1
Машины GPS
Мэдэхгүй замаар явах үед хамгийн үнэнч туслах нь GPS байдаг. Уг төхөөрөмжийг хамгийн анх "Мазда" компани 1990 онд хэрэглэж байсан ба үүнээс өмнө зөвхөн цэргийн зориулалттай байжээ. Гэсэн ч сүүлийн жилүүдэд хүн бүрийн ашиглах болсон ухаалаг утаснуудыг үйлдвэрлэхдээ л GPS суулгаж байгаа нь машиндаа суурьлуулдаг уг GPS-ыг хэрэглээнээс гаргах хамгийн том шалтгаан болж байгаа гэнэ.
2
Камер
GPS-тэй адилаар ухаалаг утас зах зээлд хүч төрөн орж ирснээс болж дижитал камерын борлуулалт эрс багассан. Үүний учир нь энгийн дижитал камертай харьцуулахад ухаалаг утас хэд дахин олон давуу талтайд оршино. Жишээлбэл та дижитал камераар авсан зурганд эффект оруулахын тулд авсныхаа дараа нь мэргэжлийн програмаар янзлах хэрэгтэй бол ухаалаг утсаар зураг авахдаа л хүссэн эффекттэйгээ авч болно. Түүнчлэн ухаалаг утсаар авсан зургаа та найз нөхөдтэйгөө тэр дор нь хуваалцаж болдог гэх мэт дурдаад барагдашгүй давуу талтай.
3
Түлхүүр
Бид түлхүүрийг машин, байшин, шүүгээгээ цоожлох, бусдаас хамгаалах зорилгоор ашигладаг. Гэсэн ч бидний хэрэглэдэг түлхүүр нь сул тал ихтэй буюу аюулгүй байдлыг тийм ч сайн хангадаггүй. Үүнийг орлох ирээдүйн технологи нь хурууны хээ, нүүр царай таних гэх зэрэг юм.
4
Алсын зайны удирдлага
Уг төхөөрөмжийн тусламжтайгаар зурагт, машины гараж, сэнс гээд маш олон зүйлийг бид зайнаас удирдаж болдог. Гэхдээ үүнийг ирээдүйд дуу хоолойгоороо удирдах технологи бүрэн эзэлнэ аж. Иймд бид 2025 он гэхэд зурагтын суваг солихын тулд удирдлагаа хайх шаардлагагүй болж цаг заваа хэмнэх боломжтой болох юм.
5
Флаш
Өмнөх зуунд гэхэд нэг өрөөний дайтай том байсан флаш өдгөө бидний халаасанд багтахуйц жижиг болтлоо хувьсан өөрчлөгджээ. Гэхдээ дэвшил үүгээр зогссонгүй сүүлийн хэдэн жилд хэрэгтэй мэдээллээ заавал флашанд бус үүлэн агуулахад хадгалах боломжтой болоод байгаа юм. Бидний сайн мэдэх Dropbox, Google Drive гэх зэргийг үүнд хамааруулан тооцож болно. Нэг үгээр та ирээдүйд заавал флаш авч явах бус бүх зүйлээ цахим орчин, үүлэн агуулахад хадгалдаг болох ажээ.
6
Төлбөрийн карт
Хэдийгээр карт ашиглахгүй төлбөр тооцоо төлдөг NFC технологи Монгол улсад өргөнөөр хэрэглэгдэж эхлээгүй ч Хятад, АНУ, Япон гээд технологийн тэргүүлэх орнуудад хаа сайгүй хэрэглэгддэг. Иймд та ирээдүйд түрийвч дүүрэн карт авч явах бус зөвхөн ухаалаг утастай байхад л хүссэн дэлгүүртээ төлбөр төлөх боломжтой болох юм.
7
Диск
Хэдхэн жилийн өмнө л бид дуртай шоу, цуврал киногоо дискээр авч зурагтаар үздэг байсан бол өнөөдөр ухаалаг утас, таблетны аль нэгэнтэй байхад л хаанаас хэзээ ч хүссэн үедээ үзэх боломжтой болжээ. Хэрэглээ нь өдөр тутамд багасаж байгаа диск 2025 он гэхэд хуучны төхөөрөмж л болж үлдэнэ гэнэ.
8
Суурин утас
Суурин утасны хэрэглээ өдрөөс өдөрт багасаж байгаа юм. Үүний шалтгаан нь өнөөх л ухаалаг утас. Камер, GPS, интернет гээд бүхнийг агуулсан ухаалаг утас байхад бидэнд суурин утас ямар хэрэгтэй байх билээ. Түүнчлэн цахим сүлжээгээр хүссэн хүнтэйгээ ямар ч үнэ төлбөргүй ярьж болж байгаа нь хүмүүс суурин утсыг мартаж эхэлж байгаа нэгэн шалтгаан нь юм. Одоогийн байдлаар зарим газар интернет тавиулахад суурин утас шаардаж байгаа ч тун удахгүй энэ асуудал шийдэгдэх нь гарцаагүй.
9
Жолоочтой машин
Хүн төрөлхтөн машинтай хамгийн анх 1886 онд танилцаж байсан түүх байдаг. Тэгвэл жолоочтой машинаас салах цаг ойртсоор байгааг нь судлаачид тэр ч байтугай бидэнд ч гэсэн ойлгомжтой болж байна. Үнэнийг хэлэхэд 2025 он гэхэд хотын замаар жолоочгүй машин явж байвал гайхах зүйлгүй билээ.
10
Нууц үг
Түлхүүртэй адилаар нууц үг ч гэсэн хэрэглээнээс бага багаар гарч байгаа юм. Энэ нь хүмүүс үсэг, тоо, тэмдэгтээс бүрдэх нууц үгийг чухал мэдээлэл хадгалахад хангалттай найдвартай биш гэж үзэж байгаатай холбоотой. Үүний оронд хүмүүс хурууны хээ, нүд таних систем гэх зэрэг дахин давтагдашгүй зүйлсийг ашигласан технологийг илүүтэйгээр сонирхож байгаа юм. Хэрэглэгчдийнхээ сонирхолтой уялдуулаад томоохон үйлдвэрлэгчид ч гэсэн эдгээр технологийг илүү сайжруулж байгааг бид мэдэх билээ.
