“Samsung” харилцагч хоорондын хөлбөмбөгийн тэмцээн амжилттай зохион байгуулагдлаа

"Samsung Electronics" компанийн Монгол дахь төлөөлөгчийн газраас энэ сарын 6-ний өдөр өөрийн харилцагч нарынхаа дунд зохион байгуулсан нөхөрсөг хөлбөмбөгийн тэмцээн нийслэлийн 5-р дунд сургуулийн хөлбөмбөгийн талбайд амжилттай явагдаж өнгөрлөө.

Энэхүү тэмцээнд зохион байгуулагч Samsung компанийн багаас гадна Скайтел, Юнител групп, Мобиком Корпораци, Жи-Мобайл, BSB Электроникс, Номин Электроникс, IT Zone болон Саммит зэрэг нийт 9 багийн 100 орчим тамирчид 3 бүсэд хуваагдан хөлбөмбөгийн талбайд хурд хүчээ сорьлоо.

Тэмцээний өдөр хэдий хүйтэн бороотой байсан ч тэмцээн маш нөхөрсөг уур амьсгалтай болж өнгөрсөн бөгөөд ирэх жилүүдэд уламжлал болгон зохион байгуулагдах талаар Samsung Electronics компанийн Монгол дахь төлөөлөгч С.Энхтуяа нээлтийн ажиллагааны үеэр дурдсан.

Тэмцээний 3-р байрыг Мобиком Корпорацийн баг эзэлж хүрэл медаль мөн 500,000₮, 2-р байрыг Скайтел компанийн баг мөнгөн медаль, 750,000₮-р шагнагдсан бол тэмцээний Тэргүүн байрыг Юнителийн группын баг хамт олон эзэлж Samsung-ын нэрэмжит цом, алтан медаль, 1 сая төгрөгийн мөнгөн шагналыг тус тус хүртлээ.

Мөн хамгийн идэвхтэй хөгжөөн дэмжигчтэй багаар Номин Электроникс, хамгийн олон хөгжөөн дэмжигчтэй багаар Саммит компани шалгарсан ба тэмцээний мэргэн буучаар Samsung компанийн тамирчин Д.Серикжан 4 гол оруулснаар шалгарч мөнгөн шагналаар шагнагдлаа.

Харилцагч байгууллагуудынхаа ажилтнуудын эрүүл мэндэд тустай, амралтын өдрийг спортын халуун дулаан уур амьсгалаар бүрдүүлсэн Samsung компанийн хамт олонд талархал илэрхийлье, мөн тэмцээнд амжилттай оролцсон бүх тамирчиддаа баяр хүргэе!