Энэ жилийн уралдааны сэдэв “Streets Digital”. Дэлхийн их хотуудын гудамж талбайн дизайн өдрөөс өдөрт өөрчлөгдөн хувирч үүнд уран бүтээлчдийн нөлөө ихээр тусгалаа олсон байдаг. Энэ утгаараа энэ жилийн уралдаан уран бүтээлчиддээ төрөлх их хотынхоо тоглож өссөн гудамжаа өөрсдийн эрч хүч энергиэр цэнэглэж өөрчлөх боломжийг олгож байна.

Уг наадамд манай авъяаслаг 50 гаруй уран бүтээлчид 60 гаруй бүтээлээрээ оролцож байгаа бөгөөд Австрали, Филлипинээс хүрэлцэн ирсэн уран бүтээлчидтэй хамтран бүтээл туурьвиж ур ухаанаа уралдуулж байна. Тус наадмын нүүдлийн үзэсгэлэнг сонирхолтой хэлбэрээр зохион байгуулсан бөгөөд Сүхбаатарын талбай, Драмын театр, Алдарт Битлз хамтлагийн хөшөөний урд зэрэг 3-н газар нээгдэж, үзэгч олонд тус наадамд ирүүлсэн бүтээлүүдийг дэлгэн үзүүлсэн.

Энэ үдэш Vegas клубт болох хаалтын үдэшлэгийн үеэр ялагчдыг тодруулах бөгөөд 1, 2, 3-р байранд тус бүр 2 уран бүтээлчийг шалгаруулна. 1-р байрын шагналтнууд “Tiger Translate 2012” Дэлхийн наадамд Монголоо төлөөлөн оролцохоор Дубайг зорих бол 2, 3-р байрын шагналтнууд мөнгөн шагнал гардана. Мөн энэ удаагийн наадам үзэгчдийн таашаалд нийцсэн 2 уран бүтээлийг үзэгчдийнхээ саналаар онлайн хэлбэрээр шалгаруулж байгаа бөгөөд www.facebook.com/TigerMongolia хуудсанд байрлуулсан зургуудад санал өгөх боломж 8 сарын 24ны буюу өнөөдрийн 20.00 цаг хүртэл үзэгчдэд нээлттэй байх юм.

Хаалтын үдэшлэг 20.00 цагаас Blue Sky Tower-ийн Vegas клубт болох ба үдэшлэгт Австралийн алдарт “Slice and Dice” Ди-Жэй групп урилгаар оролцож, Монголын залууст өөрсдийн шилдэг сэтээ тоглох юм байна. Мөн неон гэрлийн гайхамшиг, 3D маппинг зэрэг их хотын залууст сонирхууштай үзүүлбэрүүд дэлгэн орчин үеийн амьд урлаг, хөгжмийг хослуулсан нэгэн үдшийг хамтдаа өнгөрөөх юм байна.