгт усан доогуур хэдэн мянган км үргэлжлэх агуйнууд эртний Маяачуудын үеэс хойш судлагдаагүй үлдсэн бөгөөд газрын зурагт тэмдэглэгдээгүй байдаг байна.
5
Гангхар Пуэнсум (Gangkhar Puensum)
Оргилд нь хүн гарч байгаагүй дэлхийн хамгийн өндөр уул болох Гангхар Пуэнсум нь газрын зурагт мөн тэмдэглэгдээгүй байна. Гэхдээ үүнийг зарим шашны үзлээр тайлбарладаг. Бутаны иргэдийн хэлж буйгаар энэ уул нь олон зууны турш буддын гэгээнтнүүдийн даяанчилдаг байсан уул бөгөөд бурхдын газарт тооцогддог ажээ. Хэдий олон мянган уулчид энэ өндөр оргилд гарах гэж Google Earth ашигладаг ч ямар ч үнэн мэдээлэл байдаггүй гэжээ.
6
Патагониа (Patagonia)
Аргентин, Чили улсуудын нутагт хэдэн мянган км сунан үргэлжилдэг Патагоны бүс нутаг нь маш бөглүү, хүн очих аргагүй ширэнгэн ой, мөсөн голуудтай алслагдмал нутаг учир өнөөг хүртэл газрын зургийг нь бүрэн гаргаж чадахгүй байгаа ажээ.
7
Хойд нутгийн ойн бүс, Мьянмар
Зүүн Өмнөд Азийн тус оронд олон жилийн турш тавьсан эдийн засгийн хориг нь энэхүү үзэсгэлэнт ойг хэвээр нь хадгалж үлдээхэд чухал үүрэг гүйцэтгэжээ.
Гэхдээ өдгөө ойн талбай хумигдаж, зарим төрлийн ховор амьтны зүйлүүд ч мөхсөн байна. Энэ газарт авто зам байхгүй учир хүн төрөлхтөн энд яг юу болж байгааг судалж тооцоолох бараг л боломжгүй зүйл. Зарим эрдэмтэд энэ ой газрын зурагт тэмдэглэгдэхээсээ ч өмнө алга болж магадгүй гэж үзэж байна.
8
Хойд Сентинел арал (North Sentinel Island)
Мьянмарын зүүн өмнөд хэсэгт орших Андаманы арлуудын нэг болох Хойд Сентинел арлын байгаль хэвээр хадгалагдан үлдсэн ч одоо ч газрын зурагт тэмдэглэгдээгүй байдаг аж. Тус арал дээр амьдардаг нутгийнхан нь гадаад ертөнцтэй ямар ч харилцаа холбоогүй бөгөөд ойртсон хүмүүст маш таагүй, хэрцгий хандаж буцаадаг байна. Тиймээс энэ газар дэлхийн хэзээ ч очиж болохгүй газруудын нэгт тооцогддог.
9
Далайн ёроол
Дэлхийн гадаргын 74 хувийг далай тэнгис, ус бүрхсэн байдаг. Хэдий хүн төрөлхтөн далай тэнгисийн ёроолыг газрын зурагт буулгасан ч үнэндээ нарийвчлал багатай, бүгдийг багтаагаагүй байдаг аж. Бүр Сар, Ангараг, Сугар гарагийн газрын зургаас ч бага нарийвчлалтай байдаг байна.
10
Эргийн шугамууд
Далайн усны төвшний нэмэгдэл, хүчтэй шуурга, үер зэрэг цаг уурын өөрчлөлтөөс болж далайн эрэг орчмын бүс өөрчлөгддөг учир газрын зураг, тэмдэглэгээг нь заримдаа өөрчлөх хэрэгтэй болдог. Зарим эргийн нутгуудад очиход дэндүү аюултай байдаг учир газрын зурагт тэмдэглэх боломжгүй байдаг ажээ.
