Үзэгчдээс өндөр үнэлгээ авч чадсан "Титаник" кино нь 1997 онд дэлгэцнээ гарч, тухайн жилдээ Оскарын наадмаас 11 шагнал авч чадсан билээ. Өнөө хэр нь хүмүүс тухайн киног ярилцаж, гайхан биширдэг нь "Титаник"-ийн чанар чансааг харуулна. 

Тэгвэл бидний дунд өнөө хэр нь нууц хэвээр байгаа нэг зүйл бол Жейкийн амьд үлдэх боломж хэр байсантай холбоотой зүйл билээ. Хөлөг онгоц мөсөн уул мөргөж, хүмүүс хүйтэн далай руу унах үед, Рөүз нэг эвдэрхий хаалган дээр гарч хэвтдэг. Үнэн хэрэгтээ Жейк, Рөүзийн хажууд хэвтэж, амьд гарах боломж хангалттай байдаг. Үүнийг ч хүмүүс онолын үүднээс баталж, тэр хоёрыг багтах зай байгааг ч харуулсан. 

Харин тус киноны ерөнхий найруулагч Жеймс Камерон хүн бүрийн мэдэхийг хүссэн тус асуултанд хариулахдаа "Киноны эх зохиолын 147 хуудсанд угаасаа л Жейкийг үхэхээр дүрсэлсэн байсан. Хэрэв Жейк үхэлгүй амьд үлдсэн бол кино утгагүй болно. Гол санаа ч байхгүй болох байсан. Титаник эхлэхдээ Рөүз өөрийнх нь төлөө амиа зориулсан Жейкийг үгүйлэн санаж эхэлдэг шүү дээ" хэмээжээ.

Түүний хариултыг эргэцүүлэн бодвоос, үнэхээр "тийм ч" юм шиг. Сайн уран бүтээл үзэгчдэд заавал нэг асуулт үлдээж, олон жилийн турш яригдах ёстой хэмээгддэг. Тэгвэл Титаник бидэнд яахын аргагүй сонирхолтой асуулт үлдээж, олон таамаглал дэвшүүлэх боломжийг олгосонд нь талархах ёстой мэт...