10
Роберто Клемент онгоцны ослоор өөд болсон нь
Роберто Клемент (Roberto Clemente) бол MLB лигийн 18 улирлын турш "Pittsburgh Pirates" багт тоглож, шилдэг цохигчоор 4 удаа шалгарч, 1966 онд лигийн MVP шагнал хүртэж, Алтан бээлий шагналыг 12 удаа дараалан авч, хоёр удаа Дэлхийн цомын тэмцээнд аваргалж байсан домогт бэйсболчин юм.
Талбай дээр ийнхүү олны дэмжлэгийг хүлээсэн тамирчин мөн сайн үйлс хийж, Латин Америк гаралтай иргэдийг ахуй амьдралаа сайжруулахад нь тусалдаг байжээ. 1972 оны 12 сарын 31-ний өдөр, Клемэнт Никарагуад болсон газар хөдлөлтийн дараа тус бүс нутагт тусламж үзүүлэхээр Пуэрто Рэкогоос нэгэн жижиг оврын онгоцонд суун нисчээ. Гэвч онгоц эргийн ойролцоо осолдож, тамирчны цогцсыг нь ч олоогүй хоцорсон байна. 1973 онд домогт тамирчны нэрийг бэйсболын алдрын танхимд хүндэтгэн байршуулсан юм.
9
2010 оны Олимпийн осол
2010 оны Ванкуверын өвлийн олимпийн нээлтийн өдөр явагдаж байсан чарганы төрлийн бэлтгэл уралдаануудын үеэр Гүржийн тамирчин, 21 настай Нодар Кумариташвили осолдож, улмаар замын хажуугийн төмөр шонг мөргөн амиа алджээ.
Тэрбээр эмгэнэлт явдлын өмнөхөн аавдаа Олимпийн чарганы зам аюултай санагдаж байгаагаа ярьж байжээ. Уг ослын дараа замын байрлалыг өөрчилж сайжруулсан бөгөөд улмаар 2014 оны олимпоор уг спортын төрөлд тамирчдын аюулгүй байдлыг хангах олон арга хэмжээг авсан юм.
8
Билл Мастертоны үхэл
Билл Мастертон дөрвөн жилийн турш Денвэрийн Их сургуулийн багт хоккэй тоглож, зургаан жил доод лигт тоглосны эцэст NHL-ийн анхны тоглолтоо Minnesota North Stars-ийн бүрэлдэхүүнд эхлүүлж байжээ.
NHL-ийн карьерийнхаа туршид нийт ердөө 38 тоглолт хийгээд байсан тамирчин 1968.01.13-д "California Seals" багийн эсрэг тоглох үеэрээ мөсөн дээр унаж толгойгоо цохин гэмтэл авсны улмаас хоёр өдрийн дараа 29 насандаа хорвоог орхижээ. Тэрээр одоог хүртэл мөсөн дээр гэмтэл авсны улмаас амиа алдсан цорын ганц тамирчин бөгөөд NHL-ийн зүгээс түүний дурсгалыг үүрд хүндэтгэх үүднээс жил бүр нэрэмжит цомыг нь гардуулдаг болсон.
7
Мюнхений онгоцны осол
1958.02.06-ны өдөр, английн хөлбөмбөгийн Манчестер Юнайтед багийнхан Югославт зочлон тоглож, "Црвена Звезда Белград" багтай 3:3 харьцаатай тэнцээд нутаг буцжээ.
Тэдний онгоц Мюнхен хотод шатахуун дүүргэхээр буугаад, эргэж хөөрөх оролдлого хийсэн ч удаа дараа амжилтгүй болсон ба тухайн үед шавар шавхай ихтэй байсан нь онгоцыг шаардлагатай хурдаа авахад саад болоод байжээ. Улмаар онгоц зурвасаас гарч байшин, мод мөргөн явсаар зогссон байдаг. Ослын үеэр нийт 23 зорчигч амиа алдсаны 8 нь Юнайтедын тоглогчид байжээ.
6
Дэйл Эрнхардтын үхэл
Дэйл Эрнхардт (Dale Earnhardt) бол карьерийнхаа тур нийт 7 удаа аварга болж чадсан NASCAR-н уралдааны алдарт алдарт нисгэгч юм. 2001 оны "Daytona 500" уралдааны үеэр сүүлийн тойргоо хийж байхдаа түүний машин хана мөргөсөн байна. Осол барианы шугамнаас ердөө километр гаруйн зайд болж өнгөрсөн бөгөөд хүү Дэйл Эрнхардт Жр. нь аавыгаа эмнэлэгт хүргэж амжсан хэдий ч алдарт тамирчин толгойн хүнд гэмтлийн улмаас 49 насандаа таалал төгсжээ.
5
"Локомотив Ярославль" багийнхны үхэл
2011.09.07-д, Оросын Континентал хоккэйн лигийн "Локомотив Ярославль" баг Беларусын Минск хот руу улирлын эхний тоглолтоо хийхээр "Як-42" онгоцоор ниссэн боловч хөөрөөд удаагүй байхдаа Ижил мөрний эрэг дээр осолдож шатсан ажээ.
Нийт 45 зорчигчийн 43 нь ослын үеэр амиа алдсан ба Павол Демитра, Руслан Салей, Карлис Скрастинс зэрэг хоккейн од тамирчдаас гадна алдарт дасгалжуулагч Брэд МакКримоннар ийнхүү амиа алдсан нь тус спортын ертөнцөд хүндхэн цохилт болсон юм.
4
Маршалл Их сургуулийн онгоцны осол
1970 оны 11-р сарын 14-нд, Маршалл Их сургуулийн америк хөлбөмбөгийн багийн сууж явсан онгоц Хойд Каролинагаас Баруун Виржини руу нисэх замдаа, ууланд осолджээ. Онгоцны нийт 75 зорчигч, тэдний дунд багийн 37 тамирчин, дасгалжуулагч, багийн эмч нар, тус их сургуулийн биеийн тамирын багш, 25 сэлгээний тоглогч бүгд газар дээрээ нас барсан байна. Тэдний дурсгалыг хүндэтгэж, оршуулах үйл ажиллагаа хэдэн долоо хоногийн турш үргэлжилсэн байдаг.
3
Хиллсборо цэнгэлдэх хүрээлэнгийн осол
1989 оны FA Cup-ын хагас финалд Ливерпүүл болон Ноттингхэм Форест клубүүд таарч мянга мянган (зөвшөөрөгдөх даац хэмжээнээс 3000 гаруй хүнээр хэтэрсэн) хөгжөөн дэмжигчид Хиллсборо цэнгэлдэхэд цугларчээ.
Хэт олон хүн байсны улмаас хөгжөөн дэмжигчид хашаа руу шахагдаж, улмаар 5 минутын дараа тусгаарлагч хашаанууд нурж хүмүүс дээр дээрээсээ давхарлан унажээ. Ослын улмаас 96 хүн амиа алдаж, 700 гаруй хүн бэртэл авсан байдаг.
2
Ле Мансын эмгэнэлт явдал
Авто спортын түүхэн дэх хамгийн аймшигт осол 1955 онд, "Le Mans" 24 цагийн уралдааны үеэр гарч байжээ. Уралдаан эхлээд хэдэн цаг өнгөрч байх үед, Британийн жолооч Майк Хоуторн анхны завсарлах зогсолтоо хийхээр огцом эргэлт хийсэн бөгөөд энэ үед түүний ард явж байсан Auston-Healey машин шарваж Мерседестэй явж байсан Франц жолооч Пьер Леветэй мөргөлджээ.
Улмаар Пьер Левегийн машин агаарт шидэгдэж, гурван хэсэгт хуваагдсан бөгөөд машины сэгүүд үзэгчид рүү асар хурдтай нисэн очиж, бүр аймшигтай явдал болсон байна. Ингээд зогссонгүй, уралдааны зохион байгуулагчид шатаж буй Мерседес рүү ус цацсанаас болж галын дөл үзэгчдийн суудлыг залгин авчээ. Ослоос болж амиа алдсан хүмүүсийн тоо тодорхойгүй бөгөөд хамгийн багадаа 80, зарим эх сурвалжид 130 гэж тооцдог.
1
Андын нурууны осол
1972 оны 10-р сарын 13-нд регбигийн “Old Christians” багийнхны сууж, Чилийн Сантьяго хотоос Уругвайн Монтевидео руу нисч явсан онгоц Андын нуруунд осолджээ. 20 гаруй зорчигч нь газар дээрээ нас барж хэдхэн цагийн дараа дахин 5 хүн, долоо хоногийн дараа нэг хүн шархаа даалгүй нас баржээ. Тэднийг аврахаар хэн ч ирсэнгүй, улмаар ослоос 17 хоногийн дараа, цасны нуралтын улмаас дахин найман хүн амиа алджээ.
Байгаль, цаг уурын хүнд нөхцөлд, хоол хүнс хомс, мөн тэднийг хайх эрэл зогссон талаар радиогийн мэдээг сонсож байсан бусад зорчигчид амьд үлдэхийн тулд амь үрэгдсэн бусдынхаа цогцсоор хооллохоос өөр аргагүй болж байжээ. Харин амьд үлдэгсдийн хоёр нь болох Роберто Канесса, Нандо Паррадо нар 10 өдрийн турш цас мөсөн дундуур амь тэмцэн зүтгэсний эцэст хүний бараа харж, тусламж олж авчирсан байдаг.
