1
Амин дэмээр баялаг хоол хүнс иддэг
Дэлхий нийтээрээ Япончуудыг сүши иддэг, түүгээрээ алдартай гэдгийг мэддэг билээ. Ер нь япончууд хоол хүнсэндээ загас, далайн гаралтай бүтээгдэхүүн, жимс, будаа болон хүнсний ногоо гол төлөв хэрэглэдэг аж. Энэ нь хагас боловсруулсан бүтээгдэхүүн болон калори ихтэй хоол хүнсийг бодвол амин дэмээр баялаг байдгаас гадна, хүний эрүүл мэндэд ямар нэгэн сөрөг нөлөө үзүүлдэггүй байна.
2
Хоолоо бага хэмжээний тосонд болгодог
Япончууд хоолоо болгохдоо бусад улс үндэстний нэгэн адил жигнэж, гриллдэж, шарж болгодог. Харин тэд ингэхдээ маш бага хэмжээний тос ашигладаг бөгөөд энэ нь хоол хүнсэнд агуулагдах уураг, амин дэмийг алдагдуулахгүй байх давуу талтай байдаг гэнэ. Түүнчлэн төрөл бүрийн ногоотой шөл иддэг нь ходоод гэдэс, элэг болон бөөрөнд ач тустай байдаг ажээ.
3
Хоолны соёлыг эрхэмлэдэг
Хооллох соёл нь Япончуудын хувьд хамгийн чухал зүйлсийн нэгт зүй ёсоор тооцогддог. Тэд хоол идэхдээ нэг дор, яарч идэлгүй, бага багаар, удаан идэхийг илүүд үздэг. Хоолыг бага хэмжээгээр, удаан зажиллаж идэх нь эрүүл мэндэд сайн нөлөө үзүүлдэг болохыг та өмнө нь сонсож байсан болов уу? Тэгвэл Япончууд үүнийг ягштал баримталдаг байна.
4
Гурилан бүтээгдэхүүний оронд будаа хэрэглэдэг
"Та магадгүй цагаан будаа ч гэсэн хүнийг таргалуулж, жин нэмэхэд хүргэдэг биз дээ?" гэж бодож байж болох юм. Хэдий тийм боловч, цагаан будаа яавч гурилан бүтээгдэхүүн шиг хүнийг таргалуулдаггүй бөгөөд Япончууд цагаан будааг агшаахдаа давс болон тос хэрэглэдэггүй ажээ.
5
Өглөөний цай заавал уудаг
Хүмүүс ихэвчлэн ажил ихтэй, цаг зав багатайгаас болоод өглөөний цайгаа уулгүй, яарч сандран гэрээсээ гардаг нь нууц биш юм. Гэвч өглөөний цай уух нь эрүүл мэндэд ямар чухал нөлөө үзүүлдэг болохыг тэр бүр сайн мэддэггүй. Харин Япончууд өглөөний цайг заавал ууж байж, ажил төрөл, сургууль соёл руугаа явдаг байна. Тэдний өглөөний цайнд загас, будаа, омлет, далайн гаралтай бүтээгдэхүүн болон ногоон цай зэрэг хоол хүнс багтдаг юмсанж.
6
Амттанууд нь чихрийн агууламж багатай байдаг
Японыг амттаны эх орон гэж хэлэхэд төдийлөн буруудахгүй болов уу. Учир нь шоколад, чихэрнээс авахуулаад төрөл бүрийн амттай зайрмагийг энэ улсад үйлдвэрлэж, дэлхийн олон газрууд импортлон авдаг билээ. Хамгийн гайхалтай нь эдгээр амттанууд чихрийн агууламж багатай хэрнээ мартахын аргагүй гайхалтай амттай байдаг гэнэ.
Үүнээс дүгнэхэд Япон бүсгүйчүүдийн эрүүл, зөв хооллох арга ухаан нь тэдний арьсыг толигор, сайхан байлгаад зогсохгүй, гоолиг биетэй болоход нь ихээхэн тус нэмэр үзүүлдэг болох нь харагдаж байна. Ер нь бодоод байх нь ээ, эрүүл мэндэд элдэв хор хөнөөл учруулдаггүй хоол хүнс хэрэглэх нь бие организмд чухал хэрэгтэйгээс гадна, гоо сайхныг аврах гол үндэс болдог ажээ.
